«IDS Borjomi Georgia» ընկերությունն այսօրվանից կասեցնում է իր աշխատանքը Վրաստանի Բորժոմի քաղաքի իր երկու գործարաններում, հայտնում է 1tv.ge-ն՝ վկայակոչելով ընկերության տարածած հայտարարությունը։
Որպես ստեղծված իրավիճակի հիմնական պատճառ նշվում են ֆինանսական դժվարությունները, որոնք սկսվել են Ուկրաինայում ռազմական գործողությունների պատճառով։
«Բարդ իրավիճակը, որը ստեղծվել է ընկերության արտադրանքի իրացման հիմնական շուկաներում, վատթարացել է բանկային հաշիվների սահմանափակ հասանելիության պատճառով, ինչն ընկերության համար փակում էր արտարժութային եկամտի ստացման ու վարկատուներին վճարելու հնարավորությունը», -ասված է հայտարարությունում։
Ընկերությունը հույս ունի, որ մոտ ապագայում իրավիճակը կբարելավվի, և հնարավոր կլինի աշխատանքի վերադառնալ։
Մինչև վերջերս «Բորժոմի» հանքային ջրի միակ արտադրողը «IDS Borjomi Georgia» ընկերությունն էր, որը մտնում է «IDS Borjomi International»-ի կազմի մեջ, իսկ այն պատկանում է ռուսական «Ալֆա գրուպ» կառույցին։
«Բորժոմի» արտադրանքը պատկանում է ռուսաստանցի ձեռնարկատեր, «Ալֆա բանկի» հիմնադիր Միխայիլ Ֆրիդմանին, որի նկատմամբ Արևմուտքը պատժամիջոցներ է կիրառել Ուկրաինայում սկսված պատերազմի պատճառով։
Նորա Վանյան
