azatutyun.am Ֆրանսիայի նախագահ Էմանուել Մակրոնը Նյու Յորքում ԱՄՆ նախագահ Դոնալդ Թրամփի հետ քննարկել է Ուկրաինայի էներգետիկ և քաղաքացիական ենթակառուցվածքների դեմ հարվածների դադարեցման հնարավորությունը։
Մակրոնը X-ում գրել է, որ Փարիզն ու Վաշինգտոնը պատրաստվում են համատեղ ջանքեր գործադրել՝ հասնելու Ուկրաինայի էներգետիկ և քաղաքացիական ենթակառուցվածքների դեմ հարվածների դադարեցմանը։
«Խաղաղ բնակչությունը պետք է պաշտպանված լինի, և մենք պետք է հնարավորինս շուտ սկսենք լուրջ բանակցություններ Ռուսաստանի և Ուկրաինայի միջև խաղաղության պայմանների շուրջ», – հայտարարել է Ֆրանսիայի նախագահը։
Թրամփի հետ հանդիպումից հետո Մակրոնը լրագրողներին ասել է նաև, որ կողմերը համաձայնել են Ուկրաինային աջակցել պաշտպանունակությունն ամրապնդելու հարցում։ Նրա խոսքով՝ քննարկվել է, մասնավորապես, Կիևին լրացուցիչ հակաօդային հրթիռներ մատակարարելու հարցը՝ ռուսական օդային հարձակումներից պաշտպանվելու համար։
