armenpress.am: ՀՀ վարչապետ Նիկոլ Փաշինյանն անդրադարձավ «Նեմեսիս» հուշաղբյուր- կոթողի տեղադրումից հետո Թուրքիայի կողմից օդային տարածքը Հայաստանի թռչքների համար փակելուն:
ԱԺ-ում կառավարության անդամների հետ հարցուպատասխանի ժամանակ «Հայաստան» խմբակցության պատգամավոր Թադևոս Ավետիսյանը նշեց, որ «Նեմեսիս»-ի հուշարձանի կառուցումն անգամ ուշացած էր: «Մենք այս տնտեսական թվացյալ ինտեգրման կամ ապաշրջափակման նպատակով ի՞նչ գին ենք վճարում, ի՞նչն ենք զիջում, որ զարգանանք»,- հարցրեց Ավետիսյանը:
Վարչապետն այս հարցի կոնտեքստում անդրադարձավ հայրենասիրության մոդելին:
«Այնպես չէ, որ տարբեր ուղղություններով մեր գնալ-գալու վրա արձանները չեն ազդում: Օրինակ՝ մենք առերեսվո՞ւմ ենք, թե այդ հարաբերությունների վրա ժամանակին Գարեգին Նժդեհի արձանի տեղադրումն ինչ ազդեցություն է ունեցել: Այդտեղ մենք լուրջ խնդիրներ ունեցել ենք և շարունակում ենք ունենալ: Այնպես չէ, որ միայն Արևմտյան ուղղությունից ենք մենք արձանների հետ կապված հարցեր ստանում։ Մենք ռազմավարական ընտրության առաջ ենք կանգնած: Եվ այդ ռազմավարական ընտրությունը հնարավոր չէ առանց սոցիալ-հոգեբանական ոլորտում առերեսվելու և ռեֆլեքսիայի ենթարկվելու»:
Անդրադառնալով պատգմավորի դիտարկմանը, որ այդ արձանն անգամ ուշացարած էր՝ վարչապետը հարցրեց, թե, օրինակ, եթե նման արձան ՀՀ-ում չլիներ, դրանից ի՞նչը կտուժեր և ի՞նչ կշահեր Հայաստանը:
Իսկ, թե ինչո՞ւ է արձանը տեղադրվել՝ վարչապետը պատասխանեց՝ մի պարզ պատճառով. «Այդ նախաձեռնությունները եղել են 2020թ դեկտեմբերից 2021-ի ապրիլի շրջանում: Եվ բոլորը մտածել են, որ այդ «դավաճանության» ընդհանուր տրամաբանության մեջ, որ չհամաձայնվենք, մեզ կասեն՝ դուք դավաճան եք: Մենք բոլորս ըստ էության առաջնորդվում ենք մի տրամաբանությամբ՝ այնպես անենք, որ մեզ հանկարծ չասեն, որ մենք դավաճան ենք, բայց մենք իրականում մեր երկրի պետական ու ազգային շահերն անընդհատ դավաճանում ենք…»:
Նա շեշտեց՝ կա խնդիր և դա Հայաստանի խնդիրն է, և նրանք, որոնք Հայաստանի ճանապարհները փակում են, ընդհանրապես ոչ մի խնդիր չունեն, եթե անգամ ունեն, ապա այդքան խոր չեն:
Երևանի Օղակաձև այգում ապրիլի 25-ին բացվել է 1919 թվականին «Նեմեսիս» գործողությունը կազմակերպած և այն իրականացրած հերոսներին նվիրված «Նեմեսիս» հուշաղբյուր-կոթողը: Հուշարձանի վրա Սողոմոն Թեհլիրյանի, Արամ Երկանյանի, Արշավիր Շիրակյանի, Պետրոս Տեր-Պողոսյանի, Արտաշես Գևորգյանի, Միսաք Թորլաքյանի, Ստեփան Ծաղիկյանի, Հակոբ Մելքումովի, Երվանդ Ֆունդուկյանի, Արմեն Գարոյի, Գրիգոր Մերջանովի, Ավետիք Իսահակյանի, Արշակ Եզդանյանի, Արա Սարգսյանի, Հրաչ Փափազյանի, Շահան Նաթալիի անուններն են։
