armenpress.am Ռուսաստանը հուսով է, որ Ադրբեջանի ղեկավարությունն ըմբռնումով կմոտենա Ադրբեջանում ձերբակալված Ռուսաստանի 13 քաղաքացիների շուրջ ստեղծված իրադրությանը, և նրանք շուտով կլինեն հայրենիքում: Այս մասին լրագրողներին հայտնել է ՌԴ փոխվարչապետ Ալեքսեյ Օվերչուկն Արևելյան տնտեսական համաժողովի շրջանակներում:
«Ադրբեջանի հետ առաջին հերթին, անշուշտ, մեզ անհանգստացնում է այն հանգամանքը, որ մեր 13 քաղաքացիները գտնվում են Ադրբեջանում, պահվում են այնտեղ: Եվ մենք հույս ունենք, որ այդ մարդիկ շուտով կլինեն հայրենիքում: Եվ այս պարագայում հույս ունենք, որ Ադրբեջանի ղեկավարությունն ըմբռնումով կվերաբերվի, որպեսզի այդ մարդկանց թողնի տուն», – նրա խոսքերն է փոխանցում ՏԱՍՍ-ը:
Մոսկվայի և Բաքվի միջև հարաբերությունները սրվել են այն բանից հետո, երբ Ռուսաստանի իրավապահները գործողություններ էին իրականացրել Եկատերինբուրգում՝ ձերբակալելով մի քանի ադրբեջանցիների, որոնք կասկածվում էին նախկին տարիներին տեղի ունեցած մի շարք սպանությունների մեջ: Ձերբակալված ադրբեջանցիներից երկուսը մահացել էին։
Ադրբեջանը դատապարտել էր տեղի ունեցածը՝ դա անվանելով սպանություն, և բողոք էր հայտնել ՌԴ անվտանգության ուժերի գործողությունների դեմ։ Դրանից հետո Բաքվում կալանավորվել էին «Sputnik Ադրբեջան» գործակալության ղեկավարը և գլխավոր խմբագիրը։ Լրատվամիջոցի աշխատակիցները մեղադրվում են մեքենայության, անօրինական ձեռնարկատիրության համար։ Բացի այդ, կալանավորվել են ՌԴ մի շարք այլ քաղաքացիներ, որոնք մեղադրվում են Իրանից թմրանյութերի մաքսանենգության և կիբերհանցագործությունների համար։
