azatutyun.am Հայաստանի կառավարությունը մտադիր է մեծացնել երկրի ռազմական բյուջեն՝ 563 մլրդից հասցնելով 616.5 միլիարդի՝ 1.7 մլրդ դոլարի։
2026-ին 2025-ի համեմատ պաշտպանության նախարարության բյուջեն կրճատվել էր գրեթե 15 տոկոսով, իսկ այժմ այն վերականգնվում է 9.5 տոկոսով։ Եկող տարվա պետական բյուջեի նախագիծը ներառված է կառավարության այսօրվա նիստի օրակարգում։
616.5 միլիարդից ավելի քան 613 միլիարդը կուղղվի «Պաշտպանության ապահովում» ծրագրին։ Դա ներառում է Հայաստանի զինված ուժերի պահպանման, ռազմական, մարտական տեխնիկայի, տրանսպորտային միջոցների, կապի համակարգի սարքավորումների, զորանոցային և տեխնիկական գույքի, պարենի, հանդերձանքի, վառելիքաքսուքային նյութերի սահմանված պաշարների մակարդակի, զենքի և զինամթերքի հնարավոր ներհանրապետական գնումների, բանակի մարտունակության և կենսաապահովման պահանջների բավարարման ծախսերը։
Ռազմաբժշկական ուղղությամբ կառավարությունը նախատեսում է ծախսել 1 մլրդ 70 միլիոն դրամ, ևս 974 մլն դրամ կուղղվի միջազգային ռազմական համագործակցությանը, 306 միլիոն դրամ էլ հումանիտար ականազերծմանը։
