azatutyun.am Ավելի քան 4000 օտարերկրացիներ որպես վարձկաններ մասնակցել են Ուկրաինայի զինված ուժերի կազմում ռուսական բանակի դեմ մարտական գործողություններին, հայտնել է Ռուսաստանի Քննչական կոմիտեն՝ հավելելով, որ նրանց մեկ քառորդը հետախուզման մեջ է։
«Հետաքննությունը տեղեկություններ է ստացել [Ուկրաինայում- խմբ.] զինված հակամարտությանը ավելի քան 70 երկրից 4000-ից ավելի վարձկանների մասնակցելու վերաբերյալ։ Դոնբասի քաղաքացիական բնակչության և ռուս զինծառայողների դեմ կռված 1002 օտարերկրյա վարձկանների նկատմամբ հայտարարվել է միջազգային հետախուզում»,- ասվում է ՌԴ Քննչական կոմիտեի տարածած հայտարարությունում:
Գերատեսչությունը նշել է, որ «նրանցից 323-ի դեմ քրեական գործերը փոխանցվել են դատարան, իսկ 284-ը դատապարտվել են»։ Այս տեղեկատվությունը հաղորդվել է Քննչական կոմիտեի ղեկավար Ալեքսանդր Բաստրիկինին Մարիուպոլում նրա անցկացրած խորհրդակցության ժամանակ, նշում է գործակալությունը:
