Նիկոլ Փաշինյանը Կառավարության նիստի սկզբում Լաչինի միջանցքում ստեղծված իրավիճակին անդրադարձի ժամանակ նշեց, որ ՀՀ դիվանագիտական ծառայությունը, բոլոր գերատեսչությունների արտաքին կապերով զբաղվող ստորաբաժանումները, խորհրդարանական դիվանագիտությունը, կառավարող ուժը, ընդդիմությունը, ՀԿ-ները, սփյուռքի ներկայացուցիչները, արտաքին կապեր ունեցող ֆիզիկական և իրավաբանական անձինք, սոցիալական ցանցերի օգտատերերը պետք է իրենց լուման ներդնեն այս գործում՝ ի ցույց դնելու համար, որ Ադրբեջանի կողմից 2020թ․-ի նոյեմբերի 9-ի եռակողմ հայտարարության խախտումները նախ և առաջ Լեռնային Ղարաբաղին ցեղասպանության կամ հայրենազրկման ենթարկելու նպատակ ունեն․ «Ադրբեջանը շարունակաբար իրագործում է ԼՂ-ն առանց հայերի քաղաքականություն, և մենք ամեն ինչ պետք է անենք, որ այս քաղաքականությունը պատշաճ միջազգային գնահատականի արժանանա»։
Վարչապետը հավելեց, որ լիարժեք պաշտպանում է ՀՀ ԱԺ-ի կողմից երեկ ընդունված հայտարարությունը, որում փաստվում է, որ ստեղծված իրավիճակում ծայրահեղ անհրաժեշտ է ԼՂ հայության իրավունքների և անվտանգության ապահովման միջազգային մեխանիզմների գործարկումը կամ վերագործարկումը։ Նա դիվանագիտական ծառայությանը, ԱԳՆ-ին հանձնարարեց այս ուղերձը արդյունավետ կերպով հասցնել հասցեատերերին։
«Մշտական կապի մեջ եմ ԼՂ նախագահի հետ, իրադարձությունների զարգացումները և հնարավոր հանգուցալուծումները քննարկելու նպատակով»,- ասաց նա։
