Այսօր՝ սեպտեմբերի 21-ին, Հայաստանի երրորդ Հանրապետությունը նշում է Անկախության տոնը․ լրացավ անկախության հռչակման 30-ամյակը։
1990 թվականի օգոստոսի 23-ին Հայաստանի գերագույն խորհուրդը ընդունեց Հայաստանի անկախության հռչակագիրը, որտեղ նշված էր, որ Հայաստանի ԽՍՀ-ն կազմալուծվում է, և ձևավորվում է նոր պետություն՝ Հայաստանի Հանրապետությունը։
1991 թվականի սեպտեմբերի 21-ի հանրաքվեում Հայաստանի ժողովուրդը ձայների ճնշող մեծամասնությամբ քվեարկեց ԽՍՀՄ-ի կազմից դուրս գալու և անկախ պետություն ստեղծելու օգտին։
Սեպտեմբերի 23-ին ՀՀ Գերագուն խորհուրդը, ամփոփելով հանրաքվեի արդյունքները, Հայաստանի Հանրապետությունը հռչակեց անկախ պետություն: Հանրաքվեի արդյունքները խորհրդարանի ամբիոնից հրապարակեց Բաբկեն Արարքցյանը, իսկ Հայաստանի ԳԽ-ի՝ անկախության մասին որոշումը ընթերցեց պատգամավոր Արամ Մանուկյանը։
Հռչակագրի քաղաքական բաժնում նշվում էր, որ ՀԽՍՀ-ն վերանվանվում է Հայաստանի Հանրապետություն (Հայաստան)։ Որպես պետական դրոշ ընտրվեց Առաջին հանրապետության եռագույնը՝ կարմիր, կապույտ, ծիրանագույն գույներով։
Հռչակագրում նշվում էր, որ ՀՀ-ն պետք է ունենա իր դրամական համակարգը։ Փաստաթղթով հայերենը դարձավ պետական լեզու։ Հանրապետության ներքին ամբողջ գործավարությունը պետք է կատարվեր միայն հայերենով։
Նույն թվականի նոյեմբերին Լևոն Տեր-Պետրոսյանը ընտրվեց ՀՀ առաջին նախագահ։
Հայաստանը լիակատար անկախություն է ձեռք բերել 1991 թվականի դեկտեմբերի 26-ին՝ ԽՍՀՄ կազմալուծման արդյունքում։
Գերագույն խորհրդի կողմից անկախության հռչակումից հետո տասնյակ պետություններ ճանաչեցին Հայաստանի Հանրապետությունը: Առաջինը Լիտվան է, որ ՀՀ-ն ճանաչեց դեռ մինչեւ անկախության հռչակումը` 1991 թ. օգոստոսի14-ին: Ապա 1991 թ. ընթացքում եւս 47 պետություն ճանաչեց Հայաստանի Հանրապետության անկախությունը:
Ինչպես ամեն տարի, այս տարի նույնպես Հանրապետության հրապարակում տեղի է ունենալու միջոցառում՝ նվիրված անկախության 30-րդ տարելիցին։
Լուսանկարը՝ «Արմենպրեսս»-ի
comment.count (0)