Համայնքային ոստիկանության Կումայրիի բաժնի ծառայողները ստացել էին օպերատիվ տեղեկություն, որ օտարերկրյա քաղաքացի մի երիտասարդ ձեռք բերում և Գյումրի քաղաքի տարբեր վայրերում փաթեթներով տեղադրելու միջոցով իրացնում է թմրամիջոց։ Այս մասին հայտնում են ՀՀ ՆԳՆ ոստիկանությունից:
«Տեղեկությունը ստուգվեց օգոստոսի 22-ին: Երեկոյան ժամը 20:00-ին Գյումրու Գորկու անվան կենտրոնական զբոսայգում տեսնելով իրեն մոտեցող ոստիկաններին` 24-ամյա երիտասարդը դիմել է փախուստի: Հետապնդումը կարճ է տևել: Հասնելով Տերյան փողոց` երիտասարդը փախչելիս մի քանի փաթեթ է գցել բակերից մեկում, ապա բռնվել ու ձերբակալվել։
Նրա խուզարկությամբ հայտնաբերվել է 11 փաթեթ` ընդհանուր մոտ 14 գրամ մարիխուանայով: Նա հայտնեց, որ մարիխուանան իրացնելու նպատակով ձեռք է բերել Տելեգրամ հավելվածի միջոցով։
Նախաձեռնվել է քրեական վարույթ, որի շրջանակում կատարված զննությամբ հայտնաբերվել են նաև զբոսայգում երիտասարդի տեղադրած հինգ և փախչելիս նետած ութ փաթեթները։
24-ամյա օտարերկրացին կալանավորվել է: Նախաքննությամբ հանգամանքները պարզվում են»,- ասվում է հաղորդագրության մեջ:
