Հայաստանի Հանրապետության եւ Ադրբեջանի Հանրապետության միջեւ խաղաղություն է հաստատվել: Այս մասին ասաց Նիկոլ Փաշինյանը՝ այսօր հղած ուղերձում։
Փաշինյանը նախ ընթերցեց Վաշինգտոնում ընդունված հռչակագրի կետերը, ապա ասաց, որ հարկ է համարում հանդես գալ գնահատականով, թե գործնականում ինչ է նշանակում մեջբերվածը, որն է տեղի ունեցածի քաղաքական իմաստն ու նշանակությունը։
«Օգոստոսի 8-ից հետո մենք ապրում ենք բացարձակապես ուրիշ, բոլորովին նոր Հարավային Կովկասում, մենք ապրում ենք բացարձակապես ուրիշ, բոլորովին նոր ՀՀ-ում, եւ այս փաստը պետք է գիտակցել։ Այս փաստը պետք է գիտակցել։ Այսպես ասում եմ, որովհետեւ դա հեշտ չէ, դա մեզ անծանոթ իրավիճակ եւ իրողություն է։
Մենք՝ Երրորդ հանրապետության քաղաքացիներս չգիտենք՝ ինչ է նշանակում խաղաղություն, ինչ է նշանակում ապրել խաղաղության պայմաններում, աշխատել խաղաղության պայմաններում, դա մեզ անծանոթ զգացում է, որովհետեւ մեր անկախության առաջին օրից մենք ապրել ենք կոնֆլիկտի մթնոլորտում, պատերազմի կամ «ոչ պատերազմ, ոչ խաղաղություն» իրավիճակում», – հայտարարեց ՀՀ վարչապետը։
Փաշինյանը ուղերձում ընդգծեց․
«Հաստատված խաղաղությունն ամենօրյա խնամք եւ հոգատարություն է պահանջում, ինչպես ամենօրյա խնամք եւ հոգատարություն է պահանջում նորածին եւ ոչ միայն նորածին երեխան, ինչպես ամենօրյա խնամք եւ հոգատարություն է պահանջում նորակառույց եւ նորաբնակ տունը, ինչպես ամենօրյա խնամք եւ հոգատարություն է պահանջում, այո, նոր ու սիրելի ավոտմեքենան։
Այսպիսին է եւ օգոստոսի 8-ին Հայաստանի եւ Ադրբեջանի միջեւ ԱՄՆ նախագահ Դ․ Թրամփի աջակցությամբ հաստատված խաղաղությունը, եւ մենք պետք է ամենօրյա խնամք տանենք այդ խաղաղության նկատմամբ։
Սա նոր կյանք է, եւ մենք մեր այս նոր կյանքը պետք է ապրենք նորովի։ Մեր կյանքը, կենցաղը, խոսույթը, իրականությունը այնքան են ներծծված կոնֆլիկտով, պատերազմով, որ պետք է կառավարել նույնիսկ մեր իրականության եւ խաղաղության բախման ռիսկը։ Սա նուրբ, չափազանց նուրբ սոցիալ-հոգեբանական, հանրային-քաղաքական, կառավարչական, տնտեսական աշխատանք է, որը պիտի միասին անենք, յուրաքաչնյուրս մեր տեղում, մեր չափով, բայց միասին, բոլորով, ժողովրդով, ամենքով»։
