civilnet.am Հայաստանի կառավարությունը հավանություն է տվել Զարգացման ֆրանսիական գործակալության հետ 250 մլն եվրոյի վարկային համաձայնագրի ստորագրմանը։ Ստացվող միջոցներն ուղղվելու են 2026-ի պետական բյուջեի պակասուրդի ֆինանսավորմանը։ Ծրագիրը համատեղ իրականացվում է Ասիական զարգացման բանկի հետ, որը ևս նախատեսում է տրամադրել մինչև 250 մլն դոլար։
Ծրագրի առանցքային նպատակն է նվազեցնել Հայաստանի կախվածությունը արտաքին ֆինանսավորումից՝ ներպետական ռեսուրսների մոբիլիզացման և առավել բարենպաստ գործարար միջավայրի ձևավորման միջոցով։ Ֆինանսական աջակցությունն ուղղվելու է նաև պատասխանատու հանրային ֆինանսների կառավարմանը, որը պետք է ապահովի որակյալ ու կայուն պետական ծախսեր և ներդրումներ։
Բարեփոխումներն ընդգրկելու են երեք հիմնական ուղղություն․
- Հարկաբյուջետային կառավարման և հանրային ծառայությունների բարելավում ազգային ու տեղական մակարդակներում,
- Ներպետական ռեսուրսների հավաքագրման, կապակցելիության և մասնավոր հատվածի զարգացման խթանում,
- Պետական պարտքի կառավարման բարելավում և ֆինանսական շուկաների արդյունավետության բարձրացում։
Վարկը տրամադրվում է 20 տարի ժամկետով, որից 5-ը՝ արտոնյալ։ Մայր գումարը մարվելու է 30 հավասար մասերով, իսկ ամբողջ գումարը Հայաստանին է փոխանցվելու մեկ միասնական տրանշով։ Քանի որ սա բյուջետային աջակցության վարկ է, պետական բյուջեից հավելյալ ծախսեր կամ համաֆինանսավորում չի պահանջվում։
