tert.am: ՌԴ Անվտանգության դաշնային ծառայության աշխատակիցները Մերձմոսկվայում բերման են ենթարկել Հայաստանի քաղաքացիներից բաղկացած հանցախմբի անդամների, որոնք կազմակերպել են սինթետիկ թմրամիջոցների արտադրությունն ու վաճառքը։ Այս մասին ՏԱՍՍ-ին հայտնել են Ռուսաստանի ԱԴԾ Հասարակայնության հետ կապերի կենտրոնից։
«Մոսկվայի մարզի Չեխովի քաղաքային շրջանի տարածքում իրականացվել է առանձնապես խոշոր չափերով սինթետիկ թմրամիջոցների արտադրության մեջ մասնագիտացած ՀՀ քաղաքացիներից ստեղծված հանցավոր խմբի գործունեությունը ճնշելու գործողություն»,- ասված է հաղորդագրությունում:
Ավելի վաղ ԱԴԾ-ն տեղեկություն էր ստացել, որ Մոսկվայի մարզում ստեղծվել է մի քանի անօրինական առցանց խանութների համար թմրանյութերի արտադրության գաղտնի լաբորատորիա։
Լաբորատորիայում բերման է ենթարկվել Հայաստանի Հանրապետության երեք քաղաքացի, առգրավվել է առնվազն 86 կգ քաշով թմրամիջոց մեֆեդրոն, ինչպես նաև լաբորատոր սարքավորումներ և տարբեր քիմիական նյութեր։ Ռուսաստանի ԱԴԾ քննչական վարչությունը քրեական գործ է հարուցել:
