tert.am: Վենեսուելայի դատախազությունը երկրի ընդդիմության՝ զինվորականների խմբերի աջակցությամբ պետական հեղաշրջում իրականացնելու փորձի առնչությամբ հետաքննություն է սկսել, գրում է El Norte պարբերականը՝ երկրի նախագահ Նիկոլաս Մադուրոյին հղումով:
«Ես խոսել եմ հանրապետության գլխավոր դատախազի հետ: Նա 3 դատախազ է նշանակել, որոնք արդեն վարում են հետաքննությունը»,- ասել է Մադուրոն:
Նրա խոսքով՝ դատախազները հարցաքննում են երեկ մայրաքաղաք Կարակասի՝ Ֆրանսիսկո Միրանդայի անվան ռազմաբազայի մոտ տեղի ունեցած դեպքերի մասնակիցներին: Մադուրոն հավելել է, որ երկրի ընդդիմադիր «Ազգային կամք» կուսակցության առաջնորդ Լեոպոլդո Լոպեսը, որը փախել էր տնային կալանքից, հեղաշրջման նոր փորձի ղեկավարն է եղել:
