iravaban.net e-draft հարթակում հանրային քննարկման են ներկայացվել երկու օրենքների նախագծեր․
- «Առևտրի և ծառայությունների մասին» ՀՀ օրենքում լրացումներ և փոփոխություն կատարելու մասին,
- «Վարչական իրավախախտումների վերաբերյալ» ՀՀ օրենսգրքում լրացումներ կատարելու մասին։
Նախագծերով առաջարկվում է սահմանել․
- «Ավելացված շաքարով սննդամթերք» հասկացությունը՝ որպես այնպիսի սննդամթերք, որոնց բաղադրության առավել մեծ մասնաբաժին ունեցող երեք բաղադրիչներից մեկը շաքար է կամ որոնց բաղադրության մեջ առկա է քաղցրացուցիչ (բացառությամբ դիետիկ բուժիչ և դիետիկ կանխարգելիչ սննդի համար նախատեսված հատուկ նշանակության սննդամթերքի),
- Արգելել այդպիսի սննդամթերքի վաճառքը մանկապարտեզներում, դպրոցներում և մանկապատանեկան սպորտային կազմակերպություններում գործող առևտրի օբյեկտներում։
Միևնույն ժամանակ առաջարկվում է սահմանել նաև վարչական պատասխանատվություն․
- Արգելքի խախտման դեպքում վաճառողը կպատժվի նվազագույն աշխատավարձի հիսնապատիկի չափով տուգանքով,
- Նույն արարքը մեկ տարվա ընթացքում կրկին կատարելու դեպքում՝ տուգանքը կկազմի նվազագույն աշխատավարձի հարյուրապատիկը։
Նախագծերը նախատեսում են ուժի մեջ մտնել պաշտոնական հրապարակումից վեց ամիս անց։
