Ըստ Էստոնիայի արտաքին գործերի նախարարության՝ ռուսական երեք MiG-31 տիպի ինքնաթիռ առանց թույլտվության մուտք են գործել իրենց երկրի օդային տարածք։ Այս մասին հաղորդում է CNN լրատվամիջոցը։
Էստոնական կողմի հաղորդմամբ՝ ինքնաթիռները թռել են Ֆինլանդական ծոցի հատվածում և Էստոնիայի օդային տարածքում մնացել մոտ 12 րոպե։ ՆԱՏՕ-ի «Eastern Sentry» գործողության շրջանակում Էստոնիայում տեղակայված իտալական F-35 կործանիչները, ինչպես նաև շվեդական ու ֆիննական օդուժը բարձրացել են օդ՝ արձագանքելու ռուսական ինքնաթիռներին։
Էստոնիայի վարչապետ Քրիսեն Միխալը նշել է, որ ռուսական ինքնաթիռները «հարկադրված փախուստի են դիմել»։ ՆԱՏՕ-ի գլխավոր քարտուղար Մարկ Ռյուտտեն դաշինքի արձագանքը գնահատել է որպես «արագ և վճռական»։
Ռուսաստանի պաշտպանության նախարարությունը հերքել է մեղադրանքները՝ հայտարարելով, որ ինքնաթիռները թռիչք են իրականացրել Բալթիկ ծովի չեզոք ջրերի վրայով՝ Կարելիայից դեպի Կալինինգրադ, և չեն խախտել որևէ երկրի սահման։
Էստոնիան հայտարարել է, որ միջադեպի կապակցությամբ կդիմի ՆԱՏՕ-ի Հոդված 4-ի խորհրդակցությանը։ Դաշինքի խոսնակ Ալիսոն Հարթի խոսքով՝ Հյուսիսատլանտյան խորհուրդը կհավաքվի առաջիկա շաբաթվա սկզբին։
Հոդված 4-ը նախատեսում է, որ դաշինքի ցանկացած անդամ կարող է խորհրդակցություն հրավիրել, եթե վտանգված է իր տարածքային ամբողջականությունը, անկախությունը կամ անվտանգությունը։ Նման խորհրդակցություն օրեր առաջ նախաձեռնել էր նաև Լեհաստանը՝ իր օդային տարածք ռուսական անօդաչուների ու կործանիչների մուտք գործելուց հետո։
Էստոնիայի ԱԳՆ-ն հաղորդել է, որ այս հարցով երկրի ԱԳՆ է կանչվել Ռուսաստանի գործերի ժամանակավոր հավատարմատարին։
