ԱԳՆ - infocom.am

ԱԳՆ

ԱԳՆ-ն ՀՀ արտաքին քաղաքական գերատեսչությունն է։ Հիմնադրվել է 1918թ.-ին։ Նախարարությունը մշակում եւ իրականացնում է ՀՀ կառավարության արտաքին քաղաքականությունը: Նախարարության ստեղծումը, վերակազմակերպումը եւ գործունեության դադարեցումը կարգավորվում է օրենքով: Հայաստանի Հանրապետության արտաքին գործերի նախարարությունը գործում է ՀՀ Սահմանադրության, «Կառավարության կառուցվածքի եւ գործունեության մասին», «Դիվանագիտական ծառայության մասին» եւ այլ օրենքների հիման վրա: Արտաքին գործերի նախարարության աշխատանքներն ուղղված են Հայաստանի Հանրապետության արտաքին անվտանգության ամրապնդմանը, զարգացման արտաքին բարենպաստ պայմանների ապահովմանը, միջազգային կազմակերպություններում եւ միջազգային գործընթացներում ներգրավվածության խորացմանը, բարեկամ եւ գործընկեր երկրների հետ համագործակցության առավել ամրապնդմանը:

Արտաքին գործերի նախարարը Արա Այվազյանն է։ Տեղակալներն են Արմեն Ղեւոնդյանը, Արտակ Ապիտոնյանը, Գագիկ Ղալաչյանը, Ավետ Ադոնցը

Ռոբերտ Աբիսողոմոնյանը մասնակցել և ելույթով հանդես է եկել ԵԱՀԿ Անվտանգության վերանայման տարեկան համաժողովին

ՀՀ ԱԳ նախարարի տեղակալ Ռոբերտ Աբիսողոմոնյանը մասնակցել է ԵԱՀԿ Անվտանգության վերանայման տարեկան համաժողովին: Այս մասին հայտնում են ԱԳՆ-ից: Նա հանդես է եկել ելույթով, որում նշել է. «Այս հանդիպումը տեղի է ունենում գլոբալ անվտանգության ճարտարապետության աննախադեպ և խիստ մտահոգիչ վատթարացման ֆոնին, այդ թվում՝ ԵԱՀԿ տարածաշրջանում: Շարունակվող ճգնաժամերն ու հակամարտությունները, մեկտեղված մարդու իրավունքների և միջազգային մարդասիրական իրավունքի մշտական խախտումներիհետ, քայքայում են այն հիմնարար սկզբունքները, որոնց վրա հիմնված է եղել Երկրորդ համաշխարհային պատերազմից և Սառը պատերազմից հետո ձևավորված անվտանգության համակարգը։ Չափազանցություն չի լինի ասել, որ տարեցտարի աշխարհն աստիճանաբար մոտենում է անդառնալիության կետին։ Սակայն, բարեբախտաբար, մենք դեռևս չենք հատել այդ կրիտիկական շեմը, թեկուզ և քիչ ժամանակ է մնացել՝ գնահատելու և ճիշտ որոշում կայացնելու համար: Այս տարի մենք նշում ենք Հելսինկյան եզրափակիչ ակտի 50-ամյակը։ Դեկալոգը՝ իր հիմնարար սկզբունքներով, ինչպիսիք են տարածքային ամբողջականության հարգումը, ինքնիշխան հավասարությունը, սահմանների անխախտելիությունը, ուժի չկիրառումը և վեճերի խաղաղ կարգավորումը, ձևավորում է մեր ընդհանուր հանձնառությունների շրջանակը՝ ուղղորդելով միջպետական հարաբերությունների թերևս անկատար, սակայն քաղաքականապես պարտավորեցնող վարքագիծը։ Սակայն այսօր այս հիմնարար սկզբունքները համակարգված և միտումնավոր կերպով անտեսվում են։ Տասնամյակների ընթացքում ձևավորված այս կոնսենսուսային համակարգը մարտահրավերների է բախվում բազմաթիվ ուղղություններով։ Այս համատեքստում չափազանց կարևոր է վերահաստատել մեր հանձնառությունը հավաքական անվտանգության հիմք հանդիսացող սկզբունքներին և գործիքակազմին։ Հաշվի առնելով, որ ԱՎՏՀ-ն ընձեռում է կարևոր հնարավորություն՝ գնահատելու ԵԱՀԿ մասնակից պետությունների ջանքերը քաղաքական-ռազմական հարթությունում՝ առանձնահատուկ ուշադրություն պետք է ընձեռել սպառազինությունների վերահսկման ճարտարապետության առկա վիճակին։ Հայաստանը շարունակում է խորապես հավատալ, որ գործուն և վստահելի սպառազինությունների վերահսկման համակարգը կենսական նշանակություն ունի տարածաշրջանային կայունության ապահովման, փոխադարձ վստահության ձևավորման և էսկալացիայի կանխարգելման համար։ Տասնամյակներ շարունակ Հայաստանը ցուցաբերել է լիարժեք հավատարմություն սպառազինությունների վերահսկման ռեժիմի ներքո իր պարտավորություններին, ներառյալ՝ ԵՍԶՈւ-ի և Վիեննայի փաստաթղթի շրջանակներում։ Սակայն մեր տարածաշրջանում սովորական սպառազինությունների վերահսկման ռեժիմի ամբողջականությունը լրջորեն խաթարվել է՝ դրա հիմնական դրույթների համակարգային և զանգվածային խախտումների հետևանքով, ինչը, զուգորդվելով միջազգային հանրության կողմից նման խախտումների վաղ ազդանշանների ժամանակին հայտնաբերման և վերահաս էսկալացիան կանխելու կանխարգելիչ քայլեր ձեռնարկելու անկարողության հետ, այս մեխանիզմները վերածել է ուժի կիրառման համար հարմար ծխածածկույթի։ Այնուամենայնիվ, Հայաստանը, հավատարիմ մնալով տարածաշրջանում խաղաղության և կայունության հաստատմանը, ինչպես նաև հարևանների միջև վստահության և վստահելիության ձևավորմանը, Ադրբեջանին է ներկայացրել գրավոր առաջարկ՝ ուղղված սպառազինությունների փոխադարձ վերահսկման երկկողմ մեխանիզմի ստեղծմանը։ Մենք վստահ ենք, որ նման երկկողմ պայմանավորվածությունների միջոցով հնարավոր է խթանել թափանցիկությունը, կառուցել վստահություն և նվազեցնել սպառնալիքների ընկալման ռիսկերը։ Ի հավելումն, Հայաստանը հանդես է եկել Հայաստանի և Ադրբեջանի միջև միջպետական սահմանի երկայնքով հրադադարի հնարավոր խախտումների անաչառ հետաքննության համատեղ մեխանիզմ ստեղծելու առաջարկով՝ հավելյալ ընդգծելով իր հանձնառությունը երկխոսությանը և լարվածության թուլացմանը։ Մենք շարունակում ենք համոզված լինել, որ նման մեխանիզմները կարևոր են տարածաշրջանում վստահության և կայունության ամրապնդման համար, և վերահաստատում ենք մեր պատրաստակամությունը՝ ներգրավվելու կենսական նշանակության այս հարցերի շուրջ բովանդակային երկխոսության մեջ։ Պարո՛ն նախագահող, Մինչ աշխարհը բախվում է հակամարտությունների կտրուկ աճի և անցնում է ժամանակակից պատմության ամենաանհանգիստ ժամանակաշրջաններից մեկը, Հայաստանը անդրդվելի է իր հանձնառության մեջ՝ հասնելու արդար և տևական խաղաղության Հարավային Կովկասում, որը վաղուց ճանաչվել է որպես ԵԱՀԿ պատասխանատվության գոտու ամենաանկայուն տարածաշրջաններից մեկը։ Իհարկե, մենք որևէ պատրանք չունենք առ այն, որ խաղաղությունը կարող է հեշտությամբ հաստատվել։ Հայաստանի համար տարածաշրջանային խաղաղության ուղին հենվում է հստակ և տրամաբանական բանաձևի վրա՝ Ադրբեջանի հետ հարաբերությունների կարգավորում՝ հիմնված ինքնիշխանության, տարածքային ամբողջականության և միջազգայնորեն ճանաչված սահմանների անխախտելիության սկզբունքների վրա։ Այս բանաձևը մեր տարածաշրջանին տալիս է իրական հնարավորություն՝ ճեղքելու թշնամանքի շղթան և կառուցելու ավելի կայուն ու համագործակցային ապագա։ Ավելի քան երեք տարի տևած հագեցած բանակցություններից հետո սույն թվականի մարտին արձանագրվել է մի շրջադարձային առաջընթաց՝ Հայաստանը և Ադրբեջանը համաձայնության են եկել խաղաղության և միջպետական հարաբերությունների հաստատման մասին համաձայնագրի նախագծի տեքստի շուրջ։ Այս համաձայնագրի վերջնականացումը իրական առաջընթաց է՝ մի քայլ, որը ստեղծում է աննախադեպ հնարավորություն առաջ շարժվելու հակամարտությունների ժառանգությունից և ինստիտուցիոնալացնելու խաղաղությունը՝ հիմնված փոխադարձ ճանաչման և միմյանց տարածքային ամբողջականության հարգման վրա։ Այս առումով Հայաստանի դիրքորոշումը միանշանակ է՝ մենք չպետք է թույլ տանք այս պատմական պահի բացթողումը։ Այդ նպատակով է Հայաստանը առաջարկել խորհրդակցություններ սկսել փաստաթղթի ստորագրման ժամկետների և վայրի շուրջ, և, չնայած բոլոր դժվարություններին, շարունակում է այդ ուղղությամբ իր ջանքերը: Սակայն, ինչպես ցանկացած երկկողմ խաղաղության համաձայնագրի դեպքում, դրա հաջողությունը կախված է երկու կողմերի անկեղծ հանձնառությունից։ Ի վերջո, ստորագրությունը սոսկ ձևականություն չէ. այն քաղաքական կամքի դրսևորում է և իրավական ու բարոյական պարտավորության հիմք։ Ցավոք, համաձայնագրի նախագծի վերջնականացումից հետո Ադրբեջանը ներկայացրել է արհեստական նախապայմաններ․ մեկը՝ ԵԱՀԿ Մինսկի գործընթացի կառույցների լուծարման վերաբերյալ, իսկ մյուսը՝ ՀՀ Սահմանադրության մեջ ենթադրյալ տարածքային հավակնությունների առկայության առնչությամբ։ Հատուկ անհրաժեշտություն չկա կրկին անդրադառնալ այս հարցերում Հայաստանի հայտնի դիրքորոշմանը։ Մենք արդեն մանրամասն և լիակատար թափանցիկությամբ ներկայացրել ենք մեր տեսակետները, այդ թվում՝ հենց այս հարթակում, մասնավորապես՝ այս տարվա մարտին մեր նախաձեռնությամբ հրավիրված ԵԱՀԿ Մշտական խորհրդի հատուկ նիստի ընթացքում։ Մենք հավատում ենք, որ խաղաղության համաձայնագրի ստորագրումը ամենակարճ ճանապարհն է պատասխանելու բոլոր հարցերին, հասցեագրելու առնչվող մտահոգությունները և հնարավոր խոչընդոտները։ Այն ներկայացնում է առաջին և ամենակարևոր քայլը՝ առճակատումը համագործակցության վերածելու ուղղությամբ։ Ավելին, Հայաստանը վստահ է, որ Հարավային Կովկասում բոլոր առևտրային և տրանսպորտային կապուղիների ապաշրջափակումը՝ ինքնիշխանության, տարածքային ամբողջականության, ազգային իրավազորության, ինչպես նաև հավասարության ու փոխադարձության սկզբունքների հիման վրա, հնարավորություն կտա օգտագործել տարածաշրջանի մինչ այժմ չիրացված ներուժը և կբացի հսկայական հնարավորություններ Հարավային Կովկասի և այլ տարածաշրջանների բարեկեցության համար։ Սա նաև մեծապես կնպաստի տարածաշրջանային խաղաղությանը, կայունությանը ու կայուն զարգացմանը: Այս կապակցությամբ Հայաստանի կառավարության «Խաղաղության խաչմերուկ» նախաձեռնությունն ներուժ ունի դառնալու տարածաշրջանային համագործակցության հարթակ և ծառայելու որպես վստահության ձևավորման կարևոր միջոց, որը կարող է էական ներդրում ունենալ տևական խաղաղության հաստատման ջանքերում։ Հարգելի՛ գործընկերներ, Երկխոսության և բարեխիղճ ներգրավվածության հանդեպ անկեղծ հանձնառությունը խաղաղություն կառուցելու կարևոր հենքն է։ Այս առումով մտահոգիչ է, որ մենք շարունակում ենք լսել բարձրաստիճան պաշտոնյաների հրապարակային հայտարարություններ, որոնք պարունակում են բացահայտ սպառնալիքներ և տարածքային հավակնություններ Հայաստանի Հանրապետության ինքնիշխան տարածքի նկատմամբ, այդ թվում՝ «Արևմտյան Ադրբեջան» կոչվող խոսույթի միջոցով։ Ցավոք, ԵԱՀԿ հարթակները ևս շահարկվում են այդ խոսույթը տարածելու նպատակով։ Մենք հաստատակամորեն հավատում ենք, որ բոլոր ջանքերը, այդ թվում՝ երկու կառավարությունների կողմից, պետք է ուղղված լինեն իրենց հասարակություններին ուղղորդելուն և քաջարելելուն՝ կենտրոնանալու տևական խաղաղության հաստատման ու բարիդրացիական հարաբերությունների զարգացման վրա։ Հայաստանի հանձնառությունը տարածաշրջանում խաղաղության և կայունության հաստատմանը ևս մեկ անգամ դրսևորվում է մեր երկրի կողմից Թուրքիայի հետ հարաբերությունների կարգավորման գործընթացում ձեռնարկված քայլերով: Այս համատեքստում կցանկանայի առանձնացնել ՀՀ վարչապետի վերջերս կատարած Թուրքիա այցը, որի ընթացքում կողմերը վերահաստատել են կառուցողական երկխոսությունը շարունակելու պատրաստակամությունը և ընդգծել շոշափելի արդյունքների հասնելու կարևորությունը։ Մենք համոզված ենք, որ Հայաստան-Թուրքիա հարաբերությունների կարգավորումը ոչ միայն կլինի էական երկկողմ առաջընթաց, այլև դրական ազդեցություն կունենա առավել լայն տարածաշրջանային խաղաղության օրակարգի վրա։ Ամփոփելով` թույլ տվեք վերահաստատել մեր համոզմունքը, որ խաղաղությունը ոչ միայն բարոյական հրամայական է, այլև ռազմավարական անհրաժեշտություն։ ԵԱՀԿ-ն և իր մասնակից պետությունները պետք է շարունակեն վճռականորեն աջակցել այն գործընթացներին, որոնք նախընտրում են երկխոսությունը՝ բաժանման փոխարեն, և համագործակցությունը՝ հակամարտության փոխարեն։ Հայաստանը պատրաստ է կառուցողականորեն նպաստել այդ տեսլականի իրականացմանը։

20:40 - 26 հունիսի, 2025

Իրանում ստեղծված իրավիճակը սպառնալիքի տակ է դնում ոչ միայն տարածաշրջանային կայունությունը, այլ նաև գլոբալ խաղաղությունը․ ԱԳ փոխնախարար

Հունիսի 20-ին ԱԳ նախարարի տեղակալ Ռոբերտ Աբիսողոմոնյանը մասնակցել և ելույթով է հանդես եկել Փախստականների համաշխարհային օրվա կապակցությամբ ՄԱԿ Փախստականների գերագույն հանձնակատարի երևանյան գրասենյակի կողմից Կոմիտասի անվան թանգարան-ինստիտուտում կազմակերպված միջոցառմանը: Այս մասին տեղեկանում ենք ՀՀ ԱԳՆ-ից։ ՀՀ ԱԳ նախարարի տեղակալն իր խոսքում նշել է. «Ձե՛րդ գերազանցություններ, Հարգելի՛ հյուրեր, Տիկնա՛յք և պարոնա՛յք, 2000 թվականի դեկտեմբերի 4-ին ՄԱԿ-ի Գլխավոր ասամբլեան 55/76 բանաձևով որոշեց, որ 2001 թվականից հունիսի 20-ը նշվում է որպես Փախստականների համաշխարհային օր։ Այսօր՝ հունիսի 20-ին, մեր աջակցությունն ու համերաշխությունն ենք հայտնում բոլոր փախստականներին: Ներկայումս աշխարհը բախվում է մի շարք բարդ մարտահրավերների՝ շարունակական հակամարտություններից և քաղաքական անկայունությունից մինչև կլիմայի փոփոխություն, նորագույն տեխնոլոգիների չարաշահում, անդրազգային հանցագործությունների աճ: Այս մարտահրավերները, ստեղծում են մի միջավայր, որտեղ տեղահանությունը դառնում է չափազանց տարածված իրականություն: Ցավոք, մեր տարածաշրջանը ևս բացառություն չէ այս երևույթներից: Այս համատեքստում, չեմ կարող չարտահայտել իմ խորը մտահոգությունն Իրանում ստեղծված իրավիճակի կապակցությամբ, ինչը սպառնալիքի տակ է դնում ոչ միայն տարածաշրջանային կայունությունը, այլ նաև գլոբալ խաղաղությունը: Հարգելի՛ ներկաներ, Լեռնային Ղարաբաղում ստեղծված իրավիճակն այս դաժան իրականության ևս մի վառ օրինակ էր: 2023 թվականին ավելի քան 115.000 մարդ ստիպված եղավ լքել իր տունը՝ անվտանգություն և պաշտպանվածություն փնտրելու նպատակով: Սա պարզապես վիճակագրություն չէ: Խոսքը ընտանիքների, կանանց, երեխաների և ծերերի մասին է, որոնց կյանքն անդառնալիորեն փոխվել է բռնության և անկայունության պատճառով։ Օգտվելով այս հնարավորությունից՝ կցանկանայի իմ անկեղծ երախտագիտությունը հայտնել բոլոր միջազգային կազմակերպություններին, գործընկեր և դոնոր երկրներին, որոնք կանգնած են Հայաստանի կողքին այս դժվարին մարտահրավերները հաղթահարելու գործում։ Առանձնահատուկ կցանկանայի ընդգծել ՄԱԿ-ի Փախստականների հարցերով գերագույն հանձնակատարի գրասենյակի դերը, որի ներգրավվածությունը կարևոր է եղել փախստականների հրատապ կարիքները հասցեագրելու համար։ Մենք բարձր ենք գնահատում ՄԱԿ-ի Փախստականների հարցերով գերագույն հանձնակատարի գրասենյակի աջակցությունը Հայաստանում ներկայումս իրականացվող ծրագրերին՝ ուղղված փախստականների հոսքի ազդեցությունը մեղմելուն՝ վերջիններիս ինտեգրելով մեր երկրի զարգացման ռազմավարության մեջ։ Մենք հաստատակամ ենք փախստականներին աջակցելու և նրանց իրավունքները պաշտպանելու մեր հանձնառության մեջ՝ ինչպես ազգային, այնպես էլ միջազգային մակարդակներում: Այս համատեքստում ցանկանում եմ նշել, որ փախստականների կարիքները հասցեագրելու համար Հայաստանը ստանձնել է մի շարք կարևոր հանձնառություններ Փախստականների համաշխարհային ֆորումի շրջանակներում և արդեն իսկ զգալի առաջընթաց է գրանցել դրանց կիրարկման գործում։ Հիմնական հաջողություններից մեկը քաղաքացիության մասին ազգային օրենքի փոփոխությունն է, որը հանգեցրել է քաղաքացիություն չունեցող անձանց 50%-ով կրճատմանը։ Հայաստանն ակտիվորեն մասնակցում է նաև ՄԱԿ-ի Փախստականների հարցերով գերագույն հանձնակատարի գրասենյակի հետ քննարկումներին և մի շարք նախաձեռնությունների մշակմանը՝ ուղղված երկարաժամկետ ծրագրերի իրագործմանը, որոնք կհասցեագրեն ինչպես Լեռնային Ղարաբաղից բռնի տեղահանված փախստականների մարդասիրական կարիքները, այնպես էլ նրանց ինտեգրումը հյուրընկալող համայնքներում։ Միջազգային գործընկերների հետ համատեղ արդեն իսկ մշակվել են մի շարք հայեցակարգային փաստաթղթեր, մասնավորապես՝ «Փախստականների արձագանքման և համակարգման վերաբերյալ քաղված դասեր», «Հումանիտար-զարգացման կապի գործառնականացումը Հայաստանում», ինչպես նաև «Փախստականների և ընդունող համայնքների համար ներառական կենսապահովման ազգային շրջանակը», որոնք ուրվագծում են ընդունող համայնքների արձագանքման և փախստականների՝ այդ համայնքներում ինտեգրման հեռանկարները, սոցիալական համախմբվածության ապահովման ուղիները։ Ներկայումս փախստականների համար երկարաժամկետ առաջնահերթություններից մեկը նրանց ներառումն է Հայաստանի սոցիալական, մշակութային և տնտեսական զարգացման օրակարգում՝ իրենց սոցիալական և տնտեսական իրավունքներից լիարժեք օգտվելով, սոցիալական բնակարանային և զբաղվածության ծրագրերի իրականացմամբ, այդպիսով ուշադրությունը տեղափոխելով արտակարգ իրավիճակներին արձագանքելուց երկարաժամկետ կարիքները հոգալու վրա՝ լրացնելով մարդասիրական կարիքների և զարգացման միջև բացը։ Հարգելի՛ ներկաներ, Մեր առջև ծառացած մարտահրավերներն անհաղթահարելի չեն, դրանք սակայն պահանջում են համակարգված և համագործակցային ջանքեր: Միջազգային հանրությունն ունի սրբազան պարտավորություն՝ պահպանելու 1951 թվականի Փախստականների մասին կոնվենցիայի և դրա՝ 1967 թվականի արձանագրության սկզբունքները, որոնք ամրագրում են փախստականների հիմնարար իրավունքները: Մենք ունենք առաքելություն՝ պայքարել մարդատյացության և խտրականության դեմ՝ խթանելով մեր հասարակություններում համակրանքի և փոխըմբռնման միջավայրը։ Ցանկանում եմ մեջբերել ՄԱԿ-ի գլխավոր քարտուղար Անտոնիո Գուտերեշի խոսքերը՝ «Մենք չպետք է հայացքներս թեքենք։ Մենք չպետք է անտարբեր լինենք»։ Մեր համատեղ գործողությունները պետք է հանգեցնեն շոշափելի արդյունքների՝ ի նպաստ նրանց, որոնք ստիպված են փախչել։ Եզրափակելով խոսքս՝ կոչ եմ անում միասնական լինենք փախստականներին աջակցելու մեր վճռականության մեջ՝ գիտակցելով, որ նրանց դժվարին վիճակը համատեղ մարտահրավեր է, որը պահանջում է մեր անսասան նվիրվածությունն ու կարեկցանքը։ Միասին մենք կարող ենք ճանապարհ հարթել դեպի ապագա, որտեղ յուրաքանչյուր անհատ, անկախ հանգամանքներից, կարող է ապրել արժանապատիվ և անվտանգ: Շնորհակալություն»:

10:00 - 21 հունիսի, 2025