Աշխատանքի և սոցիալական հարցերի նախարարություն

ՀՀ Աշխատանքի և սոցիալական հարցերի նախարարությունը գործադիր իշխանության հանրապետական մարմին է, որը մշակում ու իրականացնում է աշխատանքի և սոցիալական ապահովության բնագավառներում ՀՀ կառավարության քաղաքականությունը։

Այսօրվանից ընդունվում են դիմումներ՝ ԼՂ-ից տեղահանված կարիքավոր ընտանիքներին լրացուցիչ սոցիալական աջակցության ծրագրի շրջանակում

ԼՂ –ից բռնի տեղահանված կարիքավոր ընտանիքներին լրացուցիչ հրատապ սոցիալական աջակցության ծրագրի շրջանակում դիմումներն այսօրվանից ընդունվում են ՀՀ սոցիալական պաշտպանության www.e-social.am միասնական տեղեկատվական համակարգի միջոցով։ Այս մասին հայտնում է ՀՀ աշխատանքի և սոցիալական հարցերի նախարարությունը։ «Պայմաններին համապատասխանող յուրաքանչյուր ընտանիքի համար աջակցության չափը կկազմի 40,000 դրամ՝ գումարած 10,000–ական դրամ բռնի տեղահանված յուրաքանչյուր անդամի համար՝ սկսած 2–րդ անդամից (ծրագրի պայմանները՝ https://mlsa.am/news/910)։ Դիմում կարող եք ներկայացնել՝ հետևելով ստորև ներկայացվող ուղեցույցին։ Եթե արդեն ունեք անհատական օգտահաշիվ ՀՀ սոցիալական պաշտպանության www.e-social.am միասնական տեղեկատվական համակարգում, ապա՝ ՔԱՅԼ 1։ Մուտք գործեք Ձեր օգտահաշիվ՝ նշելով Ձեր էլեկտրոնային հասցեն և գաղտնաբառը, որոնք նախորդիվ կիրառել եք օգտահաշիվը գրանցելիս։ Ձեր օգտահաշիվ մուտք գործելու համար կարող եք կիրառել նաև «Բջջային նույնականացման քարտ» (mID) կամ «Նույնականացման քարտ» տարբերակներից որևէ մեկը։ ՔԱՅԼ 2։ Վերը նշված եղանակներից որևէ մեկով Ձեր անհատական օգտահաշիվ մուտք գործելուց հետո ընտրեք «Կյանքի դժվարին իրավիճակի հաղթահարում» բաժինը, այնուհետև՝ բացված պատուհանում «ԼՂ բռնի տեղահանված կարիքավոր ընտանիքներին հրատապ աջակցություն» ենթաբաժինը, որից հետո հարթակն անցում կկատարի դիմումի ներկայացման պատուհանին։ ՔԱՅԼ 3։ Դիմում ներկայացնելիս «Դիմումատուի տվյալներ» հատվածում Ձեր անձնական տվյալները կլրացվեն ինքնաշխատ։ Այս դաշտում անհրաժեշտ է նշել միայն Ձեր հեռախոսահամարը և էլ. փոստի հասցեն։ «Անձը հաստատող փաստաթղթի տվյալներ» հատվածում ևս Ձեր տվյալները կլրացվեն ինքնաշխատ։ ՔԱՅԼ 4։ «Փաստացի բնակության հասցե» հատվածում անհրաժեշտ է ընտրել Ձեր փաստացի բնակության մարզը, համայնքը, բնակավայրը, փողոցը, կառույցի տեսակը (առանձնատուն, բնակարան, այլ) և կառույցի համարը։ ՔԱՅԼ 5։ «Իմ բանկային տվյալները հատվածում» անհրաժեշտ է նշել Ձեզ սպասարկող բանկը և լրացնել բանկային քարտի համարը (16 նիշ)։ ՔԱՅԼ 6։ «Ունե՞ք ընտանիքի այլ անդամներ» դաշտում «Այո» նշումը կատարելու դեպքում անցում կկատարեք դիմումի ներկայացման հաջորդ էջ, որտեղ անհրաժեշտ է լրացնել ընտանիքի անդամների մասին տվյալներ՝ նրանց նույնականացնելով։ ՔԱՅԼ 7․ Եթե ունեք անչափահաս երեխա(ներ), ապա նրա(նց) վերաբերյալ տվյալները մուտքագրելուց և նույնականացնելուց հետո հարթակը կստուգի երեխաների կապը դիմումատուի և ենթադիմումատուներից որևէ մեկի հետ։ Այն դեպքում, երբ երեխայի ծնողական կապի տվյալը չստացվի դիմումատուի կամ ենթադիմումատուներից որևէ մեկի հետ, երեխայի դիմումը կստանա «Մերժված» կարգավիճակ։ ՔԱՅԼ 8․ Դիմումը հաստատելու համար պարտադիր է «Իմ ներկայացրած տվյալները կարող են տրամադրվել ԱՍՀՆ հետ համագործակցող երրորդ կողմին՝ ԼՂ բռնի տեղահանված անձանց սոցիալական աջակցություն տրամադրելու նպատակով» դաշտում ընտրել «Համաձայն եմ» կամ «Համաձայն չեմ» տարբերակներից որևէ մեկը, ինչպես նաև կատարել համապատասխան նշում «Հավաստում եմ, որ իմ կողմից ներկայացված տվյալները հավաստի են» դաշտում։ ՔԱՅԼ 11․ «Հաստատել» կոճակը սեղմելուց հետո դիմումի կարգավիճակը ցուցադրվում է անհատական օգտահաշվի «Ծանուցումներ» բաժնում։ Եթե դեռևս չունեք անհատական օգտահաշիվ ՀՀ սոցիալական պաշտպանության www.e-social.am միասնական տեղեկատվական համակարգում, ապա՝ ՔԱՅԼ 1։ Անհրաժեշտ է այցելել www.e-social.am, որտեղ հարկ է «Գրանցվել» կոճակի միջոցով ստեղծել Ձեր օգտահաշիվը։ Գրանցման նպատակով կարող եք կիրառել նաև «Բջջային նույնականացման քարտ» (mID) կամ «Նույնականացման քարտ» տարբերակներից որևէ մեկը։ ՔԱՅԼ 1.1։ «Բջջային նույնականացման քարտ» (mID) կամ «Նույնականացման քարտ» տարբերակներից մեկն ընտրելու դեպքում հետևեք «ԵսԵմ» ազգային նույնականացման հարթակի հրահանգներին։ ՔԱՅԼ 1.2։ Գրանցվելու 3-րդ տարբերակի ընտրության դեպքում անհրաժեշտ է լրացնել Հանրային ծառայության համարանիշը (ՀԾՀ՝ սոցիալական քարտի համարը), անուն, ազգանուն, հայրանուն, ծննդյան օրը/ամիսը/տարի, ապա սեղմել «Որոնել» դաշտը՝ նույնականացում անցնելու համար։ «Դիմումատուն հաջողությամբ նույնականացվեց» հաղորդագրությունն ստանալուց հետո անհրաժեշտ է մուտքագրել Ձեր հեռախոսահամարը և էլ. փոստի հասցեն, ապա սեղմել «Գրանցվել» կոճակը, որից հետո կստանաք ծանուցում՝ հետագա քայլերի վերաբերյալ։ Ձեր կողմից նշված էլեկտրոնային փոստին կուղարկվի հաղորդագրություն՝ Ձեր անհատական օգտահաշիվն ակտիվացնելու մեկանգամյա ծածկագրի հղումով (մեկանգամյա ծածկագրի հղումն ակտիվ է 30 րոպե, որի ընթացքում Ձեր անհատական օգտահաշիվը չակտիվացնելու դեպքում այն կդառնա անվավեր և անհրաժեշտ կլինի կրկին նույնականացվել` կատարելով նույն քայլերը): Մեկանգամյա ծածկագրի հղմամբ անցնելու դեպքում կբացվի պատուհան, որտեղ նշված են հաղորդագրությամբ ստացված մեկանգամյա ծածկագիրը և նոր գաղտնաբառի մուտքագրման դաշտերը։ Ձեր կողմից նոր գաղտնաբառ մուտքագրելուց և «Հաստատել» սեղմակն ընտրելուց հետո անցում կկատարեք ՀՀ սոցիալական պաշտպանության www.e-social.am միասնական տեղեկատվական համակարգի մուտքի/գրանցման էջ, որտեղ Ձեր էլ․ փոստի հասցեն և նոր ստեղծված գաղտնաբառը մուտքագրելուց հետո՝ «Մուտք» հրահանգի միջոցով կարող եք մուտք գործել Ձեր անհատական օգտահաշիվ և ներկայացնել «ԼՂ բռնի տեղահանված կարիքավոր ընտանիքներին հրատապ աջակցություն» ծրագրի դիմումը, ինչպես նկարագրված է վերևի քայլերում։ Ուշադրություն․ ԼՂ բռնի տեղահանված այն հայրենակիցները, որոնք ծրագրի շրջանակում դիմում ներկայացնելու հետ կապված կունենան դժվարություններ, կարող են մոտենալ Միասնական սոցիալական ծառայության տարածքային կենտրոններ՝ դիմումը մեր օգնությամբ լրացնելու նպատակով (հասցեները՝ https://socservice.am/offices)», - նշված է հայտարարությունում։

20:30 - 22 ապրիլի, 2025

Աշխատանքային պայմանագրերը՝ բացառապես էլեկտրոնային․ համակարգը ներդրվում է փուլային տարբերակով |armenpress.am|

armenpress.am: Հանրապետությունում աշխատանքային պայմանագրերի կնքման թվային համակարգի ներդրման աշխատանքներն ակտիվ փուլում են։ Արդեն ստեղծվել է աշխատանքային խումբ, առաջիկայում սպասվում է ենթակառուցվածքների ապահովման գործընթացը։ «Արմենպրես»-ի մամուլի սրահում հրավիրված ասուլիսում ՀՀ աշխատանքի և սոցիալական հարցերի նախարարության աշխատանքի և զբաղվածության վարչության պետ Ժորա Սարգսյանը նշեց, որ համակարգը ներդրվում է փուլային տարբերակով։ Նոր կարգավորումները 2025 թվականի հուլիսի 1-ից կլինեն կամավոր, 2026 թվականի հունվարի 1-ից՝ պարտադիր։ Ո՞րն է գործատուի անելիքը Դա նշանակում է, որ հաջորդ տարվանից բոլոր աշխատանքային պայմանագրերը կնքվելու են թվային համակարգով, և բոլոր գործընթացները լինելու են էլեկտրոնային եղանակով։ «Գործելու է պորտալ, որտեղ մուտք են գործելու գործատուները, և այնտեղ լինելու է հնարավորություն ստեղծելու աշխատանքային պայմանագիր։ Ասեմ, որ ի սկզբանե լինելու է աշխատանքային պայմանագրի կաղապար, այսինքն՝ կոնկրետ պարտադիր դաշտեր, որտեղ գործատուն պետք է լրացնի համապատասխան տվյալները։ Ամեն դեպքում համակարգը ճկուն է ,և, եթե կլինեն դրույթներ, աշխատանքային պայմաններ, որոնք աշխատողը կամ գործատուն կուզենան ներառել պայմանագրում, ապա կարող են ավելացնել»,-ասաց ժորա Սարգսյանը։ Երբ գործատուն լրացնում է բոլոր դաշտերը, դրանից հետո այն էլեկտրոնային եղանակով ստորագրում է։ Հարթակում հնարավոր է լինելու պայմանագրում կատարել փոփոխություն կամ պայմանագրերը լուծել։ Մեկ հավելում ևս։ Գործատուն աշխատանքային պայմանագիրը էլեկտրոնային հարթակում աշխատողի հետ կնքելուց հետո այլևս գրանցման հայտ տալու անհրաժեշտություն չի ունենալու։ Պայմանագրի բովանդակությունից կգեներացվի գրանցման հայտը։ Ի՞նչ պետք է անի աշխատանքի ընդունվող քաղաքացին Գործատուի կողմից էլեկտրոնային ստորագրությունը դնելուց հետո աշխատանքի ընդունվողն իր էլեկտրոնային հասցեին ստանում է ծանուցում, որ իր անունով ստեղծվել է աշխատանքային պայմանագիր։ Անձը այդ դեպքում մուտք է գործում «Ես եմ» հարթակ և տեսնում է իր համար ստեղծված աշխատանքային պայմանագրի նախագիծը։ Համաձայնության դեպքում այն ստորագրում է։ «Այստեղ ուզում եմ նշել հետևյալը։ Այսօր քաղաքացիների մի զգալի մասն իրենց եկամուտները հայտարարագրում են հենց «Ես եմ» հարթակի միջոցով, բջջային օպերատորների մոտ ձեռք բերված էլեկտրոնային ստորագրությամբ, այն է 6-8 նիշից բաղկացած կոդով։ Դա նշանակում է, որ թվային պայմանագրերը տեսնելու, դրանք ստորագրությամբ հաստատելու համար հավելյալ գործողությունների կարիք չի լինի, խնդիրներ չեն առաջանա։ Ինչպես հայտարարագրի համար մուտք են գործում «Ես եմ» հարթակ, այդպես էլ աշխատանքային պայմանագիրը տեսնելու համար նույն կերպ մուտք կգործեն ու կտեսնեն ու այն կստորագրեն»,-ասաց Ժորա Սարգսյանը։ Նախարարության ներկայացուցիչը միայն հորդորեց բոլոր այն քաղաքացիներին, որոնք այս փուլում չեն աշխատում, միևնույնն է դիմեն բջջային օպերատորին և իրենց էլեկտրոնային ստորագրությունը ստանան։ Հետագայում աշխատանքի ընդունվելու պարագայում այդ ստորագրությունը ստանալու համար կարող է ժամանակ պահանջվել։ Ի՞նչ է լինելու այն աշխատողների պարագայում, որոնց պայմանագրերը կնքվել են ավելի վաղ Այս մասով ևս Աշխատանքային օրենսգրքով նախատեսված են փոփոխություններ։ Մասնավորապես, 2026 թվականի հունվարի 1-ից մինչև 2026 թվականի դեկտեմբերի 31-ը ժամանակ է տրամադրվելու բոլոր գործատուներին, որ ավելի վաղ ընդունված աշխատողների պայմանագրերը ևս այդ հարթակում լրացնեն։ Խոսքն այն աշխատողների մասին է, որոնք այդ պահին գործատուի մոտ աշխատում են։ Այն պայմանագրերը, որոնք մինչ այդ լուծվել են, ապա դրանց տվյալները համակարգում պետք չէ ներկայացնել։ Աշխատողների աշխատանքային պայմանագրերը կմուտքագրվեն այդ օրվա ամսաթվով ու քաղաքացին կդնի իր էլեկտրոնային ստորագրությունը, սակայն պայմանագրում նշվելու է, որ նա աշխատանքի է ընդունվել, օրինակ, 2001 թվականին։ Գաղտնիության պայմանները Ցանկացած ժամանակ քաղաքացին այդ նույն հարթակում կարող է տեսնել իր մյուս աշխատանքային պայմանագրերը ևս, հասկանալ, թե ինչ փոփոխություններ են տեղի ունենում։ Քաղաքացին տեսնելու է միայն իր պայմանագրերը, մյուս աշխատողների պայմանագրերը տեսնելու հնարավորություն չի ունենալու։ Գործատուն էլ տեսնելու է միայն իր աշխատողների պայմանագրերը։ Այսինքն՝ գործատուն չի տեսնելու իր աշխատողի՝ տարբեր գործատուների մոտ եղած պայմանագրերը։ Ակնկալիքները համակարգի ներդրումից Ժորա Սարգսյանը նշեց, որ այս սպասվող փոփոխությունները նախ կնպաստեն, որ փաստաթղթաշրջանառության ծավալը կտրուկ նվազի։ Դրանից բացի, գործատուի կողմից արվող գործողությունները կկրճատվեն, ինչպես նաև կնքվող աշխատանքային պայմանագրերը կհամապատասխանեն օրենքին։ Աշխատողներն էլ կարող են մեկ հարթակում տեսնել իրենց ունեցած աշխատանքային պայմանագրերը, կխուսափեն այն հնարավոր խնդիրներից, որ գործատուն աշխատանքային պայմանագիրը թղթային տարբերակով կազմում է, սակայն գործնականում պատկան մարմիններին հայտ չի տալիս։ Ու ստացվում է, որ այդ թղթային տարբերակով պայմանագիրն իրավական ուժ չունի, դա միայն թուղթ է։ Այս հնարավոր խնդիրները ևս չեն լինի։

16:06 - 19 փետրվարի, 2025