tert.am: Արդեն երրորդ օրն է, ինչ «Տավուշը հանուն հայրենիքի» շարժման անդամները, Բագրատ արքեպիսկոպոս Գալստանյանի առաջնորդությամբ, փակ են պահում Բաղրամյան պողոտան՝ գիշերելով այստեղ։ Միևնույն ժամանակ ոստիկանական ուժերը շարունակում են փակ պահել Դեմիրճյան փողոցը։
Բագրատ Սրբազանը վաղ առավոտյան ուղիղ միացումով ներկայացրել է Բաղրամյան- Պռոշյան խաչմերուկում տիրող իրավիճակը՝ նշելով, որ մարդիկ գիշերն անցկացրել են «վրանային ավանում» և նույնիսկ չեն քնել՝ չնայած հանգստանալու իր հորդորներին։ Նա ևս մեկ անգամ հիշեցրել է ժամը 15։00-ի կայանալիք հավաքի մասին՝ նշելով, որ սպասում են բոլորին։
Երեկ երեկոյան Բաղրամյան պողոտայում, դիմելով քաղաքացիներին, Բագրատ Սրբազանը, հայտարարել է, որ այսօր չափազանց կարևոր օր է սպասվում։
Հիշեցնենք՝ հունիսի 9-ին Հանրապետության հրապարակում տեղի ունեցած հանրահավաքից հետո Բագրատ Սրբազանն իր աջակիցների հետ երթ սկսեց դեպի Բաղրամյան պողոտա, սակայն ոստիկանական մեծաթիվ ուժեր թույլ չտվեցին երթը մտնի Դեմիրճյան փողոց: Ցուցարարների մի խումբը երթով շարժվեց դեպի կառավարական ամառանոցներ, սակայն այնտեղ ևս ոստիկանները թույլ չտվեցին Պռոշյան փողոցից մտնել Դեմիրճյան փողոց:
Գիշերն իրավիճակը մայրաքաղաքի այս հատվածներում լարված է եղել։ Ի վերջո երթը վերադարձել է Բաղրամյան պողոտա, որտեղ էլ հայտարարվել է վրաններ տեղադրելու և նստացույց սկսելու մասին:
