Միավորված ազգերի կազմակերպությունում (ՄԱԿ) Միացյալ Նահանգների ներկայացուցիչ Լինդա Թոմաս-Գրինֆիլդը, ելույթ ունենալով ՄԱԿ Անվտանգության խորհրդի նիստում, Ռուսաստանին կոչ է արել զորքերը դուրս հանել Ուկրաինայից։ Այս մասին տեղեկանում ենք ՄԱԿ-ում ԱՄՆ ներկայացուցչության պաշտոնական կայքից։
«ԱՀԿ Գլխավոր տնօրենից լսեցինք, որ Ռուսաստանի կողմից հարձակման է ենթարկվել 43 հիվանդանոց և առողջապահական հաստատություն: AP-ի լրագրողներն աշխարհին ցույց տվեցին Մարիուպոլում գտնվող զանգվածային գերեզմանը՝ փոքրիկ խրամատ՝ լցված երեխաների մարմիններով»,- ասել է նա:
ՄԱԿ-ում ԱՄՆ ներկայացուցչի խոսքով՝ ռուսական կողմի նետած ռումբը հարվածել է Մարիուպոլի թատրոնին, որտեղ հարյուրավոր խաղաղ բնակիչներ են թաքնված եղել։
«Թատրոնի դրսի հատվածում՝ և՛ դիմացից, և՛ հետևից ռուսերեն մեծ, սպիտակ տառերով գրված է եղել «երեխաներ» բառը, որը կարելի էր տեսնել երկնքից: Ռուսական ուժերն, այնուամենայնիվ, ռմբակոծեցին այն»,- ասել է Թոմաս-Գրինֆիլդը։
Նա նշել է, որ ԱՄՆ-ն շարունակելու է մարդասիրական օգնություն տրամադրել Ուկրաինային։
«Մենք կարծում ենք, որ ՄԱԿ-ում հումանիտար ճգնաժամը լուծելու լավագույն միջոցը ՄԱԿ Գլխավոր ասամբլեայի բանաձևն է: Գլխավոր ասամբլեայի բանաձևը կարտացոլի ՄԱԿ անդամ երկրների ճնշող մեծամասնության և հենց Ուկրաինայի տեսակետները»,- ասել է ԱՄՆ ներկայացուցիչը։
