azatutyun.am: Բաքուն բարձր է գնահատում Ռուսաստանի առաջարկը՝ նպաստելու ՄԱԿ-ի Կլիմայի փոփոխության մասին շրջանակային կոնվենցիայի Մասնակիցների կոնֆերանսի 29-րդ նստաշրջանի անցկացմանը։ ՏԱՍՍ գործակալության հետ զրույցում այս մասին հայտարարել է Ռուսաստանում Ադրբեջանի դեսպան Փոլադ Բյուլբյուլօղլուն։
Ադրբեջանցի դիվանագետը հիշեցրել է, որ, Ալիևի վարչակազմի և Հայաստանի վարչապետի գրասենյակի՝ դեկտեմբերի 7-ի համատեղ հայտարարության համաձայն, Երևանը հանել է COP29-ը հյուրընկալելու իր թեկնածությունը՝ հօգուտ Բաքվի։
«Իսկ մենք, մեր հերթին, պաշտպանեցինք Հայաստանի թեկնածությունը COP բյուրոյին անդամակցելու հարցում։ Այս փաստը կարելի է համարել առաջին շոշափելի քայլը երկու երկրների միջև վստահության ամրապնդման համար»,- ասել է Բյուլբյուլօղլուն։
Միջազգային հեղինակավոր իրավապաշտպան կազմակերպությունները քննադատել են կլիմայի հարցերով հեղինակավոր համաժողովը Ադրբեջանում անցկացնելու որոշումը՝ պնդելով, որ ժողովրդավարության ցուցանիշներով աշխարհի ետնապահներից համարվող այդ երկիրը հայտնի է նաև որպես մոլորակի ամենաաղտոտված, էկոլոգիապես կործանված վայրերից մեկը՝ նավթի արտահոսքերի պատճառով։
