tert.am։ Հայաստանի պետական տնտեսագիտական համալսարանի դասախոսներն ահազանգում են բուհում տիրող իրավիճակի մասին: Կառավարման ամբիոնի ասիստենտ, տնտեսագիտության թեկնածու Արմեն Կարախանյանն այսօր լրագրողների հետ հանդիպմանը նշեց, որ ամեն բան սկսել է 2018 դեկտեմբերին, երբ նշանակվեց ռեկտորի պաշտոնակատար Ռուբեն Հայրապետյանը:
Նրա խոսքով՝ սկզբում կային որոշակի խախտումներ, սակայն ամեն բան գագաթնակետին հասավ, երբ ՀՊՏՀ գիտամանկավարժական կազմի ընտրության և տեղակալման կանոնակարգ մշակեց և ընդունեց 2019 թվականի ապրիլի 30-ին: Կարախանյանը շեշտեց, որ այն հակասում է «Բարձրագույն և հետբուհական մասնագիտական կրթության մասին» ՀՀ օրենքի 19-րդ հոդվածի, «Կրթության մասին» ՀՀ օրենքի 28-րդ հոդվածի որոշ դրույթների, ինչպես նաև մի շարք այլ օրենքների:
«Մենք ուզում ենք հավատալ, որ մեր բազմաթիվ ահազանգերը, հրապարակումները տեղ չեն հասել պատկան մարմիններն: Հույս ունենք, որ պատկան մարմիններն ու լիազորված մարմինները տեղյակ չեն, դրա համար են այս անօրինությունները շարունակվում, քանի որ համոզված ենք, որ մերօրյա Հայաստանում անօրինականությունը տեղ չունի, որ ոչ մի անձ՝ այդ թվում պաշտոնատար, չի կարող իրեն վեր դասել օրենքից ու օրինականությունից»,- ասաց նա:
Կարախանյանի խոսքով՝ գիտամանկավարժական կազմի ընտրության և տեղակալման կանոնակարգն ընդունելուց հետո բուհի մի շարք առանցքային ամբիոններ բացասական կարծիք են տվել:
«Մշակողները ոչ մի պատկերացում չեն ունեցել ՀՀ օրենսդրությունից, ավելին՝ ընդհանրապես տեղյակ չեն եղել կրթական գործընթացից: Մենք դիմել են դատարան, և քաղաքացիական գործերով դատարանը մեր հայցադիմումն ընդունել է վարույթ: Հայցադիմումի հետ ներկայացված է եղել հայցի ապահովման միջոց կիրառելու վերաբերյալ միջնորդություն, որը դատավորի կողմից բավարարվել է՝ արգելանք է դրվել տվյալ կարգի կիրառման վրա, ինչը ևս մեկ անգամ վկայում է, որ այն օրենքի կոպտագույն խախտումներով է: Սակայն 2-3 օր անց նույն դատավորն անհասկանալի պայմաններում հանում է արգելանքը»,- մանրամասնեց Կարախանյանը:
Վերջինս պատմեց, որ նոր կանոնակարգի հիման վրա դասախոսական կազմի մրցույթ է կազմակերպվել։ Ըստ Կարախանյանի՝ դասախոսների 60-ը բոյկոտել են մրցույթը, մի քանիսը ներկայացել են, բայց հրաժարվել են պատասխանել հարցերին, իսկ նրանք, ովքեր մասնակցել ու պատասխանել են հանձնաժողովի հարցերին, վստահ չեն, որ սեպտեմբերի 1-ից շարունակելու են աշխատել հարազատ բուհում։
«Մրցութային հանձնաժողով է ձևավորվել, որում ընդամենը 1 մասնագետ կա` ամբիոնի վարիչ, մնացած 4 անդամներն ընդհանրապես մասնագետ չեն։ Մեկը վարչատնտեսական մասի աշխատակից է, մեկը` կադրերի բաժնի աշխատակից, որն այս տարվա շրջանավարտ է, բակալավրիատի դիպլոմը դեռ չի ստացել և իրեն իրավունք է վերապահել 1 շաբաթ առաջ իր դիպլոմի հարցը լուծող դասախոսին տալ մասնագիտական հարցեր:
Սեպտեմբերի 1-ին դասախոսները կարող են գնալ աշխատանքային պայմանագիր կնքելու ու պարզվի, որ իրենք այլևս բուհում չեն դասավանդում: Մոտավոր հաշվարկներով՝ աշխատանքից կարող են զրկվել բուհի ներկայիս 380 դասախոսներից 100-200-ը»,- ընդգծեց Կարախանյանը՝ նկատելով, որ մրցույթի արդյունքներն առ այսօր հրապարակված չեն:
