1lurer.am Կառավարությունը հավանություն տվեց «Ոստիկանության բարեվարքության և կարգապահական կանոնագիրք» օրենքի և հարակից օրենքների նախագծերին:
«Մենք ոստիկանության ոլորտի բարեփոխումների շրջանակում առաջին ինստիտուցիոնալ քայլն արեցինք առ այն, որ կարգապահական վարույթները տեղափոխվեցին նախարարության տիրույթ, և ներքին անվտանգության և հակակոռուպցիոն վարչություն ձևավորվեց որպես ինստիտուցիոնալ մեխանիզմ նախարարի ուղիղ ենթակայության ներքո՝ հաշվի առնելով այն հանգամանքը, որ պիտի ունենայինք փոխզսպումների ճշգրիտ համակարգ, որը կերաշխավորեր, որ ծառայողական կարգապահությանը վերաբերող բոլոր հարցերը օբյեկտիվ քննության են ենթարկվում, և, ըստ այդմ, ռեակցիան լինում է համապատասխան իրավիճակին: Բնականաբար, մենք, բացի այս կարգավորումից, պիտի նախատեսենք այլ կարգավորումներ ևս, որոնք վերաբերում են այս վարչության ինստիտուցիոնալ կարողությունների զարգացմանը, բարձրացմանը և, ըստ այդմ, այս օրենսդրական փաթեթը նախատեսում է, որ առաջին հերթին վստահ լինենք, որ այն վարչությունը, որը հետևում է ծառայողների բարեվարքությանը, ծառայողական կարգապահությանը, և վարչության ծառայողները համապատասխանում են բարեվարքության այն սկզբունքներին, որը պահանջվում է ընդհանուր առմամբ այս համակարգից»,- ասաց ՆԳ նախարար Արփինե Սարգսյանը:
Նա նշեց, որ նախատեսված է, որ վարչությունում պաշտոնին նշանակվելուց առաջ ծառայողները պիտի անցնեն բարեվարքության ուսումնասիրություն: «Կարգը կնախատեսվի լիազոր մարմնի ղեկավարի համապատասխան հրամանով, և սա մեզ թույլ կտա վստահ լինել, որ վարչությունում գործում է բարեվարք անձնակազմ, որը կարողանում է հուսալի գործիքակազմով հետևել մնացած ծառայողների աշխատելաոճին: Բնականաբար, բացի սրանից, ծառայությունը պետք է ունենա անհրաժեշտ այլ գործիքակազմեր, որոնք կհեշտացնեն ծառայողական քննության հետ կապված հարցերը: Նախատեսել ենք առավել պարզեցված գործիքակազմ. տեսակապի միջոցով ծառայողական քննությունն անցկացնելու հնարավորություն: Նախատեսված է նաև ծառայության կողմից փորձաքննություն նշանակելու լիազորություն, եթե կա թմրամիջոցի կամ ալկոհոլի ազդեցության տակ ծառայության ներկայացման հետ կապված հարց, ապա ծառայությունը կարող է նշանակել նաև համապատասխան հետազոտություն այս առումով, որը կդառնա ծառայողական քննության շրջանակներում քննարկման ենթակա հարց: Բնականաբար, մենք անընդհատ խոսել ենք ծառայողների էթիկական պահվածքից, բայց գործիքակազմի առումով անցկացրել ենք ծառայողներին այն նույն խողովակով, ինչ որ ծառայողական սովորական քննություններն են: Ըստ այդմ՝ օրենսդրական այս փաթեթը նախատեսում է ձևավորել էթիկայի հանձնաժողով, որը կանդրադառնա այս հարցերի քննարկմանը: Ընդ որում՝ հանձնաժողովային կարգ ենք նախատեսել, որտեղ տեղ կունենան նաև քաղաքացիական հասարակության մեր գործընկերները ևս, որ պրոցեսը լինի առավել օբյեկտիվ: Ասեմ նաև, որ պարբերաբար մենք խնդիրներ ենք ունենում ծառայողական քննությունների հրապարակայնության հետ կապված, և դե ֆակտո նախարարության ձևավորումից հետո պարբերաբար հրապարակվել են հաշվետվություններ վարչության աշխատանքների մասով, բայց կարևոր է, որ հրապարակումը կամ չհրապարակումը լինեն ոչ անձի կամքից կախված, այլ լինի ինստիտուցիոնալ. ըստ այդմ փաթեթը նախատեսում է, որ տարեկան կտրվածքով պիտի ունենանք հրապարակումներ վարչության գործունեության մասով, և յուրաքանչյուր ծառայողական քննության կամ բարեվարքության ստուգման արդյունքները ևս պիտի լինեն հրապարակային և հանրամատչելի տեղեկատվություն, որպեսզի հանրությունը ևս կարողանա հանրային վերահսկողություն իրականացնել այս հարցերի մասով:
Փաթեթում նախատեսված է նաև վարքագծերի կանոնների սահմանման հստակ պահանջ: Կարգապահական պատասխանատվության մնացյալ հարցերը ևս ավելի լավարկված են՝ հաշվի առնելով մեր նախորդ պրակտիկ փորձառության արդյունքները: Նախարարության բարեփոխումների տեսանկյունից ինստիտուցիոնալ առումով կարևոր է նաև, որ այս փաթեթով նախատեսված է, որ ոստիկանության կառուցվածքում գործող ինֆորմացիոն կենտրոնը, որը պատասխանատու է հանրապետության պաշտոնական վիճակագրության համար հանցավորության տեսանկյունից, տեղափոխվելու է նախարարության տիրույթ, նախարարությունում ձևավորվելու է համապատասխան վարչություն, որը կրկին համապատասխան հակակշռի պայմաններում կկարողանա երաշխավորել հուսալի և արժանահավատ վիճակագրություն հանցավորության մասով:
Վերջին փոփոխությունը, որը փաթեթը նախատեսում է փոփոխություններով. եթե ունենք ծառայողների շարժ համակարգում, ապա նախատեսել ենք վեցամսյա կտրվածքով սոցիալական երաշխիքի պահպանման կանոն և հնարավորություն՝ շարունակելու պահպանել այդ երաշխիքը, եթե վեցամսյա կտրվածքով աշխատողը կանցնի ատեստացիոն պրոցեսով և դրական կերպով կհաղթահարի այն»,- նշեց ՆԳ նախարարը:
