lragir.am։ «Մենք ընդհանուր քննարկել ենք ՀՀ-ում հետագայում դատաիրավական բարեփոխումներ իրականացնելու հետ կապված հեռանկարները, փորձել ենք հասկանալ, թե ինչ խնդիրներ ունենք, ինչպես պետք է դրանք լուծենք»,- կառավարությունում անցկացված խորհրդակցությունից հետո լրագրողներին ասաց ԱԺ Պետաիրավական հարցերի մշտական հանձնաժողովի նախագահ Վլադիմիր Վարդանյանը:
Նա նշեց՝ այն, որ դատաիրավական համակարգում խնդիրներ ունենք, ընդունում են բոլորը, այդ թվում՝ համակարգի ներկայացուցիչները: Դատական իշխանությունը պետք է համարժեք քայլի երկրում ընթացող ժողովրդավարական զարգացումների հետ:
Լրագրողները հետաքրքրվեցին, թե ինչ ժամկետներում ու ինչ մեխանիզմներով են կյանքի կոչվելու այն հեղափոխական փոփոխությունները, որոնց մասին վարչապետը խոսեց իր ելույթում:
«Մեխանիզմների, առանձնահատկությունների, գործիքակազմի հետ կապված, ինձ թվում է, հաջորդիվ կտեղեկացվի: Ժամկետների մասին այս պահի դրությամբ ոչինչ չեմ կարող ասել: Անցումային արդարադատության հարցով ամսի 24-ին կազմակերպվելու են հանրային լսումներ»,- պատասխանեց Վարդանյանը:
Անդրադառնալով դատարանների մուտքերը շրջափակելու ակցիային, նա ասաց, որ դա ուղղված չէ դատարանների դեմ, գործընթացն ուղղված է ցանկացած արտաքին միջամտության դեմ, որն իրականացվում է:
