shantnews.am: Լեռնային Ղարաբաղի կարգավիճակի որոշման հարցը զգայուն է հակամարտության կողմերի համար, դրա լուծման ժամկետ չկա: ТАСС-ի փոխանցմամբ՝ այդ մասին չորեքշաբթի լրագրողներին հայտարարել է Ռուսաստանի փոխարտգործնախարար Անդրեյ Ռուդենկոն:
«Ժամկետներ չկան: Այս հարցը բավականին զգայուն է»,- ասել է դիվանագետը:
«Մենք ակնկալում ենք, որ դա չի հանգեցնի նոր կոնֆլիկտների, առավել ևս՝ արյունահեղության: Այնուամենայնիվ, մնում է էական դեր Մինսկի խմբի համար, որը կլուծի այն խնդիրները, որոնք արտացոլված չեն եռակողմ համաձայնագրում»,- պատասխանել է նա Ադրբեջանի նախագահ Իլհամ Ալիևի հայտարարությունների վերաբերյալ հարցին, թե Լեռնային Ղարաբաղի հատուկ կարգավիճակի հարցը չի քննարկվելու:
Ռուդենկոն հավելել է, որ Լեռնային Ղարաբաղում ռուսական խաղաղապահ զորախմբի թվաքանակի ավելացման հարց չի քննարկվում:
«Ռուս խաղաղապահների թիվը հստակ սահմանված է երեք նախագահների հայտարարության մեջ: Մենք ելնում ենք այնտեղ գրվածից: Նման հարց չկա»,- ասել է նա:
Մոսկվան ակնկալում է, որ Հայաստանում իրավիճակը չի ազդի Ռուսաստանի Դաշնության, Ադրբեջանի և Հայաստանի ղեկավարների միջև համաձայնությունների կատարման վրա, նշել է Ռուդենկոն:
«Մենք չենք մեկնաբանում այլ երկրների ներքին իրավիճակը. դա նրանց ներքին գործն է: Հուսով ենք, որ հայաստանյան իրադարձությունները չեն հանգեցնի իրավիճակի ապակայունացման, ինչը, իմիջիայլոց, կարտացոլվի երեք առաջնորդների ստորագրված հայտարարության ճակատագրի վրա»,- ասել է նա։
