azatutyun.am: Հեռախոսազրույց են ունեցել Ադրբեջանի և Իրանի նախագահներ Իլհամ Ալիևը և Մասուդ Փեզեշքիանը, հայտնում է ադրբջանական APA գործակալությունը: Երկու երկրների նախագահներն ընդգծել են, որ տարածաշրջանում խաղաղությունն ու անդորրը կարևոր պայման են։

Իլհամ Ալիևը շնորհավորել է Մասուդ Փեզեշքիանին Իրանի և Իսրայելի միջև հակամարտության ավարտի և հրադադարի կապակցությամբ։

Իսրայելը անակնկալ օդային պատերազմ էր սկսել հունիսի 13-ին՝ հարվածելով Իրանի միջուկային օբյեկտներին և սպանելով մի շարք բարձրաստիճան հրամանատարների՝ այսպիսով Իսլամական Հանրապետությանը հասցնելով ամենածանր հարվածն Իրաքի հետ 1980-ականների պատերազմից ի վեր։

Իրանը պատասխանել էր Իսրայելի ռազմական օբյեկտների և քաղաքների ուղղությամբ զանգվածային հրթիռակոծություններով։

Իրանի իշխանությունների տվյալներով՝ իսրայելական հարվածների արդյունքում իրենց երկրում զոհվել է 610 մարդ, և վիրավորվել են 4746-ը։ Իրանի պատասխան հրթիռակոծությունները սպանել են 28 մարդու Իսրայելում։