ՊՎԾ-ն ուսումնասիրություն է իրականացրել ՀՊՄՀ հիմնադրամի կողմից 2016-2019 թթ․ իրականացված 705 մլն․ դրամի գնումների, հաշվարկված աշխատավարձի, Հիմնադրամի և պետական սեփականություն հանդիսացող գույքի կառավարման գործընթացները: Խախտումներ են արձանագրվել 315 մլն. դրամ ծավալով գնումների գործընթացներում: Ուսումնասիրության արդյունքում կազմված տեղեկանքն ուղարկվել է դատախազություն՝ հանցագործության առկայության հանգամանքը ստուգելու նպատակով:
Պաշտպանության նախարարի տեղակալ Գաբրիել Բալայանը, անդրադառնալով պատգամավոր Հայկ Սարգսյանի օրենսդրական նախաձեռնությանը, նշեց, որ արագացված ընթացակարգով զինծառայությունը Հայաստանի համար չէ։ Հարցին՝ պատգամավորի հետ խոսե՞լ է այս հարցով, փոխնախարարը պատասխանեց՝ մի քանի անգամ՝ և գրավոր, և բանավոր։ Հարցն այսօր պետք է քննարկվեր ԱԺ պաշտպանության և անվտանգության հարցերի մշտական հանձնաժողովի նիստում, բայց այդպես էլ չքննարկվեց, քանի որ Սարգսյնաը չէր ներկայացել։ |aysor.am|
ՔՊ վարչության նախագահ, ՏԿԵ նախարար Սուրեն Պապիկյանն իր անձնական տվյալների հրապարակման վերաբերյալ ՀՔԾ-ում հարուցված քրեական գործի շրջանակում ճանաչվել է տուժող: [ՀՔԾ մամուլի խոսնակ Մարինա Օհանջանյան] |armtimes.com|
Աշխատանքի և սոցիալական հարցերի նախարարի խորհրդականի պաշտոնում այսօր իմ վերջին աշխատանքային օրն է: Աշխատանքից ազատվել եմ իմ դիմումի համաձայն: Որպես խորհրդական իմ աշխատանքային տարածքը և ազդեցությունը շատ սահմանափակ էր, իսկ ավելին անելու հնարավորություն չտրվեց: Որոշումը կայացրել եմ անցյալ տարվա նոյեմբերին, սակայն մի քանի ամիս պահանջվեց կիսատ աշխատանքներս ավարտելու համար: Շնորհակալություն եմ հայտնում նախարար Բաթոյանին և գործընկերներին վստահության և արդյունավետ համագործակցության համար: [Օլյա Ազատյան]
Արա Բաբլոյանի եւ Արսեն Բաբայանի վերաբերյալ քրեական գործը ՀՔԾ-ից 3-րդ անգամ ուղարկվել է Դատախազություն: Դատախազությունը քրեական գործը ստացել է երեկ։ 2019-ի դեկտեմբերին ՀՔԾ-ն տեղեկացրել էր, որ գործով նախաքննությունն ավարտվել է եu ուղարկվել Դատախազություն: Օրեր անց Դատախազությունը հայտնել էր, որ նախաքննության օրինականության նկատմամբ հսկողություն իրականացնող դատախազը որոշել է մեղադրական եզրակացությունը չհաստատել և քրեական գործը վերադարձնել ՀՔԾ՝ լրացուցիչ քննություն կատարելու համար: Փետրվարի 5-ին ՀՔԾ-ն 2-րդ անգամ էր հայտարարել նախաքննության ավարտ եւ գործն ուղարկել Դատախազություն: |armtimes.com|
Գլխավոր դատախազ Ա․ Դավթյանը վերաքննիչ և վճռաբեկ բողոքներ է ներկայացրել Իսահակ Մալխասյանի և Կարեն Թարխանյանի վերաբերյալ 2008թ. կայացված մեղադրական դատավճիռների դեմ: Դատախազությունը պարզել է, որ այս գործերով մեղադրական ակտ կայացնելիս դատարանները արդարադատության բուն էությունը խախտել են: Մալխասյանի մեղադրանքը զուրկ է եղել կոնկրետ հանցավոր արարքների նկարագրություններից, տուժող ճանաչված անձ չկա: Թարխանյանի մեղադրանքը հիմնավորելիս դատարանը ծանրակշիռ դեր է հատկացրել դեպքից տևական ժամանակ անց ոստիկանության աշխատակիցների իրարամերժ ցուցմունքներին:
ՌԴ ՊՆ-ն հայտարարել է, որ Սիրիայի Իդլիբ նահանգում կառավարական ուժերի գնդակոծման տակ հայտնված թուրք զինվորները չպետք Է այնտեղ գտնվեին: Փետրվարի 27-ին «Հայաթ Թահրիր աշ Շամ» ահաբեկչական խմբավորման զինյալները սիրիական բանակի դիրքերի վրա հարձակման փորձ են ձեռնարկել։ Սիրիական զորքերը պատասխան հարված են հասցրել, որին ենթարկվել են նաեւ «ահաբեկչական կազմավորումների մարտական շարքերում գտնվող» թուրք զինծառայողները: Թուրքական կողմի տվյալներով այդ շրջանում թուրքական բանակի ոչ մի ստորաբաժանում չկար եւ չպետք Է լիներ։ |armenpress.am|
Թուրքիայի Հաթայ նահանգի նահանգապետ Ռահմի Դողանը հայտարարել է, որ Սիրիայի կառավարական ուժերի օդային հարվածների հետևանքով թուրքական զինված ուժերը 33 զոհ և 32 վիրավոր ունի, վիրավոր և հոսպիտալացված զինծառայողների կյանքին վտանգ չի սպառնում: Նահանգապետի խոսքով` Սիրիայի կառավարական ուժերի կողմից կրկին խախտվում են Սոչիի համաձայնագրով հաստատված «անվտանգության գոտու» սահմանները: Երեկ երեկոյան թուրքական բանակը սկսել է ցամաքային և օդային հարվածներ հասցնել սիրիական բանակի դիրքերի ուղղությամբ: Իրավիճակն Իդլիբում շարունակում է ծայրահեղ լարված մնալ: |tert.am|
Հիշելով ավելի քան 30 տարի առաջ տեղի ունեցած ողբերգական դեպքերը և ոգեկոչելով զոհ գնացած մեր հայրենակիցներին, Հայաստանում և Արցախում փետրվարի 28-ը հռչակելով Ադրբեջանական ԽՍՀ-ում կազմակերպված ջարդերի զոհերի հիշատակի և բռնագաղթված հայ բնակչության իրավունքների պաշտպանության օր՝ մենք նաև ուղերձ ենք հղում մարդկությանը՝ քաղաքակրթությունը չի կարող զարգանալ ֆաշիզմի, ազգային խտրականության և այլատյացության ճանապարհով: [Արմեն Սարգսյանի ուղերձը` Ադրբեջանական ԽՍՀ-ում կազմակերպված ջարդերի զոհերի հիշատակի օրվա առթիվ]
Այսօր միանգամից 2 կեղծ լուր շրջանառվեց հավանական կորոնավիրուսով վարակված պացիենտների վերաբերյալ, որոնք տարածվեցին կայծակնային արագությամբ։ Տեղեկացնում եմ, որ մինչ օրս կատարված լաբորատոր քննությունները, որևէ մեկի մոտ կորոնավիրուս չեն հայտնաբերել, այդ թվում Աստղիկ ԲԿ-ում մահացած մեր քաղաքացու մոտ, որի հարազատներին ցավակցում եմ։ Կոչ եմ անում չհավատալ մտացածին լուրերին և հետևել պաշտոնական լրահոսին։ [Արսեն Թորոսյան]
2017 թ․ մարտի 30-ին 10․000․000 դրամով Երևան քաղաքում գնվել է տուն, որը սակայն 2017 թ․ մայիսի 11-ի որոշմամբ, որպես նվիրատվություն, հանձնվել է ՀՀ ոստիկանությանը: Այնուհետև 2017 թ․ հունիսի 22-ին, ՀՀ ոստիկանության պետի հրամանով, հիշյալ տունը սեփականության իրավունքով հատկացվել է ընդամենը 6 օր ոստիկանության զորքերում ծառայության անցած աշխատակցուհուն։ Պարզվել է, որ նշված ծառայողը, 2017 թ․ հունիսի 16-ից 2018 թ․ սեպտեմբերի 1-ն ընկած ժամանակահատվածում զբաղեցնելով ՀՀ ոստիկանության զորքերի 1031 զորամասի շտաբի նվագախմբի երաժշտի պաշտոնը և այդ պաշտոնի համար վարձատրվելով, երբևէ չի ներկայացել ոստիկանության զորքերում ծառայության, սակայն վարձատրվել է։ Պաշտոնատար անձանց դրսևորած գործողություններում առկա են եղել պաշտոնեական լիազորությունները չարաշահելու առերևույթ հանգամանքներ, ծառայողական քննության նյութերն ուղարկվել են ՀՀ հատուկ քննչական ծառայություն։ [ՀՀ ոստիկանություն]
ՀՀ աշխատանքի և սոցիալական հարցերի նախարարության համակարգում գործող տարեցների և երեխաների խնամքի շուրջօրյա հաստատություններում կարանտին է հայտարարվել: Նպատակը այս եղանակին տարածված սուր շնչառական վարկաներից խուսափելն է: Կարանտին հայտարարվել է վերոնշյալ հաստատություններում, քանի որ վիճակագրության համաձայն՝ տարեցները և երեխաները՝ հատկապես հաշմանդամություն ունեցողները, առավել հակված են տարածված վարակներով հիվանդանալուն: Կարանտինը կշարունակվի երկու շաբաթ: [ՀՀ աշխատանքի և սոցիալական հարցերի նախարարություն]
Մենք չենք պահանջի «Независимая газета»-ից հերքում, քանի որ այն, ինչ կար թերթում, համարում ենք սրբապղծություն, վայրի և քրեորեն պատժելի: Մենք կարծում ենք, որ առաջին հերթին պատասխանատվություն է կրում թերթը, որը համարվում է լիցենզավորված ընկերություն: Այն ունի ԶԼՄ-ի լիցենզիա և փաստացի, մեր իրավաբանների կարծիքով, այնտեղ առկա է ԶԼՄ-ի մասին օրենքի ակնհայտ խախտում: Այդ հրապարակման մեջ առկա է քրեական հոդվածների մեծ փունջ, ինչի հետ կապված ես դիմել եմ գլխավոր դատախազություն:[ ՌԴ-ում ՀՀ դեսպանը՝ «Независимая газета»-ում սումգայիթյան ջարդերի մասին հոդվածի մասին] |armenpress.am|
Առողջապահության նախարարությունից հերքել են «Արմենիա» հանրապետական ԲԿ-ից «Նորք» ինֆեկցիոն կլինիկական հիվանդանոց տեղափոխված քաղաքացու մոտ կորոնավիրուսի առկայության մասին լուրերը։ Նախարարությունից հայտնել են, Հայաստանում այս պահին կորոնավիրուսի որևէ դեպք չկա։ |tert.am|
Վրաստանի պաշտպանության նախարար Իրակլի Ղարիբաշվիլու հետ համատեղ ասուլիսի ընթացքում նախարար Դավիթ Տոնոյանը հայտնել է, որ Հայաստանի և Վրաստանի պաշտպանության նախարարությունների միջև ստորագրվել է 2020 թվականի ռազմական համագործակցության ծրագիր: Ծրագրում ներառված են պաշտպանության բնագավառում միջոցառումներ ռազմական կրթություն, զինծառայողների սոցիալական պաշտպանության, խաղաղապահության և լեռնային պատրաստության ոլորտներում: Ղարիբաշվիլին տեղեկացրել է, որ ՀՀ զինծառայողները մասնակցելու են Վրաստանում նախատեսված ՆԱՏՕ-ի Noble Partner բազմազգ զորավարժություններին: |tert.am|
ԱԺ նախկին պատգամավոր, «ՄԱՊ»-ի Ալիկ անունով հայտնի Ալեքսան Պետրոսյանի ազատ արձակման որոշման դեմ Դատախազության բողոքը մերժվել է: Որոշումը կայացրել է Վերաքննիչ քրեական դատարանի դատավոր Ռուզաննա Բարսեղյանը: Պետրոսյանի պաշտպան Միհրան Պողոսյանը տեղեկացրել է, որ միաժամանակ մերժվել է իր կողմից ներկայացված բողոքը՝ հիմնավոր կասկածի առկայության, ինչպես նաեւ խափանման միջոցի հիմքերի դեմ: Ալեքսան Պետրոսյանը 30 միլիոն դրամ գրավի դիմաց ազատ էր արձակվել հունվարի 10-ին: |armtimes.com|
«Աստղիկ» բժշկական կենտրոնում մահացած քաղաքացին Իրանի քաղաքացի չէ, ՀՀ քաղաքացի է, մահվան պատճառը եղել է երկկողմանի թոքաբորբը։ Թեստն ուղարկել ենք, բայց 90 տոկոսով չի լինի կորոնավիրուս։ Թե որտեղից են վերցրել, որ էդ մարդը Իրանի քաղաքացի է՝ չեմ հասկանում, երևի, որ պանիկա է, մարդիկ վախ ունեն, դրա համար։ [«Աստղիկ» ԲԿ տնօրեն Ասատուր Ասատրյան] |aysor.am|
Այսօր ԱԽ քարտուղար Արմեն Գրիգորյանը ընդունեց Հայաստանում աշխատանքային այցով գտնվող ՀԱՊԿ գլխավոր քարտուղար Ստանիսլավ Զասին։ Գրիգորյանը ներկայացրեց իրավիճակը հայ-ադրբեջանական հակամարտ զորքերի շփման գծում և ընգծեց Արցախյան հարցի բացառապես խաղաղ ճանապարհով լուծելու հրամայականը՝ կարևորելով դրանում ՀԱՊԿ դիրքորոշումը ու Հայաստանի հասարակության սպասելիքներն այդ կառույցից։ Քարտուղար Զասը մեկ անգամ ևս հաստատեց ՀԱՊԿ դիրքորոշումը առ այն, որ հակամարտության խաղաղ կարգավորմանը այլընտրանք չկա։
Գործադիրն այսօր հավանություն է տվել կառավարության ծրագրի կատարման ընթացքի և արդյունքների մասին զեկույցին, որը սահմանված կարգով կներկայացվի ԱԺ: Զեկույցը ներառում է Կառավարության ծրագրի կատարման վերաբերյալ արդյունքային և թվային ցուցանիշներ: Զեկույցի համար հիմք են հանդիսացել նաև վարչապետի կողմից պարբերաբար հայտարարված «Նոր Հայաստանի մասին 100 փաստերը»: Զեկույցի կառուցվածքը համապատասխանում է կառավարության ծրագրի կառուցվածքին և ներառում է 8 բաժին՝ իր ենթաբաժիններով:
ՃՈ-ն վերջերս ներդրված բալային համակարգի շրջանակում բալեր վաճառելու դեպքերը կարող է հեշտությամբ պարզել. ճանապարհներին տեղադրված տեսախցիկները թույլ են տալիս տեսնել՝ ով է եղել մեքենայի ղեկին, այլ գործիքներ ևս կան: [ ՃՈ պետ Եգոր Կարապետյանը՝ «Բարգավաճ Հայաստան» խմբակցության հրավիրված «Ճանապարհային երթևեկության արդի հիմնախնդիրները և դրանց լուծման ուղիները» խորագրով խորհրդարանական լսումներին] |armenpress.am|
ՍԴ որևէ դատավոր այս պահի դրությամբ չի դիմել վաղ կենսաթոշակի անցնելու համար: Այսօր լրանում է այն ժամկետը, երբ ՍԴ դատավորները կարող են հրաժարական ներկայացնել և անցնել վաղ կենսաթոշակի: Այս դեպքում պահպանվում է նրանց աշխատավարձը և հավելավճարները: Սա կամավոր ընթացակարգ է, որին դատավորները կարող են դիմել կամ չդիմել: |factor.am|
Արսեն Թորոսյանը հայտնել է, որ դեղատներում վաճառվող բարակ դիմակները որևէ լուրջ պաշտպանիչ ազդեցություն չունեն։ Կան հատուկ տեսակի պաշտպանիչ դիմակներ, որոնք անհրաժեշտ են կրել արդեն հաստատված հիվանդությունով հիվանդի հետ աշխատելիս։ Նախարարն ասաց, որ 150 հազարից ավել պահեսավորված դիմակ ունեն՝ նախատեսված բժշկական հաստատությունների համար, շուտով նաև գնում են կատարելու։ Նաև հնարավորություն ունեն տեղում դիմակների արտադրություն կազմակերպելու։ Սակայն դրանք հիմնականում բժշկական նշանակության են և ավելի շատ պետք է կրի նաև այն մարդը, ով պոտենցիալ վարակակիր է։ |pastinfo.am|
Ամուլսարի ծրագրում ամեն ինչ չէ, որ այնքան միանշանակ է, արդեն իսկ կարող եմ արձանագրել՝ անկախ հանգամանքից, որ այնտեղ որոշակի տրամադրություններ կան, որ դեմ են Ամուլսարի հանքի բացմանը, ինքը՝ «Լիդիանը», ունի ֆինանսական խնդիրներ, դրանց լուծումը ևս խնդրահարույց է: Մենք ունեցել ենք քննարկումներ և՛ ընկերության, և՛ բողոքող անձանց, և՛ համայնքի ներկայացուցիչների հետ, բայց այստեղ արդեն խնդիրը խորքային է, ֆինանսական դաշտում է և ընկերության հետ է կապված: [Տիգրան Ավինյան] |shantnews.am|
2019-ին հոգեբուժական և թմրաբանական բժշկական հաստատություններում հաշվառվել է վարորդական վկայականներ ստացած 473 անձ, վարորդական վկայականները ճանաչվել են ուժը կորցրած, որոնցից 102-ը առգրավվել և հանձնվել են ՃՈ։ [Ճանապարհային ոստիկանության պետ Եգոր Կարապետյանը`ԲՀԿ-ի հրավիրած «Ճանապարհային երթևեկության արդի հիմնախնդիրները և դրանց լուծման ուղիները»] |armenpress.am|
ՊՎԾ լիազորությունները ժամանակավորապես կասեցված պետԴավիթ Սանասարյանի գործով հետազոտվում են գործում առկա ապացույցները: Ըստ հետազոտված փաստաթղթերի՝ հեմոդիալիզի սարքերի մրցույթում հաղթող ճանաչված «Զորաշեն ՍՊԸ»-ն ներկայացրել է կեղծ սերտիֆիկատներ: Գործով ամբաստանյալներից Սամվել Ադյանը «Գրիգոր Լուսավորիչ» ԲԿ-ին առաջարկել է ընդլայնել մրցույթի չափորոշիչների պայմանները, որպեսզի հետագայում «Զորաշենը» հնարավորություն ունենա մրցույթին կրկին մասնակցել: |factor.am|
Ունենք 850 հետազոտության թեստ և ևս 3000 թեստ շուտով կստանանք, այդ առումով հագեցած ենք: Վերջին 2 օրվա մեջ Հայաստանի սահմանը հատել է 69 բեռնատար, որոնք ոստիկանության և մեր հակահամաճարակային ուժերի կողմից ուղեկցվել են: Պրակտիկորեն, եթե չասեմ ամեն ինչ, ապա հնարավոր ամեն ինչ արվում է, որ վարակի ներթափանցումը Հայաստան կանխվի՝ չնայած այն համարվելով ռեսպերատոր հիվանդություն, շատ քիչ է տարբերվում սեզոնային գրիպի H1N1 շտամից, որը ազատ շրջանառվում է ամբողջ աշխարհում։ [Արսեն Թորոսյանը՝ կորոնավիրուսի մասին]
Կառավարությունը ԱԳՆ-ին 12 միլիոն 275 հազար դրամ հատկացրեց՝ սիրիահայերին անձնագիր տալու համար նախատեսված պետական տուրքը վճարելու: Օտարերկրյա պետություններում վավերական ՀՀ քաղաքացու անձնագիր տալու կամ փոխանակելու համար պետական տուրքի վճարումից ազատվում են ազգությամբ հայ այն օտարերկրյա քաղաքացիները կամ ՀՀ քաղաքացիները, որոնց մշտական բնակության օտարերկրյա պետությունում ստեղծվել է այնպիսի արտակարգ իրավիճակ, որն սպառնում է քաղաքացիների կյանքին կամ առողջությանը: |aysor.am|
Կառավարության նիստին փոխվարչապետ Մհեր Գրիգորյանը ներկայացրեց, որ ԵԱՏՄ համատեքստում 647 ապրանքի գծով արտոնություն կտրվի Հայաստանին։ Հայաստանը նախորդ 5 տարվա ընթացքում արտոնության միջոցով ապրանքները ներմուծում էր ցածր մաքսատուրքերով։ Հիմա այդ ապրանքների թիվը կրճատվում է, սակայն 647 ապրանք այս տարի ևս կներմուծվի ցածր մաքսային վճարով։ Այս արտոնությունը միայն մեքենաների վրա չի տարածվում։ Խոսքը հիմնականում մսի, կարագի, թանկարժեք մետաղների, դեղորայքի և դրա հումքի, քարերի և նմանատիպ ապրանքների մասին է։ Փաշինյանն ասաց, որ սրա արդյունքում քաղաքացիները մոտ 30 միլիոն դոլար կխնայեն։ |shantnews.am|
Փետրվարի 27-ին պաշտպանության նախարար Դավիթ Տոնոյանը հանդիպել է աշխատանքային այցով ՀՀ-ում գտնվող ՀԱՊԿ գլխավոր քարտուղար Ստանիսլավ Զասի հետ: Հանդիպման ընթացքում քննարկվել են միջազգային և տարածաշրջանային անվտանգության հարցեր, ՀԱՊԿ ռազմական բաղադրիչի հետագա զարգացման գործընթացը: Հատուկ ուշադրություն է դարձվել ՀԱՊԿ ճգնաժամային արձագանքման համակարգի զարգացմանը, օպերատիվ արձագանքման հավաքական ուժերի և խաղաղապահ ուժերի ներուժի բարձրացմանը, կազմակերպության զինված ուժերի ներկայացուցիչների համակարգի կատարելագործմանը, համատեղ իրականացվող մարտական պատրաստության միջոցառումներին։
Բոլոր անհրաժեշտ միջոցները ձեռնարկվում են, ու Հայաստանն ապրում է իր բնականոն կյանքով։ Հանրությունը պետք է համոզված լինի, որ եթե ինչ-որ անհանգստացնող տեղեկություն լինի, այն կհանրայնացվի։ Ես գիտեմ, որ նման դեպքերում խուճապ տարածողները շատանում են, բացառվում է, որ լինի դեպք, ու կառավարությունը թաքցնի էդ տեղեկությունը հանրությունից։ [Նիկոլ Փաշինյանը՝ կորոնավիրուսի մասին] |aysor.am| |aysor.am|
Ճապոնիայում և Կորեայում նոր տիպի կորոնավիրուսով վարակվածների թվի կտրուկ աճով պայմանավորված՝ ներկայումս Ճապոնիայում և Կորեայում գտնվող և այցով ժամանող ՀՀ քաղաքացիներին կոչ ենք անում կապ հաստատել Ճապոնիայում և Կորեայում ՀՀ դեսպանության հետ։ Նրանց հորդորում ենք նաև խուսափել վիրուսի բացահայտման մեծաքանակ դեպքեր գրանցած շրջաններ (Ճապոնիայում՝ Հոկկայդո, Կանագավա, Տոկիո, Չիբա, Իշիկավա, Վակայամա և Օկինավա նահանգներ, Կորեայի Հանրապետությունում՝ Սեուլ, Դեգու, Կվանգջու քաղաքներ, ինչպես նաև Գյոնսան նահանգ) այցելելուց: [Ճապոնիայում և Կորեայում ՀՀ դեսպանություն]
Քիչ առաջ խոսեցի Վրաստանի առողջապահության նախարար Եկատերինե Տիկարաձեի հետ, որպեսզի հասկանամ կորոնավիրուսով պայմանավորված իրավիճակը մեր հարևան երկրում: Նախարարի հավաստմամբ` կորոնավիրուսով ախտորոշված պացիենտի հետ շփված 4 անձինք հետազոտվել են, և նրանց մոտ չի հայտնաբերվել վարակը: Նրանք 14 օր կմնան մեկուսացման մեջ: [Արսեն Թորոսյան]
Իրանի հյուսիսային նահանգներում, մասնավորապես Հայաստանին սահմանակից Արևելյան Ատրպատական նահանգում փետրվարի 26-ի դրությամբ նոր տեսակի կորոնավիրուսի վարակի կամ մահվան դեպք չի արձանագրվել: Իրանի առողջապահության նախարարը քաղաքացիներին հորդորել է չճամփորդել նահանգից նահանգ, քանի որ համալսարանների և դպրոցների փակ լինելու հանգամանքով պայմանավորված ճամփորդությունների թիվն ավելացել է՝ նպաստելով վարակի տարածմանը: |armenpress.am|
ՀՔԾ քննիչը մերժել է Ազգային ժողովի նախկին նախագահ Արա Բաբլոյանի նկատմամբ հարուցված քրեական հետապնդումը դադարեցնելու վերաբերյալ պաշտպանի միջնորդությունը: Պաշտպան Արամ Վարդեւանյանի խոսքով՝ Բաբլոյանի մեղադրանքը փոփոխելուց հետո նյութերի ծանոթացման համար ՀՔԾ-ն մեկ օր ժամանակ էր տրամադրել, որի ընթացքում էլ հենց պաշտպանը ներկայացրել էր միջնորդություն՝ քրեական հետապնդումը դադարեցնելու վերաբերյալ։ |armtimes.com|
ՀՀ կառավարությունը կքննարկի Վահագն Վերմիշյանին քաղաքաշինության կոմիտեի նախագահի պաշտոնից ազատելու մասին հարցը: Այդ մասին որոշման նախագիծն ընդգրկված է կառավարության փետրվարի 27-ի նիստի օրակարգում: Ավելի վաղ, Վահագն Վերմիշյանը կալանավորվել է առանձնապես խոշոր չափի կաշառք ստանալու համար մեղադրանքով: |armenpress.am|
Վատիկանում Հայաստանի նախկին դեսպան Միքայել Մինասյանը հարցաքննության է հրավիրվել Հատուկ քննչական ծառայության: Այդ մասին հայտնում է ՀՔԾ խոսնակ Մարինա Օհանջանյանը: Քննվող քրեական գործերից մեկի շրջանակում Միքայել Մինասյանը ճանաչվել է որպես վկա: |24news.am| |24news.am|
ՊԵԿ նախկին նախագահ, ֆինանսների նախկին նախարար Գագիկ Խաչատրյանի կալանքի ժամկետը երկարացվել է եւս երկու ամսով։ Գագիկ Խաչատրյանը մեղադրվում է պաշտոնեական դիրքի չարաշահման եւ առանձնապես խոշոր չափով վատնում կատարելու համար: Քրեական գործը վերաբերում է Գագիկ Խաչատրյանի պաշտոնավարման ժամանակաշրջանում կատարված ենթադրյալ հանցագործության դեպքերին։ |news.am|
Ադրբեջանի պետական սահմանապահ ծառայությունը հաղորդում է, որ այսօր ժամը 15։10-ին վերաբացվել է Թուրքիայի ու Նախիջևանի միջև սահմանը: Պայմանավորվածությունը ձեռք էր բերվել Թուրքիայի նախագահի փետրվարի 25-ին Բաքու կատարած այցի ժամանակ: Թուրքական կողմը սահմանը փակել էր կորոնավիրուսի վտանգի պատճառով ու Նախիջևանը հայտնվել էր լիակատար շրջափակման մեջ: Հայաստանի հետ սահմանը վաղուց փակ է, վերջերս փակվել է նաև Իրանի հետ սահմանը: |azatutyun.am|
Թեհրան-Երևան ինքնաթիռը, որը 52 ուղևորի փոխադրեց Զվարթնոց օդանավակայան մեր մասնագետի ուղեկցությամբ, բարեհաջող վայրէջք կատարեց: Բոլոր ուղևորները նորից զննվել և ջերմաչափվել են, ինչը բավարար միջոց է այս պահին: Նրանք կգտնվեն տնային հսկողության տակ: Հաջորդ չվերթը լինելու ուրբաթ օրը: Նույն ընթացակարգով կիրականացվեն բոլոր կանխարգելիչ միջոցառումները: Ավելի մանրամասն տեղեկատվություն կտրամադրվի նախարարության մամուլի ծառայության կողմից: [Արսեն Թորոսյան]
Իրանի իշխանությունները պլանավորում են կարանտինի մեջ պահել ոչ թե քաղաքները կամ ամբողջ շրջաններ, այլ միայն կորոնավիրուսի հարուցած հիվանդության ախտանշաններով առանձին մարդկանց: Եթե մարդու մոտ կան հիվանդության ախտանշաններ, նրան կարանտինի են ենթարկու»: Մենք դրա համար բազմաթիվ կենտրոններ ենք նախատեսել Թեհրանում: Երեկ տեղադրել են լրացուցիչ մահճակալներ։ [Հասան Ռոհանի] |armenpress.am|
Սերժ Սարգսյանի նկատմամբ որպես խափանման միջոց ընտրված ստորագրություն երկրից չհեռանալու մասին միջնորդությունը չի վերացվի: Այս լուրը հաստատեց ՀՀ գլխավոր դատախազի խորհրդական Գոռ Աբրահամյանը: Սերժ Սարգսյանի պաշտպանները դատարանին միջնորդություն էին ներկայացրել՝ Սարգսյանի նկատմամբ ընտրված խափանման միջոցը վերացնելու վերաբերյալ։
Իրանի Իսլամական Հանրապետությունից ՀՀ քաղաքացիների առաջին խումբը հատուկ չվերթով վերադարձել է Հայաստան: ՀՀ քաղաքացիներին բերող օդանավը 16:00-ին վայրէջք է կատարել։ Իրանում գտնվող ՀՀ քաղաքացիների հաջորդ խումբը հայրենիք կվերադառնան փետրվարի 28-ին: Հայրենիք վերադառնալու համար Իրանում Հայաստանի դեսպանություն է դիմել Հայաստանի Հանրապետության 65 քաղաքացի: [ՀՀ արտաքին գործերի նախարարության Սահմանակից երկրների վարչության պետ Արսեն Ավագյան] |armenpress.am|
Հայաստանի տնտեսությունն ինտեգրված է ԵԱՏՄ-ին, բայց մեզ ոչինչ չի խանգարում քաղաքականապես ինտեգրվել ԵՄ-ին։ Կարող է՝ տնտեսությունը ինտեգրված է եվրասիական տնտեսական համագործակցության մեջ, բայց մեզ ոչինչ չի արգելում քաղաքականապես ինտեգրվել Եվրոպական միությանը, ունենալ այն կառույցները, որոնք անհրաժեշտ են ժողովրդավարության կայացման համար։ [«Լուսավոր Հայաստան» խմբակցության պատգամավոր Կարեն Սիմոնյան] |factor.am|
Սերժ Սարգսյանի գործով մեղադրանքը պաշտպանող դատախազ Արսեն Մարտիրոսյանը չի հեռացվի վարույթից: Դատարանում որոշման հրապարակմանը ամբաստանյալ Սերժ Սարգսյանը չէր մասնակցում: Դատավորը հայտնեց, որ աշխատանքային ծանրաբեռնվածությամբ պայմանավորված՝ այսօրվա դատական նիստը ենթակա է հետաձգման: Հաջորդ դատական նիստը նշանակվեց մարտի 26-ին: Հիշեցնենք, պաշտպանները բացարկի միջնորդություն էին ներկայացրել դատախազին՝ հիմքում դնելով նրա ենթադրյալ կողմնակալության հանգամանքը: Սարգսյանը նշել էր, որ միանում է իր պաշտպանների միջնորդությանը: |armtimes.com| |armtimes.com|
Տարածաշրջանում, մասնավորապես՝ Իրանում արձանագրված նոր կորոնավիրուսային հիվանդության դեպքերի հետ կապված, փետրվարի 25-ից ՀՀ ԶՈւ բոլոր զորամասերում արգելված են զինծառայողների ծնողների և հարազատների այցելությունները, պարտադիր ժամկետային զինծառայողների բոլոր տեսակի արձակուրդներն ու ազատ արձակումները, այդ թվում՝ վերականգնողական (բուժական) արձակուրդների տրամադրումը (բացառությամբ «Ես եմ» ծրագրով զինվորական ծառայություն անցնող զինծառայողների): Այս միջոցառումները նպատակ ունեն կանխել կորոնավիրուսային հիվանդության ներթափանցումը զորամասեր։ [ՊՆ]
Եկել է ժամանակը, որ մենք խորը վերլուծենք և գնահատենք այն արդյունքները, որ վերջին 1.5 տարվա ընթացքում արձանագրել ենք կոռուպցիայի դեմ պայքարում և հատկապես պետությունից գողացված միջոցների վերադարձի և պատճառված վնասների վերականգնման առումով: Զուտ տոկոսային վիճակագրությամբ մենք այստեղ ունենք աննախադեպ ծավալներ և ձեռքբերումներ: Հայաստանում երբեք կոռուպցիայի դեմ իրական պայքար չի տարվել։ ՀՀ-ն բարձրաստիճան պաշտոնյաների կոռուպցիոն գործունեության արդյունքում կրել է միլիարդավոր դոլարների վնասներ, և ես՝ որպես Հայաստանի ղեկավար, ժողովրդից մանդատ եմ ստացել նաև այդ միլիարդները ետ բերելու խոստումների համար: [Նիկոլ Փաշինյանը՝ կոռուպցիայի դեմ պայքարի վերաբերյալ խորհրդակցությանը]
ԱԺ տնտեսական հարցերի մշտական հանձնաժողովը 2-րդ ընթերցմամբ դրական եզրակացություն տվեց նախագծին, որով սահմանվում է, որ այն ուսանողները, որոնք կառավարության սահմանված մասնագիտությունների ցանկով սովորելուն զուգահեռ կաշխատեն, ուսումնական տարվա ավարտից հետո պետությունը ուսման վարձը կփոխհատուցի եկամտային հարկի վերադարձի տեսքով, եթե եկամտային հարկը կբավարարի ուսման վարձի չափով` ոչ ավելի, քան ուսման վարձը: |armenpress.am|
Եվրամիությունը ցանկանում է պահպանել եւ ամրապնդել Հարավային Կովկասի տարածաշրջանում խաղաղությունն ու կայունությունը: Մենք բոլորս հավատարիմ ենք փոխադարձ համագործակցության խորացման սկզբունքին այնպիսի ոլորտներում, ինչպիսիք են՝ ազատություն, անվտանգություն եւ արդարադատություն: [Հայաստանում ԵՄ պատվիրակության ղեկավար, դեսպան Անդրեա Վիկտորին] |news.am|
ՀՀ-ԵՄ հարաբերությունների դրական զարգացման մասին է վկայում երկկողմ ձևաչափով տրամադրվող աջակցության ծավալների ավելացումը։ 2020 թ․ աջակցության ուղղություններն արդեն իսկ նախատեսվել և հստակեցվել են, հուսով եմ՝ աջակցության չափը կլինի ավելին, քան 2019թ.-ին էր։ 2020 թ․ ծրագրով աջակցություն է նախատեսված արդարադատության և ոստիկանության ոլորտների ռազմավարական բարեփոխումների ուղղությունների համար, որոնք ընդգրկված են կառավարության գերակայությունների ցանկում: [ՀՀ-ԵՄ համաձայնագրի կիրարկումն ապահովող միջոցառումները համակարգող միջգերատեսչական հանձնաժողովի նախագահ Մհեր Գրիգորյան] |aysor.am|
Մեղրիի անցակետից եկող բոլոր բեռնատարները տեղաշարժվում են ՀՀ տարածքում մեր մասնագետների և ոստիկանության ուղեկցությամբ: Իրանի քաղաքացի վարորդների նկատմամբ սահմանվում է հսկողություն Հայաստանի ողջ տարածքում, այդ թվում ՊԵԿ մաքսային պահեստներում, մինչև նրանց վերադառնալը: Այսօր Իրանից ինքնաթիռով վերադարձող ուղևորների նկատմամբ հսկողությունը պատշաճ իրականացնելու համար իմ հանձնարարությամբ ԱՆ Հիվանդությունների վերահսկման և կանխարգելման ազգային կենտրոնի մասնագետը մեկնել է Թեհրան: [Արսեն Թորոսյան]
