Նիկոլ Փաշինյան

Նիկոլ Վովայի Փաշինյան, ՀՀ գործող վարչապետն է։ ՀՀ Ազգային ժողովի նախկին պատգամավոր, «Քաղաքացիական պայմանագիր» կուսակցության վարչության անդամ։

Ծնվել է 1975 թվականի հունիսի 1-ին՝ Իջեւան քաղաքում։ 1999-2012 թվականներին եղել է քաղաքական ուղղվածության «Հայկական ժամանակ» օրաթերթի գլխավոր խմբագիրը, 2012 թվականի մայիսի 6-ից մինչեւ վարչապետի պաշտոնում ընտրվելը՝ Հայաստանի Հանրապետության Ազգային ժողովի պատգամավոր` ընդդիմադիր «Ելք» խմբակցությունից։ Որպես կուսակցական գործիչ համարվում է «Քաղաքացիական պայմանագիր» կուսակցության, ինչպես նաեւ «Իմպիչմենտ» եւ «Ելք» դաշինքների համահիմնադիր։

2018 թվականին Սերժ Սարգսյանի երրորդ պաշտոնավարման դեմ պայքարող Նիկոլ Փաշինյանը սկսում է «Իմ քայլը» նախաձեռնությունը եւ իր համախոհների հետ միասին Գյումրուց քայլարշավով ուղեւորվում Երեւան։ Գործողությունների արդյունքում ապրիլի 23-ին Սերժ Սարգսյանը հրաժարական է տալիս։

Մայիսի 8-ին Փաշինյանն ընտրվում է Հայաստանի Հանրապետության 16-րդ վարչապետ։ Վարչապետի պաշտոնում Նիկոլ Փաշինյանը վերընտրվում է 2018-ի դեկտեմբերի և 2021-ի հունիսի խորհրդարանական արտահերթ ընտրությունների ժամանակ;

Փաշինյանի գլխավորությամբ քննարկվել է Քաղաքաշինության բնագավառի զարգացման ռազմավարական ծրագրի իրագործման ընթացքը

Վարչապետ Նիկոլ Փաշինյանի գլխավորությամբ տեղի է ունեցել խորհրդակցություն, որի ընթացքում ներկայացվել է Քաղաքաշինության բնագավառի զարգացման ռազմավարական ծրագրի իրագործման ընթացքը: Քաղաքաշինության կոմիտեի նախագահ Եղիազար Վարդանյանը ներկայացրել է ոլորտի ռազմավարական ուղղություններն ու դրանց իրականացման համար նախատեսված միջոցառումները: Ընդգծվել է, որ աշխատանքներ են իրականացվել քաղաքաշինության բնագավառի լիցենզավորման և հավաստագրման թվայնացման ուղղությամբ, մասնավորապես՝ արդեն իսկ գործարկվել են լիցենզավորման, որակավորման և գրանցամատյանների ձևավորման համակարգերը, առաջիկայում գործարկվելու են շարունակական մասնագիտական զարգացման, հաշվետվողականության և քաղաքաշինական գործունեություն իրականացնող բոլոր կազմակերպությունների վարկանիշավորման համակարգերը: Նշվել է, որ ամբողջությամբ թվայնացվել է կառուցապատման թույլտվությունների շղթան՝ նախագծման թույլտվությունից մինչև շահագործում: Քաղաքաշինության կոմիտեի նախագահի ներկայացմամբ, հաջորդ գլխավոր միջոցառումը քաղաքաշինական տեղեկատվական համակարգի՝ քաղաքաշինական կադաստրի գործարկումն է, որը լինելու է գեոպորտալի մաս: Հաջորդիվ՝ ըստ ուղղությունների ներկայացվել են խոշոր միջոցառումները, որոնք են՝ ՀՀ տարաբնակեցման գլխավոր նախագծի մշակումը, քաղաքաշինական ծրագրային փաստաթղթերի մշակումը, ՀՀ զբոսաշրջային համակարգի տարածքային կազմակերպման գլխավոր նախագիծը և այլն: Նշվել է, որ քաղաքաշինական փաստաթղթերի պարզեցման, հստակեցման, դրանց կրկնողությունների բացառման միջոցառման շրջանակում մշակվել է պետական համալիր փորձաքննության աշխատակարգը, սահմանվել են ժամկետները: Անդրադարձ է կատարվել նաև նախագծային փաստաթղթերի մշակման որակի բարձրացմանն ուղղված միջոցառումներին, նշվել է, որ բազմաբնակարանային շենքերի կառավարման բարեփոխումների շրջանակում մշակվում է «Բազմաբնակարան շենքերի կառավարման մասին» նոր օրենքի նախագիծը: Մանրամասներ են ներկայացվել նաև Քաղաքաշինության կոմիտեի կողմից իրականացվող կապիտալ շինարարական ծրագրերի վերաբերյալ, նշվել է, որ ծրագրերը ներառում են դպրոցների, մանկապարտեզների, առողջապահական, մարզական հաստատությունների, դպրոցների մարզադահլիճների և այլ օբյեկտների շինարարական աշխատանքները: Ըստ այդմ՝ 2024թ. իրականացվել է 60 ծրագիր, ընթացքի մեջ է 78-ը, 2025թ. նախատեսվում է 40 ծրագիր: Վարչապետը նշել է, որ ռազմավարությունների քննարկման արդյունքներով շատ կարևոր է արձանագրել առաջընթացը և այս առումով արձանագրել որոշակի կետերով իրականացված միջոցառումների արդյունքները, որոնք են՝ կառուցապատման թույլտվության թվայնացումը, դրա հետագծելիությունը, միկրոռեգիոնալ փաստաթղթերի կազմումը և այլն: Հաջորդիվ՝ մտքեր են փոխանակվել զեկույցի առանձին կետերի շուրջ, քննարկվել են վթարային շենքերի հետ կապված խնդիրներին, տարաբնակեցմանը, գյուղատնտեսական նշանակության հողերին, բազմաբնակարան շենքերի կառավարմանը վերաբերող հարցեր, ներկայացվել են առաջարկություններ և դիտարկումներ բարձրացված թեմաների շուրջ: Նիկոլ Փաշինյանը ևս մեկ անգամ կարևորել է կատարված աշխատանքը և հանձնարարել բարձրացված հարցերի ուղղությամբ աշխատանքներ իրականացնել՝ հաշվի առնելով նաև խորհրդակցության ընթացքում ներկայացված առաջարկություններն ու դիտարկումները:

16:16 - 25 մարտի, 2025