1lurer.am Հնդկաստանը ոչ միայն հսկայական քանակությամբ ռուսական նավթ է գնում, այլև դրա մեծ մասը վաճառում է բաց շուկայում՝ ստանալով հսկայական շահույթ: Այդ մասին հայտարարել է ԱՄՆ նախագահ Դոնալդ Թրամփը, հավելել՝ Նյու Դելիի համար միևնույն է, թե Ուկրաինայում քանի մարդ է զոհվում ռուսական ռազմական մեքենայի ձեռքով։
«Այս առումով ես զգալիորեն կբարձրացնեմ Հնդկաստանի կողմից ԱՄՆ-ին վճարվող տուրքերը։ Շնորհակալություն այս թեմային ուշադրություն դարձնելու համար»,- Truth Social-ի իր էջում գրել է Թրամփը:
Սպիտակ տան ղեկավարի հայտարարությանն արձագանքել է Հնդկաստանի ԱԳՆ-ն:
«Հնդկաստանին անհրաժեշտ է ներմուծում՝ իր սպառողների համար էներգիայի կանխատեսելի և մատչելի գներ ապահովելու նպատակով: Հնդկաստանը քննադատող երկրներն իրենք են առևտուր անում Ռուսաստանի հետ։ Մեր հասցեին հնչող քննադատություններն անարդար են և անհիմն»,- նշել են գերատեսչությունից։
