lragir.am: «Չկա մի մարդ կամ մարդկանց խումբ, ում չեզոքացնելու համար հնարավոր է կայացնել բարձրագույն դատական մարմինները միավորելու որոշում»,- այսօր խորհրդարանում լրագրողներին ասաց Արդարադատության նախարար Ռուստամ Բադասյանը՝ անդրադառնալով այն տեղեկություններին, թե ՍԴ-ն ու Վճռաբեկ դատարանները միավորելու ու Գերագույն դատարան ստեղծելու որոշման նպատակը Հրայր Թովմասյանին համակարգից հեռացնելն է։
«Դա գաղափարական որոշում է, դա սահմանադրականության ոգին դատական համակարգ բերելու խնդիր է լուծում։ Եվ դա ինստիտուցիոնալ ու հեռուն գնացող խնդիր է, որը արվում է ՀՀ քաղաքացիների համար՝ դատական համակարգում փոփոխությունների շարքը շարունակելու միտումով։ Սա լուծում է ռազմավարական խնդիրներ, և անլուրջ եմ համարում նման փաստարկների մասին անգամ մտածելը», ասաց նա։
Նախարարը հավելեց՝ պլանավորվում է, որ հոկտեմբերին արդեն կլինի հայեցակարգ, որը կներկայացվի հանրային քննարկման։
