hetq.am։ Կառավարությունը հեղինակել է փոփոխություններ «Զինվորական ծառայության և զինծառայողի կարգավիճակի մասին» օրենքում, որով առաջարկում է պայմանագրային զինծառայության ժամկետները և տարիքային շեմերը փոփոխել: Նախագծով առաջարկվում է գործող 3-12 ամիս կամ երեք տարի ժամկետով ծառայությունը դարձնել երկու, երեք, չորս կամ հինգ տարի ժամկետով:
Առաջարկվում է պայմանագրային զինծառայության անցնելու տարիքային շեմը ևս փոփոխել: Գործող օրենքով պայմանագրային ծառայության կարող են անցնել մինչև 36 տարեկան քաղաքացիները, այժմ առաջարկվում է թույլ տալ պայմանագրային ծառայություն անցնել նաև պահեստազորում հաշվառված մինչև 40 տարեկան արական սեռի ներկայացուցիչներին:
Առաջարկվում է օրենքով ամրագրել նաև, որ պարտադիր զինվորական ծառայությունից ազատելու դիմումը կարող է մերժվել կառավարության լիազորած պետական մարմնի կողմից՝ կառավարության սահմանած կարգում նախատեսված դեպքերում:
Տեղեկացնենք, որ օրենքի 21-րդ հոդվածում նշվում է, որ բացառիկ դեպքերում կառավարության որոշմամբ քաղաքացին կարող է ազատվել զինծառայությունից, սակայն օրենքում չի հստակեցվում, թե բացառիկ դեպքերը որոնք կարող են համարվել:
Նախագծով ամրագրվում է նաև այն, որ Հայաստանի Հանրապետության պաշտպանությանը մասնակցած անձանց մարտական գործողությունների մասնակցի կարգավիճակ տրվում է կառավարության սահմանած կարգով և պաշտպանության նախարարի հրամանով՝ հաշվի առնելով միջգերատեսչական հանձնաժողովի եզրակացությունը:
