Երևանի քաղաքապետարանից հայտնում են, որ այսօրվանից մեկնարկել է կենսունակության ավարտին մոտ գտնվող, կենսունակությունը կորցրած, դեֆորմացված ծառերի փոխարինումը՝ առավել արժեքավոր և գեղատեսիլ ծառերով:
Քաղաքացիները սոցիալական ցանցերում ծառերի հատման գործընթացից լուսանկարներ էին հրապարակել՝ այսպիսով բողոքելով քաղաքապետարանի իրականացրած աշխատանքներից։ Օգտատերերից ոմանք իրենց հրապարակած լուսանկարներից կից նշել էին, որ որոշ ծառեր «առողջ են»։
Քաղաքապետարանից նշում են, որ հաշվի առնելով Երևանում մեկնարկած ծառերի փոխարինման գործընթացի նկատմամբ հանրային անհանգստությունը՝ «Կանաչապատում և շրջակա միջավայրի պահպանություն» ՀՈԱԿ-ի տնօրեն Արմեն Բեգոյանը Կասկադի տարածքում է՝ հետևելու գործընթացին և պատասխանելու քաղաքացիներին հուզող բոլոր հարցերին:
