Հայաստանը 1,5 մլն դոլար դրամաշնորհ կստանա Վերակառուցման և զարգացման միջազգային բանկից՝ «Նաիրիտ» քիմիական գործարանի բնապահպանական վերականգնման և ռեգեներացիայի ծրագրի նախապատրաստման համար։
Դրամաշնորհային նամակ-համաձայնագիրը Հայաստանի Հանրապետության ու Վերակառուցման և զարգացման միջազգային բանկի միջև ստորագրվել է 2025-ի հունիսի 27-ին։ Այն ներառում է գործարանում առկա քիմիական թափոնների և սարքավորումների վնասազերծման, ինչպես նաև տարածքի շրջակա միջավայրի բարելավմանն ուղղված աշխատանքների նախապատրաստում։
Ծրագրով նախատեսվում են տեխնիկական գնահատում, բնապահպանական և սոցիալական ռիսկերի վերլուծություն, շահագրգիռ կողմերի ներգրավում, կարողությունների զարգացում և հատուկ իրականացման խմբի ձևավորում։ Միջոցների օգտագործման վերջնաժամկետը սահմանված է 2026-ի դեկտեմբերի 31-ը։
Կառավարության հիմնավորման մեջ նշված է, որ դրամաշնորհն ամբողջությամբ անհատույց է և Հայաստանի պետական բյուջեի համար լրացուցիչ ֆինանսական պարտավորություններ չի առաջացնում։
