«Ինտերպոլ»-ն իր խորին ցավակցությունն ու վիշտն է հայտնում մարդկային զոհերի և տառապանքների առիթով՝ կապված Ուկրաինայում հակամարտության հետ։ Այս մասին հայտարարություն է տարածել համաշխարհային կազմակերպությունը։

«Չեզոքությունը հիմնարար նշանակություն ունի «Ինտերպոլ»-ի աշխատանքի և լինելիության համար, նույնիսկ ու հատկապես, երբ անդամ երկրների միջև է հակամարտությունը: Սա դիրքորոշում է, որը «Ինտերպոլ»-ը հետեւողականորեն պահպանել է։

«Ինտերպոլ»-ը տեխնիկական ոստիկանության համագործակցության համաշխարհային կազմակերպություն է, որը հնարավորություն է տալիս իր 195 անդամ երկրներին տեղեկություն փոխանակել հանցագործության և հանցագործների մասին:

«Ինտերպոլ»-ի Կանոնադրության 2-րդ հոդվածը սահմանում է պահպանել ոստիկանական համագործակցությունը և ապահովել կապի ուղիները: «Ինտերպոլ»-ի մանդատը չի ներառում պատժամիջոցների կիրառում կամ պատժիչ միջոցների ձեռնարկում, ինչպես նաև Կանոնադրության մեջ չկա անդամ երկրի կասեցման կամ բացառման որևէ դրույթ:

Կազմակերպությանը խստիվ արգելվում է քաղաքական, ռազմական, կրոնական կամ ռասսայական բնույթի որևէ միջամտություն կամ գործունեություն»,- ասվում է հայտարարության մեջ։

Հիշեցնենք, որ Արևմտյան մի շարք երկրներ, այդ թվում՝ Մեծ Բրիտանիան և Միացյալ Նահանգները, «Ինտերպոլ»-ին կոչ են արել կասեցնել Ռուսաստանի անդամությունը միջազգային իրավապահ կազմակերպությունում։ Այս մասին հայտարարել էր Մեծ Բրիտանիայի ներքին գործերի նախարար Փրիթի Փաթելը։