Ինչպես ավելի վաղ հայտնել ենք, սեպտեմբերի 11-ին ՀՀ կառավարության որոշմամբ փոփոխություններ են կատարվել պետական սահմանը հատելու վերաբերյալ անձնագրերում կամ դրանց փոխարինող փաստաթղթերում արվող նշումներում, մասնավորապես՝ փոփոխվել են կնիքի չափսերը, և հանվել է պատկերված Արարատ լեռը:
Civilnet.am-ը գրում է, որ նույն օրը՝ սեպտեմբերի 11-ին վարչապետ Նիկոլ Փաշինյանը հանրային քննարկման է ներկայացրել ՔՊ-ի նոր կանոնադրության նախագիծը։ Հին կանոնադրության մեջ կար ձևակերպում՝ «Ձեռքսեղմման պատկերի ուրվագիծը նմանվում է Արարատ լեռան ուրվագծին»։ ՔՊ-ն, սակայն, 2022 հոկտեմբերին ներկայացրել էր նոր խմբագրությամբ կանոնադրություն, որի տեքստում արդեն իսկ բացակայում էր «Արարատ լեռը», ձեռքսեղմում խորհրդանիշն այլ կերպ էր բացատրվում։
Նոր կանոնադրության փոփոխությունը նախատեսվում է վերջնականապես հաստատել սեպտեմբերի 20-ին՝ Կարեն Դեմիրճյանի անվան մարզահամերգային համալիրում կայանալիք ՔՊ հերթական համաժողովի ընթացքում։ Այդտեղ ևս չկա նախկինում հեռացված ձևակերպումը լեռան մասին։
