Թուրքիան ուշադրությամբ հետևում է Լաչինի ճանապարհի շուրջ տեւական բանավեճերին և հասկանում է Ադրբեջանի օրինական մտահոգությունն այդ հարցում: Այս մասին հայտարարություն է տարածել Թուրքիայի ԱԳՆ-ն։
«Ցավոք, երկար ժամանակ Ադրբեջանի կողմից բարձրաձայնվող այս մտահոգությունները ուշադրության չարժանացան և ի վերջո Ադրբեջանը իր ինքնիշխան իրավունքների շրջանակներում ձեռնարկեց քայլեր, որոնք նպատակահարմար գտավ։
Թուրքիան Լաչինի ճանապարհի վերաբերյալ Ադրբեջանի հասցեին հնչող քննադատությունները անհիմն է համարում»,- նշված է ԱԳՆ հաղորդագրության մեջ։
Թուքրիայի արտաքին գերատեսչությունը նշել է, թե այն փաստը, որ Լաչինի միջանցքով բժշկական նպատակով անցուդարձը թույլ է տրված, ինչպես նաև այլ ճանապարհ է առաջարկվել նյութական ապրանքների փոխադրումների համար (նկատի ունի՝ Աղդամ-Ստեփանակերտ ճանապարհը-խմբ․), ցույց են տալիս, որ «ադրբեջանական կողմը դրական մտադրություններով առավելագույն ջանքեր է գործադրում»։
«Հայաստանից մեր ակնկալիքն է խուսափել սադրիչ քայլերից, ճանաչել Ադրբեջանի տարածքային ամբողջականությունն ու ինքնիշխանությունը, Ղարաբաղում հայ բնակչության կարիքները հոգալու նպատակով «Աղդամ-Ստեփանակերտ» և այլ այլընտրանքային ուղիների կիրառումը, ինչպես նաև աջակցել ջանքերին՝ վերաինտեգրել Ադրբեջանի հայ բնակչությանը»,- նշել են ԱԳՆ-ից։
Թուրքիայի ԱԳՆ-ն նշել է՝ «Թուրքիան հավատում է, որ տարածաշրջանում խաղաղություն և կայունություն ապահովելու համար պետք է աջակցել բարեկամ և եղբայրական Ադրբեջանի տարածքային ամբողջականությանը, ինքնիշխանությանը, հումանիտար ջանքերին և խուսափել իրավիճակը սրող գործողություններից»։
