armenpress.am Հայաստանի ազգային ժողովի ընդդիմադիր «Հայաստան» խմբակցության ղեկավար Սեյրան Օհանյանն իր դժգոհությունը հայտնեց գործող իշխանության՝ Ադրբեջանի հետ վարած բանակցությունների առնչությամբ:
Օհանյանը նման դիրքորոշում հայտնեց խորհրդարանական ճեպազրույցում:
«Խաղաղության գործընթացները, որի մասին խոսում է այսօրվա իշխանությունը, իրատեսական չեն»,- ասաց Օհանյանը՝ տեսակետ հայտնելով, թե ստորագրված փաստաթղթերը պարունակում են սպառնալիքներ:
Ըստ նրա՝ պետք է բանակցողների փոփոխություն կատարվի:
Անդրադառնալով հարցին՝ եթե իրենք իշխանության գան, սեղանին եղած փաստաթղթի հետ ինչպե՞ս են վարվելու՝ ընդդիմադիր խմբակցության ղեկավարն ասաց.
«Ցանկացած նոր ուժ, որը կարող է գալ իշխանության, իսկ այդպիսի հնարավորություն կարող են ունենալ բազմաթիվ ուժեր, իր համար առաջնային խնդիր պետք է սահմանի բանակի ներքին ամրության ձևավորումը: Մյուս քայլերից մեկը, եթե այդ ամրությունը կա, մեր շահերից բխող վերաբանակցություններ իրականացնելն է, կետ առ կետ անցնելն ու ամեն կետում եզրակացություն անելը, թե մեր շահերը որոնք են»:
