Պայմանական վաղաժամկետ ազատ արձակված ցմահ դատապարտյալը Մհեր Ենոքյանն է։
«Ինֆոքոմ»-ի հարցին ի պատասխան՝ հայտնեց Քրեակատարողական ծառայության հանրային կապերի բաժնի պետ Նոնա Նավիկյանը։
«Դատարանի որոշում է եղել, և տվյալ անձը պայմանական վաղաժամկետ ազատ է արձակվել»,- նշեց նա։
Ըստ դատական վճռի՝ Ենոքյանը իր համարկուրսեցու հետ 1996թ. առանձնակի դաժանությամբ սպանել է իր կուրսեցի Իոսիֆ Աղաջանովին։ Ենոքյանը երբեք չի ընդունել իր մեղքը՝ ասելով, որ ընդամենը ներկա է եղել սպանությանը։
Ավելի վաղ՝ 2022-ի սեպտեմբերին, դատարանի որոշմամբ նրա պատժի կրման ռեժիմը կիսաբացից փոխվել էր բացի։ Դա նշանակում է, որ դատապարտյալն իրավունք է ստանում առավոտյան 08:00-ից մինչև երեկոյան 20:00-ն դուրս գալ հիմնարկից, իսկ վերադառնալուց հետո գիշերել մյուս դատապարտյալներից անջատ։ Այս փոփոխությունը սպանվածի ընտանիքի վրդովմունքի առիթ էր դարձել։
Հիշեցնենք, ավելի վաղ հայտնի էր դարձել, որ «Վարդաշեն» ՔԿՀ-ում պահվող ցմահ դատապարտյալ է պայմանական վաղաժամկետ ազատ արձակվել։
