armtimes.com: Երեկ Գեղարքունիքի մարզպետ Գնել Սանոսյանի որոշմամբ դադարեցվել են Վանեւանի համայնքապետ Նորայր Հարությունյանի լիազորությունները: Մարզպետի որոշմամբ՝ Արամ Հարությունյանը նշանակվել է համայնքապետի ժամանակավոր պաշտոնակատար:
Գեղարքունիքի մարզպետի օգնական Նարեկ Մանուկյանը «Հայկական ժամանակի»-ի հետ զրույցում ասաց. «Դադարեցվել են Վանեւանի համայնքապետ Նորայր Հարությունյանի լիազորությունները, քանի որ ՏԻՄ 7-րդ կետի որոշման համաձայն, եթե համայնքի նորանշանակ ղեկավարը 6 ամսվա ընթացքում ավագանու նիստ չի հրավիրել, ապա ավագանին իրավունք ունի անվստահություն հայտնել և պահանջել համայքապետի հրաժարականը: Գյուղացինների և ավագանու անդամների բողոքն էլ հիմնականում ծավալվել էր համայնքապետի անգործության և պաշտոնական լիազորությունները պատշաճ չկատարելու շուրջ»- ասաց մարզպետի օգնականը:
Մանուկյանի խոսքով` գյուղացիների պահանջը բավարարվել է և Ատոմ Մկրտչյանը դադարեցրել է հացադուլը:
Վանեւանի ավագանու անդամ Գոհար Գալստյանի խոսքով` իրենց պահանջը, կարելի է ասել, ամբողջությամբ բավարարվել է, և ըստ այդմ` այսօր հացադուլ անող գյուղացի Ատոմ Մկրտչյանը դադարեցրել է իր հացադուլը.
«Երեկ է մարզպետը հայտարարել, որ գյուղապետի լիազորությունները դադարեցվել են, սակայն Ատոմ Մկրտչյանը չդադարեցրեց հացադուլը: Այսօր պաշտոնական հայտարարությունից հետո նոր Մկրտչյանը դադարեցրել է հացադուլը և գնացել է տուն»,- ասաց գյուղապետի հրաժարականը պահանջող ավագանու անդամ Գ. Գալստյանը:
Հիշեցնենք, որ Վանեւան գյուղի բնակիչ Ատոմ Մկրտչյանը ապրիլի 11-ից հայտարարել էր հացադուլ` պահանջելով գյուղապետի հրաժարականը: Նույն պահանջով գյուղի բնակիչները և ավագանու անդամները անընդմեջ բողոքի ակցիաներ էին անում:
