azatutyun.am: Կիևն այսօր խոցվել է կամիկաձե անօդաչու թռչող սարքերով, Տելեգրամում գրել է Ուկրաինայի նախագահի աշխատակազմի ղեկավար Անդրեյ Երմակը։
«Ռուսները կարծում են, որ դա իրենց կօգնի»,- հավելել է Երմակը։
Երկուշաբթի առավոտյան Կիևի կենտրոնում տեղի ունեցած պայթյունների թիվը հասել է չորսի, հայտարարել է Կիևի քաղաքապետ Վիտալի Կլիչկոն։
«Եվս երկու պայթյուն Շևչենկոյի շրջանում»,- գրել է նա Telegram-ի իր ալիքում։
Այսօր ավելի վաղ Կլիչկոն արդեն հայտնել էր երկու պայթյունի մասին Շևչենկոյի շրջանում, որը գտնվում է քաղաքի կենտրոնում։
Կլիչկոն նաև գրել է, որ անօդաչուների հարձակման հետևանքով հրդեհ է բռնկվել Կիևի Շեւչենկո թաղամասի ոչ բնակելի շենքում։ Հրշեջներն աշխատում են։ Վնասվել են մի քանի բնակելի շենքեր։ Բժիշկները տեղում են։ Տուժածների մասին տեղեկությունը ճշտում են, տեղեկացրել է նա:
Կիևում պայթյունների մասին տեղի իշխանությունները հաղորդել էին նաև հոկտեմբերի 9-ին։ Ռուսական կողմից ուկրաինական քաղաքների հրթիռակոծության հետևանքով, նախնական տվյալներով, զոհվել է 19 մարդ, ևս 105-ը վիրավորվել է։
