Ռուսաստանի արտաքին հետախուզական ծառայության (ԱՀԾ) տնօրեն Սերգեյ Նարիշկինը մտահոգված է Լեռնային Ղարաբաղում զինված հակամարտության համատեքստում Կովկասը ահաբեկչական կազմակերպությունների անդամների ցատկահարթակ դարձնելու հնարավորությունից: Այս մասին ասվում է ԱՀԾ-ի ղեկավարի հայտարարության մեջ, որը հրապարակել է ТАСС-ը։
«Ղարաբաղում զինված առճակատման բռնկումը մագնիսի պես ներգրավում է տարբեր տեսակի միջազգային ահաբեկչական կառույցների զինյալների»,- ընդգծեց Նարիշկինը:
«Մեզ չի կարող չմտահոգել այն, որ Անդրկովկասը կարող է դառնալ միջազգային ահաբեկչական կազմակերպությունների նոր կենտրոն, որտեղից գրոհայինները հետագայում կարող են ներթափանցել Ադրբեջանին և Հայաստանին հարող պետություններ, այդ թվում նաև Ռուսաստան», – շեշտեց նա:
ԱՀԾ-ի նախագահը հայտարարել է, որ ըստ ԱՀԾ-ում առկա տեղեկատվության՝ Մերձավոր Արևելքում կռվող միջազգային ահաբեկչական կազմակերպությունների վարձկանները, ինչպիսիք են «Ջեհբաթ ան-Նուսրան» (արգելված է Ռուսաստանի Դաշնությունում), «Ֆիրկատ ալ-Համզան», «Սուլթան Մուրադը», ինչպես նաև քրդական ծայրահեղական խմբավորումները, ակտիվ ընդգրկվում են կոնֆլիկտի մեջ։
Նա շեշտեց, որ խոսքը հարյուրավոր և նույնիսկ հազարավոր արմատականների մասին է, որոնք հույս ունեն գումար աշխատել ղարաբաղյան նոր պատերազմում։
Թարգմանությունը՝ Վաղինակ Ասատրյանի
