Թբիլիսիում Միացյալ Նահանգների դեսպանատունը քննադատել է Վրաստանի խորհրդարանի կողմից «օտարերկրյա գործակալների» մասին օրինագծի առաջին ընթերցմամբ ընդունումը։
«Այսօր մութ օր է Վրաստանի ժողովրդավարության համար»,- ասվում է դեսպանատան երեքշաբթի երեկոյան տարածած հաղորդագրության մեջ։
Հայտարարության մեջ ասվում է, որ օտարերկրյա գործակալների մասին օրինագծերի քննարկման շարունակությունը հակասում է Եվրոպային ինտեգրվելու և ժողովրդավարական զարգացման Վրաստանի ձգտումներին։
Այդ օրինագծերի ընդունումը կվնասի Վրաստանի հարաբերություններին իր ռազմավարական գործընկերների հետ և կխաթարի այն կարևոր աշխատանքը, որը շատ վրացական կազմակերպություններ անում են իրենց հայրենակիցներին օգնելու համար, ասվում է հայտարարության մեջ։
Օտարերկրյա գործակալների մասին երկու օրինագծերը քննարկվում են Վրաստանի խորհրդարանում, իսկ Թբիլիսիի Ռուսթավելի պողոտայում գտնվող խորհրդարանի շենքի մոտ ընդդիմության ակցիաներ են ընթանում։
Վրաստանի ՆԳՆ-ն երեքշաբթի երեկոյան հայտարարություն է տարածել՝ կոչ անելով բողոքի ակցիայի կազմակերպիչներին և ընդդիմության առաջնորդներին զերծ մնալ բռնության կոչերից և ապահովել, որ բողոքի ակցիան չդառնա բռնի։
