Արմավիրի մարզպետը ճանաչողական այցով եղել է Էջմիածնի ԲԿ-ում և Վաղարշապատի հիվանդանոցում
21:52 - 12 հունվարի, 2022

Արմավիրի մարզպետը ճանաչողական այցով եղել է Էջմիածնի ԲԿ-ում և Վաղարշապատի հիվանդանոցում

Արմավիրի մարզպետ Էդվարդ Հովհաննիսյանն այսօր այցելել է մարզպետարանի ենթակայությամբ գործող Էջմիածնի բժշկական կենտրոն և Վաղարշապատի հիվանդանոց: Տնօրենների ուղեկցությամբ մարզպետը շրջել է բուժհաստատություններում, ծանոթացել աշխատանքային պայմաններին, մատուցվող ծառայություններին, իրականացված և նախատեսվող ծրագրերին:

Էջմիածնի բժշկական կենտրոնում Էդվարդ Հովհաննիսյանը հանդիպել է արտահիվանդանոցային պայմաններում կորոնավիրուսային հիվանդությամբ պացիենտների բժշկական օգնության և սպասարկման կազմակերպման հանձնաժողովի անդամների հետ, ծանոթացել համավարակի ընթացքի, հիվանդների թվի, կազմակերպվող աշխատանքների, ինչպես նաև պատվաստման գործընթացի հետ:

Մարզպետին ներկայացվել են նաև վերջին մի քանի տարիներին բժշկական կենտրոնում իրականացված մեծածավալ աշխատանքները, ձեռք բերված բժշկական սարքավորումները, որոնց արդյունքում բարելավվել է սպասարկման որակը և ավելացել պացիենտների թիվը:

Մարզպետի շրջայցն ամփոփվել է Վաղարշապատի հիվանդանոցում, որտեղ նախ ծանոթացել է վերջին երեք տարիների ընթացքում կատարված աշխատանքներին և բարեփոխումներին, ապա հանդիպել բժշկական կազմի հետ, քննարկել առաջնային կարևորության մի շարք հարցեր և ներկայացրել հիվանդանոցի՝ շուրջ 1.4 մլրդ արժողությամբ վերակառուցման ծրագիրը:

Բուժանձնակազմի հետ հանդիպման ընթացքում մարզպետ Էդվարդ Հովհաննիսյանը ողջունել է հաստատությունում իրականացված աշխատանքները, ունեցած ձեռքբերումները՝ կարևորելով դրանց շարունակականությունը: Նա ուրախությամբ ներկայացրել է նաև երկու տարի ժամկետով նախատեսվող հիվանդանոցի վերակառուցման ծրագիրը, որը հնարավորություն կստեղծի առավել լավ պայմաններում իրականացնել բժշկական ծառայությունների մատուցումը:

Հանդիպման շրջանակում մարզպետն ընդգծել է բուժսպասարկումը որակյալ և բարեխիղճ իրականացնելու կարևորությունը՝ բուժանձնակազմից ակնկալելով համարժեք վերաբերմունք և աշխատանք պացիենտների շրջանում:


Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter

Կարդալ նաև


comment.count (0)

Մեկնաբանել