amerikayidzayn.com: Գաղտնիք չէ, որ ներգաղթը հանդիսանում է ԱՄՆ նախընտրական պայքարի առանցքային թեմաներից մեկը: Խնդրի վերաբերյալ իր դիրքորոշումը ներկայացնելիս՝ Միացյալ Նահանգների փոխնախագահ Քամալա Հարիսը հղում է կատարում իր դատախազական գործունեությանը։ Դոնալդ Թրամփը քննադատում է Սպիտակ տան ներկայիս վարչակազմին:
«Իրավապահների հետ անցել եմ ԱՄՆ-ն ու Մեքսիկան կապող ստորգետնյա թունելներով: Հետևել մեր երկիր անօրինական կերպով ներթափանցած անդրազգային ավազակախմբերի, թմրակարտելների և մարդկանց առևտրով զբաղվողների: Նրանց մեղադրանք եմ առաջադրել ու հաղթել»,- ասել է Հարիսը:
Իր պաշտոնավարման ընթացքում ԱՄՆ նախկին նախագահ Դոնալդ Թրամփը կառուցել է ավելի քան 80 կիլոմետր երկարությամբ ամերիկա-մեքսիկական սահմանային նոր պատը, նվազեցրել փախստականների ընդունման տարեկան թույլատրելի շեմը՝ հասցնելով այն նվազագույն կետի, և գործի դրել մի քաղաքականություն, որը բաժանում էր երեխաներին ծնողներից:
«Այս նոյեմբերին ամերիկացիները համեմատելու են մեր աշխատանքները և ասելու են. «Սահմանային ցար Հարիս, դու սարսափելի աշխատանք ես կատարել: Դուք խայտառակություն եք մեր երկրի համար: Դուք ազատված եք աշխատանքից: Դո՛ւրս կորեք այստեղից։ Դո՛ւրս»,- ասել է Թրամփը:
Նորություն չէ, որ ներգաղթին առնչվող խնդիրները ամերիկյան նախընտրական պայքարի սուր հարցերից են։ Չիկագոյի խորհրդի սոցհարցման համաձայն՝ ամերիկացիների 50%-ը կարծում է, թե մեծ թվով ներգաղթյալները սպառնալիք են Միացյալ Նահանգներին։ Զուգահեռաբար՝ թեև ամերիկացիների կեսից ավելին կողմ է սահմանային պատի կառուցմանը և ԱՄՆ-Մեքսիկա սահմանին ամերիկյան զորքերի տղակայմանը, բայց նաև դեմ է ապօրինի ներգաղթյալների զանգվածային արտաքսմանը:
Տևական ժամանակ է ԱՄՆ Կոնգրեսը չի կարողանում ընդունել ներգաղթի վերաբերյալ օրենսդրական բարեփոխումները, և նման պայմաններում շատ բան կախված է գործադիր իշխանության գործողություններից և առկա կանոնակարգերից:
«Նման քաղաքական միջավայրում բարդ է, ու գործադիրի գործողությունները միշտ լինելու են քննարկման առարկա, և մենք ունենք Կոնգրես, որը պատրաստ չէ գործել»,- ասում է ներգաղթի հարցերով իրավաբան Քորի Ֆորմանը:
Այս ամենի ֆոնին՝ Քամալա Հարիսը խոստանում է աջակցել սահմանային անվտանգությանը վերաբերող օրենսդրության ընդունմանը` ընդգծելով, թե Թրամփն էր, որ այս տարվա սկզբին խափանեց Սենատում նման օրինագծի ընդունումը:
«Նա տապալեց երկկուսակցական պայմանավորվածությունը, քանզի կարծում էր, թե դա կօգնի իրեն հաղթել ընտրություններում։ Սա ցույց է տալիս, որ Դոնալդ Թրամփը չի մտածում սահմանների անվտանգության մասին: Նա մտածում է միայն իր մասին… ։ Ահա, իմ խոստումը ձեզ՝ որպես նախագահ, հետ կբերեմ սահմանային անվտանգության վերաբերյալ օրինագիծը, որի ընդունմանը խոչընդոտեց Դոնալդ Թրամփը, և ես այն կստորագրեմ որպես օրենք»,- ասել է Հարիսը:
Թրամփի թիմակիցները, սակայն, պնդում են՝ Սպիտակ տան նախկին ղեկավարը պետք է կենտրոնանա այն ոլորտների վրա, որտեղ, նրանց կարծիքով, առավելություն ունի Հարիսի նկատմամբ, և դրանցից է ներգաղթը:
Շարունակությունը՝ սկզբանղբյուր կայքում
