ԱԳՆ

ԱԳՆ-ն ՀՀ արտաքին քաղաքական գերատեսչությունն է։ Հիմնադրվել է 1918թ.-ին։ Նախարարությունը մշակում եւ իրականացնում է ՀՀ կառավարության արտաքին քաղաքականությունը: Նախարարության ստեղծումը, վերակազմակերպումը եւ գործունեության դադարեցումը կարգավորվում է օրենքով: Հայաստանի Հանրապետության արտաքին գործերի նախարարությունը գործում է ՀՀ Սահմանադրության, «Կառավարության կառուցվածքի եւ գործունեության մասին», «Դիվանագիտական ծառայության մասին» եւ այլ օրենքների հիման վրա: Արտաքին գործերի նախարարության աշխատանքներն ուղղված են Հայաստանի Հանրապետության արտաքին անվտանգության ամրապնդմանը, զարգացման արտաքին բարենպաստ պայմանների ապահովմանը, միջազգային կազմակերպություններում եւ միջազգային գործընթացներում ներգրավվածության խորացմանը, բարեկամ եւ գործընկեր երկրների հետ համագործակցության առավել ամրապնդմանը:

Արտաքին գործերի նախարարը Արա Այվազյանն է։ Տեղակալներն են Արմեն Ղեւոնդյանը, Արտակ Ապիտոնյանը, Գագիկ Ղալաչյանը, Ավետ Ադոնցը

Արարատ Միրզոյանն աշխատանքային այցով կգտնվի Կիպրոսում․ ԱԳՆ

Հուլիսի 29-ին ՀՀ ԱԳ նախարար Արարատ Միրզոյանն աշխատանքային այցով կգտնվի Կիպրոսում։ Այս մասին հայտնում են ԱԳՆ-ից․ «Կայանալու է նախարար Միրզոյանի և Կիպրոսի ԱԳ նախարար Կոնստանտինոս Կոմբոսի հանդիպումը, որից հետո նախարարները հանդես կգան մամուլի համար հայտարարություններով։ Կիպրոսի ԱԳ նախարարի հրավերով, Արարատ Միրզոյանը կմասնակցի և ելույթով հանդես կգա Կիպրոսի դիվանագիտական ներկայացուցչությունների ղեկավարների տարեկան համաժողովին: Ծրագրված են նաև հանդիպումներ Կիպրոսի բարձրաստիճան այլ պաշտոնյաների հետ», - նշված է հայտարարությունում։

19:22 - 26 հուլիսի, 2024

ՀՀ–ն հանձնառու է պայմանավորվածությունների կատարմանը և նույնն ակնկալում է Թուրքիայից. ԱԳՆ |arm.sputniknews.ru|

arm.sputniknews.ru: Հայաստանի Հանրապետությունը հանձնառու է Հայաստանի և Թուրքիայի միջև հարաբերությունների կարգավորման գործընթացի շրջանակում ձեռք բերված բոլոր պայմանավորվածությունների կատարմանը և Անկարայից էլ նույնն է ակնկալում: Այս մասին Sputnik Արմենիային հայտնեցին արտաքին գործերի նախարարությունից`պատասխանելով մեր գրավոր հարցմանը։ Ավելի վաղ Թուրքիայի նախագահ Ռեջեփ Թայիփ Էրդողանը չէր բացառել Հայաստանի հետ սահմանի բացման հնարավորությունը Երևանի և Բաքվի միջև խաղաղության գործընթացի դրական ելքի դեպքում։ ՀՀ ԱԳՆ-ից պարզաբանել են, որ Երևանն Անկարայից նույն հանձնառությունն ու պատրաստակամությունն է ակնկալում, այդ թվում` նաև երրորդ երկրների քաղաքացիների և դիվանագիտական անձնագրեր ունեցող անձանց համար հայ-թուրքական ցամաքային սահմանի բացման հարցում: Ինչ վերաբերում է Հայաստանի և Թուրքիայի միջև հարաբերությունների կարգավորման գործընթացի հարցով հատուկ ներկայացուցիչների հանդիպմանը, ապա ԱԳՆ-ում նշել են, որ հստակ պայմանավորվածության առկայության պարագայում հանրությունը կիրազեկվի պատշաճ ժամկետում։

09:55 - 26 հուլիսի, 2024

Գնահատում եմ վերջին տարիներին ԵՄ անդամ բոլոր երկրների գործընկերների հետ համագործակցությունը․ Արարատ Միրզոյան

Հայաստանի Հանրապետության արտաքին գործերի նախարար Արարատ Միրզոյանը տեսանյութ է տարածել՝ նշելով, որ գնահատում է վերջին տարիներին Եվրոպական միության անդամ բոլոր երկրների գործընկերների հետ համագործակցությունը։ Տեսանյութը տեղադրված է ՀՀ ԱԳ նախարարի X-ի միկրոբլոգում։ «Գնահատում եմ վերջին տարիներին ԵՄ անդամ բոլոր երկրների գործընկերների հետ համագործակցությունը, ակտիվ ներգրավվածությունը և գործընկերությունը, որոնք արտացոլվել են նաև ՀՀ-ԵՄ գործընկերության խորացման և կարևորագույն կետերի հասնելու մեջ», - նշել է ՀՀ ԱԳ նախարարը՝ տեսանյութին կից գրառման մեջ։

19:38 - 25 հուլիսի, 2024

ՀՀ-ին էսկալացիոն հռետորաբանության մեջ ներքաշելու փորձերն անընդունելի են. ՀՀ ԱԳՆ-ը՝ Ադրբեջանի ՊՆ-ի հայտարարության մասին

ՀՀ ԱԳՆ մամուլի խոսնակը մեկնաբանել է Ադրբեջանի ՊՆ հայտարարությունը․ «Ադրբեջանի ՊՆ տարածած հերթական հայտարարությունը Հայաստանի Հանրապետության բանակի կողմից Հայաստան-Ադրբեջան պետական սահմանին սադրիչ գործողությունների մասին անհասկանալի են: Հայաստանի Հանրապետության վարչապետի աշխատակազմի դիվանագիտական խողովակներով և հրապարակայնորեն արված առաջարկները սահմանային միջադեպերի և/կամ դրանց մասին տեղեկությունների հետաքննության՝ Հայաստան-Ադրբեջան համատեղ մեխանիզմ ստեղծելու մասին՝ շարունակում են անարձագանք մնալ Ադրբեջանի կողմից: Նման մեխանիզմի գործարկումը հնարավորություն կտար պարզաբանել ցանկացած իրավիճակ և կկանխարգելեր իրականությանը չհամապատասխանող տեղեկությունների տարածումը: Միևնույն ժամանակ, Հայաստանի Հանրապետությանն էսկալացիոն հռետորաբանության մեջ ներքաշելու փորձերն անընդունելի են: ՀՀ կառավարությունը շարունակում է հավատարիմ մնալ խաղաղության օրակարգին և չի շեղվելու այս ռազմավարությունից: Ինչ վերաբերվում է Հայաստանի Հանրապետության զինված ուժերի բարեփոխումներին, սպառազինության և տեխնիկայի ձեռքբերմանը, բազմիցս նշել ենք, որ մարտունակ բանակ ունենալը ցանկացած երկրի ինքնիշխան իրավունքն է, և Հայաստանի Հանրապետությունը պաշտպանության ու անվտանգության ոլորտում իր միջազգայնորեն ճանաչված տարածքի պաշտպանությունից դուրս որևէ այլ նպատակ չունի: Բանակի բարեփոխումների գործընթացում Հայաստանի Հանրապետությունը գործում է բացառապես միջազգային իրավունքի շրջանակներում: Նաև հիշեցնում ենք, որ Հայաստանի Հանրապետությունը դիվանագիտական խողովակներով և հրապարակային Ադրբեջանին առաջարկել է սպառազինությունների վերահսկման փոխադարձ մեխանիզմ ստեղծել և համապատասխան պայմանագիր կնքել, ինչը նույնպես Ադրբեջանը թողել է անպատասխան: Չնայած սրան, նաև այս առաջարկն է շարունակում մնալ ուժի մեջ»:

18:44 - 25 հուլիսի, 2024

Խաղաղության պայմանագրի` Հայաստանի պատասխան առաջարկները մշակման փուլում են. ԱԳՆ խոսնակ |azatutyun.am|

azatutyun.am: Խաղաղության պայմանագրի Հայաստանի պատասխան առաջարկները մշակման փուլում են, ասաց Արտգործնախարարության խոսնակ Անի Բադալյանը՝ ի պատասխան «Ազատության» հարցին, թե Երևանը պատասխանե՞լ է Բաքվի առաջարկներին՝ 10-րդ փաթեթին։ «ՀՀ պատասխան առաջարկները մշակման փուլում են՝ սեղմ ժամկետում խաղաղության պայմանագրի կնքման՝ ՀՀ կողմից արդեն իսկ հնչեցված, ներկայացված սկզբունքային առաջարկին համապատասխան», - նշել է ԱԳՆ ներկայացուցիչը:

15:04 - 25 հուլիսի, 2024

ՀՀ ԱԳՆ-ն Ազգային տոնի առթիվ շնորհավորել է Եգիպտոսին |tert.am|

tert.am: Հայաստանի Հանրապետության արտաքին գործերի նախարարությունն Ազգային տոնի առթիվ շնորհավորական ուղերձ է հղել Եգիպտոսի Արաբական Հանրապետության ժողովրդին։ Այս մասին տեղեկանում ենք Արտաքին գործերի նախարարության X-ի միկրոբլոգում կատարված գրառմանից։ «Սրտանց շնորհավորում ենք Եգիպտոսի բարեկամ ժողովրդին՝ Ազգային տոնի առթիվ։ Եգիպտոսին մաղթում ենք բարգավաճում և շարունակական զարգացում՝ փոխադարձ շահերի բոլոր հնարավոր ուղղություններով ակնկալելով հայ-եգիպտական համագործակցության ամրապնդում»,- ընդգծել է ԱԳ նախարարությունը:

17:35 - 23 հուլիսի, 2024

Լոնդոնում Արարատ Միրզոյանը մասնակցել է կլոր-սեղան քննարկման ՄԹ ռազմավարական հետազոտությունների միջազգային ինստիտուտում․ ՀՀ ԱԳՆ

Հուլիսի 22-ին Լոնդոնում ՀՀ ԱԳ նախարար Արարատ Միրզոյանը մասնակցել է կլոր-սեղան քննարկման ՄԹ ռազմավարական հետազոտությունների միջազգային ինստիտուտում (IISS)՝ փորձագիտական շրջանակների ներկայացուցիչների մասնակցությամբ։ Այս մասին հայտնում են ՀՀ արտաքին գործերի նախարարությունից․ «Իր ներածական խոսքում նախարար Միրզոյանը ներկայացրել է ՀՀ կառավարության կողմից իրականացվող բարեփոխումների օրակարգը, ձեռքբերումները, արտաքին քաղաքական առաջնահերթությունները և դրանց կյանքի կոչման ուղղությամբ միջազգային գործընկերների հետ համագործակցության հիմնական ուղղությունները։ Անդրադարձ է կատարվել Միացյալ Թագավորության հետ բարձր մակարդակի քաղաքական երկխոսության և նախորդ տարվա նոյեմբերին մեկնարկած ռազմավարական երկխոսությանը համահունչ համագործակցության զարգացման հեռանկարներին։ ԵՄ հետ խորացող գործընկերության համատեքստում նախարար Միրզոյանը վկայակոչել է նույն օրը ԵՄ խորհրդի կողմից ընդունված որոշումները՝ Հայաստանին Եվրոպական խաղաղության գործիքի ներքո աջակցության տրամադրման և վիզայի ազատականացման շուրջ երկխոսության մեկնարկի վերաբերյալ՝ ընդգծելով, որ դրանք համահունչ են ձևավորված արժեքահեն գործընկերությանը և ՀՀ քաղաքացիների եվրոպական ձգտումներին։ ՀՀ ԱԳ նախարարը հանգամանալից ներկայացրել է Հարավային Կովկասում առկա անվտանգային իրավիճակն ու հարևանների հետ հարաբերությունների կարգավորման ուղղությամբ վերջին զարգացումները: Նախարար Միրզոյանն ընդգծել է տարածաշրջանում կայունության ու հարատև խաղաղության հաստատման հարցում ՀՀ տեսլականը և դրա կյանքի կոչման ուղղությամբ իրականացվող քայլերը: Հայաստանի և Ադրբեջանի միջև հարաբերությունների կարգավորման գործընթացի համատեքստում Արարատ Միրզոյանն ընդգծել է սեղմ ժամկետներում խաղաղության պայմանագրի կնքման կարևորությունը: Ընդգծելով տարածաշրջանային տնտեսական զարգացման հարցում կայուն խաղաղության ապահովման նշանակությունը՝ ՀՀ արտաքին քաղաքական գերատեսչության ղեկավարը ներկայացրել է ՀՀ կառավարության կողմից առաջարկված «Խաղաղության խաչմերուկ» նախագիծը և միջազգային գործընկերների արձագանքը։ ՀՀ ԱԳ նախարարը նաև պատասխանել է ներկաներին հետաքրքրող այլ հարցերի», - նշված է հայտարարությունում։

18:57 - 22 հուլիսի, 2024

ՀՀ ԱԳՆ-ն առայժմ չի հստակեցնում՝ Հայաստանը կմասնակցի՞ Բաքվում կայանալիք կլիմայական գագաթնաժողովին, թե՞ ոչ |factor.am|

factor.am: Ադրբեջանը Հայաստանին հրավիրել է Բաքվում նոյեմբերին կայանալիք COP 29 կլիմայական գագաթնաժողովին, այս մասին հայտարարել էր Ադրբեջանի նախագահի օգնական Հիքմեթ Հաջիևը։ Նա նաև տեղեկացրել էր, որ նամակ է հղել Հայաստանի արտաքին գործերի նախարարին։ Factor.am-ը դիմեց ՀՀ ԱԳՆ՝ պարզելու՝ արդյո՞ք Հայաստանը ստացել է Ադրբեջանի հրավերը, եթե այո՝ հայկական կողմը կմասնակցի՞ Բաքվում կայանալիք գագաթնաժողովին։ Հարցին ի պատասխան ԱԳՆ խոսնակ Անի Բադալյանն արձագանքեց․«Հարցին անդրադարձ լինելու պարագայում կտեղեկացնենք»։ Ավելի վաղ Հաջիևը հայտարարել էր, որ Երևանը և Բաքուն խաղաղության համաձայնագրի հիմնարար սկզբունքների շուրջ կարող են համաձայնության գալ մինչև նոյեմբեր`մինչև Բաքվում կայանալիք ՄԱԿ-ի Կլիմայի փոփոխության համաժողովը՝ COP 29-ը։

18:13 - 22 հուլիսի, 2024

ՀՀ ԱԳՆ-ն շնորհավորել է Բելգիայի ժողովրդին և կառավարությանը Ազգային տոնի առթիվ

ՀՀ ԱԳՆ-ն X-ի միկրոբլոգում շնորհավորել է Բելգիայի ժողովրդին և կառավարությանը Ազգային տոնի առթիվ։ «Մենք բարձր ենք գնահատում մեր երկրների միջև վստահելի գործընկերությունը, որը հիմնված է փոխադարձ հարգանքի և բարեկամության, ինչպես նաև Հայաստան-ԵՄ կապերն էլ ավելի ամուր դարձնելու ընդհանուր տեսլականի վրա», - նշված է հայտարարությունում

12:19 - 21 հուլիսի, 2024

ՀՀ-ում Իրանի դեսպանը հայտարարել է, որ առաջիկայում Թուրքիայում կայանալու է «3+3» հարթակի հաջորդ հանդիպումը |armenpress.am|

armenpress.am: Հայաստանի Հանրապետությունում Իրանի Իսլամական Հանրապետության արտակարգ և լիազոր դեսպան Մեհդի Սոբհանին հայտարարել է, որ Հարավային Կովկասի հարցով «3+3» ձևաչափով (Հայաստան, Ադրբեջան, Վրաստան, Ռուսաստան, Թուրքիա, Իրան) համագործակցության հարթակի հաջորդ հանդիպումը տեղի կունենա մոտ ապագայում՝ Թուրքիայում։ Դեսպան Մեհդի Սոբհանին այս մասին հայտարարել է SNN գործակալությանը տված հարցազրույցում։ Մեհդի Սոբհանին, խոսելով Կապանում գործող իրանական հյուպատոսության մասին, նշել է, որ այն բարելավել է սահմանային հաղորդակցությունը և արագորեն լուծումներ է տալիս տեղում ծագող խնդիրներին։ Նա հայտնել է, որ Իրանի Իսլամական Հանրապետության նախագահի ընտրություններին մարդկանց մասնակցությունը մեծացնելու գործում արդյունավետ է եղել նաև հենց Կապանում Իրանի գլխավոր հյուպատոսությունը։ Սոբհանիի խոսքով՝ Կապանում աշխատող իրանցի վարորդները կարողացել են մասնակցել ընտրություններին, և դա ցույց է տալիս հյուպատոսության կարևորությունը Հայաստանում բնակվող իրանցիների գործերի առաջմղման գործում։ Նա հայտնել է, որ Իրանի հյուպատոսությունը կազմակերպում է նաև պարսկերենի դասընթացներ տեղի բնակչության և հայ մաքսավորների համար։ Անդրադառնալով Հայաստանի և Ադրբեջանի միջև հարաբերություններին՝ դեսպան Սոբհանին ևս մեկ անգամ վերահաստատել է Թեհրանի տեսլականն այս հարցում․ «Մեր դիրքորոշումը Լեռնային Ղարաբաղի հակամարտության վերաբերյալ միանգամայն հստակ է. մենք աջակցում ենք Ադրբեջանի և Հայաստանի տարածքային ամբողջականությանը և դեմ ենք միջազգային սահմանների փոփոխությանն ու տարածաշրջանում աշխարհաքաղաքական ցանկացած փոփոխության։ Նա հավելել է, որ անվտանգությունն ու կայունությունը տարածաշրջանում բխում են Իրանի շահերից, և Թեհրանը պատրաստ է աջակցություն ցուցաբերել այդ ուղղությամբ։ Սոբհանին հիշեցրել է, որ Իրանն առաջարկել է 3+3 ձևաչափի գաղափարը, և առաջին հանդիպման անցկացումը 13-րդ կառավարության ձեռքբերումներից մեկն է եղել։ «Այս հարթակի ԱԳ նախարարների հանդիպումն առաջին անգամ կայացավ Թեհրանում, հաջորդ հանդիպումը կկայանա մոտ ժամանակներս՝ Թուրքիայում», - տեղեկացրել է ՀՀ-ում ԻԻՀ դեսպանը։ Նշենք, որ ՀՀ ԱԳՆ մամլո խոսնակը «Փաստինֆո»-ին հայտնել է, որ «3+3» հարթակի հաջորդ հանդիպմանը ՀՀ մասնակցության վերաբերյալ պատշաճ ժամկետներում կտեղեկացնեն։

17:02 - 19 հուլիսի, 2024

Արարատ Միրզոյանն ու Միացյալ Թագավորությանը ներկայացուցիչը մտքեր են փոխանակել տարածաշրջանային հարցերի շուրջ

ՀՀ ԱԳ նախարար Արարատ Միրզոյանը հանդիպում է ունեցել Միացյալ Թագավորության արտաքին, համագործակցության և զարգացման հարցերով պետքարտուղար Դեյվիդ Լամմիի հետ։ Այս մասին հայտնում են Արտաքին գործերի նախարարությունից: Քննարկվել են երկկողմ օրակարգի հարցեր։ Անդրադարձ է կատարվել ՀՀ-ՄԹ քաղաքական երկխոսության և փոխադարձ հետաքրքրություն ներկայացնող ոլորտներում հարաբերությունների խորացման հնարավորություններին՝ նախորդ տարի նոյեմբերին մեկնարկած ռազմավարական երկխոսությանը համահունչ: ՀՀ ԱԳ նախարարը ներկայացրել է Հայաստանի և Ադրբեջանի միջև հարաբերությունների կարգավորման գործընթացում վերջին զարգացումները՝ շեշտելով սեղմ ժամկետներում խաղաղության պայմանագրի ստորագրման հնարավորությունը և կարևորությունը: Նախարար Միրզոյանը շնորհակալություն է հայտնել խաղաղության գործընթացով ՄԹ հետաքրքրվածության և աջակցության համար:

18:43 - 18 հուլիսի, 2024

ՀՀ ԱԳՆ-ն նշում է՝ ադրբեջանական կողմն է մերժել Փաշինյան-Ալիև հանդիպման առաջարկը

Հայկական կողմն առաջարկել է Հայաստանի վարչապետի և Ադրբեջանի նախագահի երկկողմ հանդիպում ունենալ ՄԹ֊ում ընթացող Եվրոպական քաղաքական համայնքի գագաթաժողովի շրջանակներում, սակայն ադրբեջանական կողմը մերժել է առաջարկը։ Այս մասին հայտնում է ՀՀ ԱԳՆ խոսնակը։ ԱԳՆ-ից նշել են, որ հայկական կողմի առաջարկն ուժի մեջ է: Հայկական կողմը նաև վերահաստատում է իր առաջարկը` ինտենսիվացնել բարձր և բարձրագույն մակարդակով բանակցությունները և մեկ ամսվա ընթացքում հասնել խաղաղության պայմանագրի ստորագրմանը։ Հիշեցնենք, որ Իլհամ Ալիևի օգնական Հիքմեթ Հաջիևը այսօր հայտարարել էր, թե բրիտանական կողմից առաջարկ է եղել հանդիպում անցկացնել Հայաստանի վարչապետի, Ադրբեջանի նախագահի և Մեծ Բրիտանիայի վարչապետի միջև, ապա շարունակել Հայաստան-Ադրբեջան ֆորմատով։ Հաջիևը նշել էր, թե հայկական կողմը մերժել է առաջարկը, ինչը Ադրբեջանը դիտարկում է որպես երկխոսությունից և խաղաղության օրակարգն առաջ մղելուց հետ կանգնելու մտադրության դրսևորում։

14:41 - 18 հուլիսի, 2024

Հայաստանը 102 միլիոն եվրոյի նոր վարկ կվերցնի |civilnet.am|

civilnet.am: Վերակառուցման և զարգացման միջազգային բանկն ու Հայաստանի կառավարությունը կստորագրեն «Համընդհանուր առողջապահական ծածկույթի ծրագրի իրականացում» վարկային համաձայնագիրը։ Դրանով ՀՀ-ին կտրամադրվի 102 միլիոն եվրոյի վարկ։ Կառավարությունը վարկային համաձայնագիրը հավանության կարժանացնի հուլիսի 18-ի հերթական նիստում։ Ծրագիրը ունենալու է երեք բաղադրիչ՝ բուժօգնության որակի բարելավում, առողջապահական ծախսերի արդյունավետության բարձրացում և առողջապահական ծառայություններից օգտվելու ֆինանսական խոչընդոտների նվազեցում։ Վարկի մարման ժամկետը 25 տարի է, որից 15-ն արտոնյալ ժամանակահատվածն է։ Վարկային համաձայնագրին կից փաստաթղթերի փաթեթում որոշ փոփոխություններ է առաջարկել արտաքին գործերի նախարարությունը. մասնավորապես Program Appraisal Document оn а Proposed Loan (առաջարկվող վարկի ծրագրի գնահատման փաստաթուղթ) կոչվող փաստաթղթում Russia’s invasion of Ukraine (Ռուսաստանի ներխուժումն Ուկրաինա) եզրույթն առաջարկվել է փոխել ու դարձնել war in Ukraine (պատերազմ Ուկրաինայում)։ Նույն փաստաթղթում conflict with Azerbaijan (Ադրբեջանի հետ հակամարտություն) եզրույթը ԱԳՆ-ն առաջարկել է դարձնել Azerbaijan’s military offensive against Nagorno-Karabakh (Ադրբեջանի կողմից ռազմական հարձակում Լեռնային Ղարաբաղի դեմ)։ ԱԳՆ-ի այս առաջարկները քննարկվել են ու, ըստ առողջապահության նախարարության, ներկայացվել է փոխզիջումային տարբերակ։

11:01 - 18 հուլիսի, 2024

Միրզոյանը շնորհավորել է Մեցոլային՝ Եվրախորհրդարանի նախագահի պաշտոնում ընտրվելու առիթով

Հայաստանի արտգործնախարար Արարատ Միրզոյանը X-ի իր էջում հայտնել է, որ միանում է գործընկերների՝ Ռոբերտա Մեցոլային ուղղված շնորհավորանքներին, Եվրախորհրդարանի նախագահի պաշտոնում տպավորիչ վերընտրության համար: «Եվրախորհրդարանը կարևոր դեր է խաղում Հայաստան-ԵՄ ամուր գործընկերության օրակարգի, տարածաշրջանային խնդիրների առաջխաղացման գործում, և մենք անհամբեր սպասում ենք այդ ճանապարհի շարունակությանը»,- գրել է Միրզոյանը:

21:05 - 17 հուլիսի, 2024

Ցուցադրություն՝ նվիրված հայ-ճապոնական հարաբերություններին. Ազգային արխիվում հյուրընկալվել է երկրի դեսպանը

Արդարադատության նախարարության գլխավոր քարտուղար Սիրվարդ Գևորգյանը ներկա է եղել Հայաստանի ազգային արխիվում կազմակերպած ցուցադրությանը՝ նվիրված հայ-ճապոնական հարաբերությունների պատմությանը։ Ցուցադրությունը կազմակերպվել է Հայաստանի ազգային արխիվի և «Արումենիա-Նիպոն» հայ-ճապոնական գիտամշակութային միության հետ համատեղ։ Այդ մասին հայտնում են ՀՀ արդարադատության նախարարությունից: Ազգային արխիվի տնօրեն Արթուր Ստեփանյանն ընդգծել է, որ միջոցառման անցկացման նպատակը հայ-ճապոնական հարաբերությունների վերհանումն է, որով սկիզբ է դրվում հայ-ճապոնական նոր երկկողմ հարաբերությունների հետագա խորացմանն ու զարգացմանը։ Հայաստանում Ճապոնիայի արտակարգ և լիազոր դեսպան Ն․Գ․ Աոկի Յուտական, ողջունելով ներկաներին, նշել է, որ ցուցադրված փաստաթղթերը, կինոֆոտո փաստաթղթերը և Հայաստանում հրատարակված մի շարք արժեքավոր գրքերը վկայում են հայ-ճապոնական սերտ փոխհարաբերությունների մասին։ Ցուցադրությանը ներկայացվել են Հայաստանի ազգային արխիվում պահպանվող արխիվային փաստաթղթեր, որոնք վերաբերում են հայ-ճապոնական դիվանագիտական հարաբերությունների հաստատմանը, գիտական և մշակութային կապերին, Հայկական հարցին և դրա հետ առնչվող Ճապոնիայի մասնակցությանը։ Հետաքրքիր փաստաթղթեր են ներկայացված աշխարհում առաջին կին դիվանագետ, 1920 թ․ Ճապոնիայում Հայաստանի առաջին Հանրապետության դիվանագիտական ներկայացուցիչ Դիանա Աբգարի մասին։ Ցուցադրված են կարևոր ու արժեքավոր փաստաթղթեր՝ ազգերի ու ժողովուրդների միջև մարդասիրական վառ դրսևորումներով, որոնք վերաբերում են 1923 թ. Ճապոնիայի երկրաշարժի ժամանակ Հայաստանի կողմից ցուցաբերված օգնությանը և, փոխադարձաբար, 1988 թ. Սպիտակի երկրաշարժի ժամանակ Ճապոնիայի կողմից ցուցաբերված մարդասիրական օգնությանը։

20:14 - 17 հուլիսի, 2024

Արարատ Միրզոյանը շեշտել է ՀՀ կառավարության ջանքերը ԼՂ-ից տեղահանված անձանց աջակցության, իրավունքների պաշտպանության ուղղությամբ

Նյու Յորքում ՀՀ կամավոր 3-րդ զեկույցի ներկայացնելիս ՀՀ ԱԳ նախարարը նշել է «Մարդասիրական գործողությունների» բաղադրիչը՝ որպես Կայուն զարգացման նպատակների իրականացման ճանապարհին ՀՀ համար առանցքային երեք բաղադրիչներից մեկը՝ զարգացման և խաղաղության բաղադրիչներին զուգահեռ: Ինչպես հայտնում են ՀՀ ԱԳՆ-ից, ի թիվս այլնի, շեշտվել են ՀՀ Կառավարության ջանքերը ԼՂ-ից բռնի տեղահանված անձանց աջակցության, իրավունքների պաշտպանության ուղղությամբ:

16:37 - 17 հուլիսի, 2024