azatutyun.am Բանտում ինֆարկտից մահացել է հոկտեմբերի 25-ի տեղական ընտրություններում Ստեփանավանի «Ուժեղ Հայաստանի» համայնքապետի թեկնածու Արսեն Գևորգյանը:
Տեղեկությունը «Ազատությանը» հաստատել է Քրեակատարողական հիմնարկների խոսնակ Նոնա Նավիկյանը:
«Ուժեղ Հայաստան» կուսակցությունը ևս հաստատել է լուրը՝ ցավակցություն հայտնելով Արսեն Գևորգյանի ընտանիքին․
«Բանտում հերթական ընդդիմադիր գործչի մահվան պատախանատվությունը կրում է այն մարդը ում պատվերով հարյուրավոր մարդկանց անհիմն վարկաբեկում ու կալանավորում են»,- նշված է կուսակցության հաղորդագրության մեջ։
Հիշեցնենք՝ Արսեն Գևորգյանը ձերբակալավել էր ՏԻՄ ընտրությունների նախաշեմին՝ հոկտեմբերի 21-ին։ Ըստ Հակակոռուպցիոն կոմիտեի՝ թեկնածուն և նրա թիմակիցները ընտրակաշառք են բաժանել տասնյակ ընտրողների, իսկ ևս 30-ի համար ցուցակներն ու գումարն արդեն «ծրարված» էին:
Գևորգյանի փաստաբանը հայտնել էր, որ Գևորգյանը առաջադրված մեղադրանքը չի ընդունում:
