22:01 - 20 մայիսի, 2021
Ազգային-ժողովրդավարական Բևեռի խորհուրդը խստորեն դատապարտում է Փաշինյանի միանձնյա, անպատասխանատու, դավաճանական որոշումներ կայացնելու հերթական դրսևորումը․ ԱԺԲ
Ազգային-ժողովրդավարական Բևեռի խորհուրդը խստորեն դատապարտում է ՀՀ վարչապետի ժամանակավոր պաշտոնակատար Նիկոլ Փաշինյանի միանձնյա, անպատասխանատու, ընդ որում՝ դավաճանական, որոշումներ կայացնելու հերթական դրսևորումը։ Այս մասին հայտարարություն է տարածել ԱԺԲ խորհուրդը։ Հայտարարության մեջ, մասնավորապես, ասվում է․
«Վիժեցնել Ադրբեջանի հետ սահմանազատման համաձայնագրի կնքումը
Աշխարհը, մասնավորապես՝ հայ ժողովուրդը, այսօր անակնկալ կերպով տեղեկացավ, որ Նիկոլ Փաշինյանը ցանկանում է Ռուսաստանի Դաշնության միջնորդությամբ և մասնակցությամբ Հայաստանի Հանրապետության և Ադրբեջանի Հանրապետության միջև կնքել սահմանազատման (դելիմիտացիա) և սահմանանշման (դեմարկացիա) համաձայնագիր, որն իր բնույթով հանրաքվեի հիման վրա կնքվող և վավերացման ենթակա միջազգային պայմանագիր է։
Ազգային-ժողովրդավարական Բևեռի խորհուրդը խստորեն դատապարտում է ՀՀ վարչապետի ժամանակավոր պաշտոնակատար Նիկոլ Փաշինյանի միանձնյա, անպատասխանատու, ընդ որում՝ դավաճանական, որոշումներ կայացնելու հերթական դրսևորումը։
Փաստում ենք, որ ՀՀ վարչապետի ժամանակավոր պաշտոնակատար Նիկոլ Փաշինյանն իր այդ կարգավիճակի բերմամբ ոչ միայն չունի նման տիպի պայմանագիր ստորագրելու իրավասություն և իրավազորություն, այլև զուրկ է նվազագույն լեգիտիմ հիմքերից՝ համազգային նշանակության նման կարևորագույն հարցի վերաբերյալ բանակցություններ վարելու առումով։
Անդրադառնալով Հայաստանի Հանրապետության և Ադրբեջանի Հանրապետության միջև սահմանազատման և սահմանանշման հարցին, անհրաժեշտ ենք համարում նշել, որ այն չի կարող լուծվել Խորհրդային Միության կողմից իր հանրապետությունների միջև ապօրինի և կամայական կերպով կատարված վարչատարածքային բաժանման հիման վրա։ Նման մոտեցումը որևէ աղերս չունի միջազգային իրավունքի հետ և չի կարող դրվել բանակցությունների հիմքում։
Հայաստանի Հանրապետության և Ադրբեջանի Հանրապետության միջև սահմանների վերաբերյալ միակ օրինական փաստաթուղթը այժմյան Միացյալ Ազգերի Կազմակերպության իրավանախորդ Ազգերի Լիգայի 1920 թ․ փետրվարի 24-ի որոշումն է, որի տակ դրված են այդ կազմակերպության խորհրդի անդամներ Ֆրանսիայի, Մեծ Բրիտանիայի, Իտալիայի և Ճապոնիայի լիազոր ներկայացուցիչների ստորագրությունները։
Ըստ այդմ, դիտարկվող հարցը կարող է լուծվել ապագայում՝ նշված փաստաթղթի հիման վրա և հայ ժողովրդից լեգիտիմ իրավասություն և իրավազորություն ստացած իշխանության օրոք։
Մինչ այդ, աշխարհասփյուռ հայ ժողովրդին կոչ ենք անում միասնական և միահամուռ կերպով ընդդիմանալ հայտարարված ազգադավ գործընթացին և վիժեցնել դրա իրականացումը հենց սկզբնավորման փուլում։
Հակահայկական աշխարհաքաղաքական կենտրոն Ռուսաստանը և ՀՀ վարչապետի ժամանակավոր պաշտոկանատար Նիկոլ Փաշինյանի գլխավորությամբ գործող հակազգային ուժերը չեն կարող հայ ազգին զրկել իր նվիրական՝ միացյալ Հայաստան ունենալու երազանքից և դրա անխուսափելիության հեռանկարից։
Ազգային-ժողովրդավարական բևեռի խորհուրդ
Երևան, 20 մայիսի 2021 թ․, Երևան»
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
![#armvote2021․ Սոցիալ-տնտեսական վերականգնում [«Ազգային-Ժողովրդավարական բևեռ» կուսակցություն]](https://cdn.infocom.am/enlarge?file=2021-06-07-f397a7b2-4327-4e25-a5ea-63e569f52c58.jpg&type=jpeg&width=410&height=230)
![#armvote2021․ Գիտություն և կրթություն [«Ազգային-Ժողովրդավարական բևեռ» համահայկական կուսակցություն]](https://cdn.infocom.am/enlarge?file=2021-06-06-469b756b-521f-46ab-98f4-1dcaac2d1543.jpg&type=jpeg&width=410&height=230)
comment.count (0)