Ռուսաստանի արտաքին գործերի նախարար Սերգեյ Լավրովը Պեկինում հանդիպել է Չինաստանի նախագահ Սի Ծինփինի հետ՝ Շանհայի համագործակցության կազմակերպության արտաքին գործերի նախարարների խորհրդի նիստի շրջանակներում։
Ռուսաստանի ԱԳՆ-ի փոխանցմամբ՝ նրանք քննարկել են Ռուսաստանի նախագահի՝ Չինաստան այցի նախապատրաստական աշխատանքները՝ ՇՀԿ գագաթնաժողովին և Ճապոնիայի նկատմամբ տարած հաղթանակի 80-ամյակի տոնակատարություններին մասնակցելու համար։
Սի Ծնփինը ողջունել է Ռուսաստանի ղեկավարի առաջիկա այցը Չինաստան։
Ռուսական կողմն, ըստ հաղորդագրության, նաև անդրադարձել է միջազգային և տարածաշրջանային օրակարգի որոշ արդիական հարցերի։
Չինաստանի նախագահը հաստատել է Ռուսաստանի հետ համապարփակ գործընկերության և ռազմավարական փոխգործակցության հետագա զարգացման պատրաստակամությունը։
