hetq.am: Վարձկանության և պատերազմական այլ հանցագործություններ կատարելու մեջ մեղադրվող, ազգությամբ արաբ, Սիրիայի Արաբական Հանրապետության քաղաքացիներ Մուհռռաբ Մուհամմադ ալ-Շխերին և Յուսեֆ Ալաբեթ ալ-Հաջին ձերբակալվելուց և կալանավորվելուց հետո բուժում են ստացել, այժմ բժիշկների հսկողության ներքո են։ Նրանց պաշտպան Էդուարդ Աղաջանյանը հարցում է կատարել բժշկական կենտրոն ու ստացել այս պատասխանը։ Սիրիացիներն այժմ կալանավայրում են, պաշտպանն ասում է՝ որևէ դժգոհություն չեն հայտնում։
Էդուարդ Աղաջանյանը ասաց, որ դատարանը երկրորդ անգամ բավարարել է մեղադրյալների խափանման միջոց կալանավորումը երկարացնելու վերաբերյալ միջնորդությունները։ Հատկանշական է, որ այս անգամ վարույթն իրականացնող մարմինը միջնորդել է ոչ թե երկու, այլ մեկ ամսով երկարացնել սիրիացիների խափանման միջոց կալանավորումը։ Մարտ ամսվա վերջին և ապրիլի սկզբին կլրանա նաև այս ժամկետը։
