Ավստրալիայի կառավարությունն հայտարարել է նոր պատժամիջոցների մասին 33 ռուս օլիգարխների, հայտնի գործարարների և նրանց ընտանիքի անդամների նկատմամբ։ Այս մասին նշվում է Ավստրալիայի արտգործնախարար Մարիս Փեյնի կայքում։

«Այսօր հայտարարված պատժամիջոցները ամրապնդում են Ավստրալիայի հանձնառությունը՝ սահմանափակումներ կիրառելու այն մարդկանց նկատմամբ, որոնք հսկայական անձնական հարստություն են կուտակել և Ռուսաստանի համար ունեն տնտեսական և ռազմավարական նշանակություն, այդ թվում՝ Ռուսաստանի նախագահ Վլադիմիր Պուտինի հետ կապերի արդյունքում»,- նշված է հաղորդագրության մեջ։

Ցուցակում են «Չելսի» ֆուտբոլային ակումբի սեփականատեր Ռոման Աբրամովիչը, «Գազպրոմի» ղեկավար Ալեքսեյ Միլլերը, «Ռոսիա» բանկի տնօրենների խորհրդի նախագահ Դմիտրի Լեբեդևը, «Ռոստեխ» պետական ​​կորպորացիայի գլխավոր տնօրեն Սերգեյ Չեմեզովը, «Տրանսնաֆթի» ղեկավար Նիկոլայ Տոկարևը, Ռուսաստանի պետական ​​զարգացման «VEB.RF» կորպորացիայի ղեկավար Իգոր Շուվալովը, ինչպես նաև Կիրիլ Դմիտրիևը՝ Ռուսաստանի ուղղակի ներդրումների հիմնադրամի (RDIF) ղեկավարը։:

«Մենք վճռականորեն աջակցում ենք Կանադայի, Եվրամիության, Նոր Զելանդիայի, Միացյալ Թագավորության և Միացյալ Նահանգների վերջին հայտարարություններին՝ ռուսաստանցի առանցքային անձանց դեմ հետագա սահմանափակող միջոցների վերաբերյալ:

Մենք կշարունակենք սերտորեն համագործակցել մեր գործընկերների հետ՝ մեծ ծախսեր պարտադրելու Ռուսաստանին իր գործողությունների համար։

Ավստրալիայի կառավարությունը վերահաստատում է աջակցությունը Ուկրաինայի ինքնիշխանությանն ու տարածքային ամբողջականությանը, ինչպես նաև Ուկրաինայի ժողովրդին»,- ասվում է գերատեսչության ղեկավարի հայտարարության մեջ։

Լուսանկարում՝ «Չելսի» ֆուտբոլային ակումբի սեփականատեր Ռոման Աբրամովիչը