Թուրքիա

Թուրքիայի ԱԳ նախարարն անդրադարձել է Քուրդիստանի աշխատավորական կուսակցության ինքնալուծարմանը |armenpress.am|

armenpress.am: Թուրքիայի արտաքին գործերի նախարար Հաքան Ֆիդանն անդրադարձել է Քուրդիստանի աշխատավորական կուսակցության ինքնալուծարմանը: Այս մասին հայտնում են թուրքական ԶԼՄ-ները: Ֆիդանը Քուրդստանի աշխատավորական կուսակցության (PKK) ինքնալուծարումն անվանել է կարևոր քայլ և նշել, որ չնայած առաջընթացին՝ դեռ շատ քայլեր պետք է ձեռնարկվեն։ Ֆիդանը հայտնել է նաև, որ Թուրքիայի նախագահ Ռեջեփ Թայիփ Էրդողանը կառավարության նիստից հետո այսօր դիմելու է հանրությանը և իր կարծիքն է հայտնելու PKK-ի ինքնալուծարման հարցով։ Թեմային անդրադարձել է նաև Թուրքիայում իշխող «Արդարություն և զարգացում» կուսակցության խոսնակ Օմեր Չելիքը: Նա նշել է, որ PKK-ի ինքնալուծարումը կարևոր է «առանց ահաբեկչության Թուրքիայի» ստեղծման հարցում և հավելել, որ Էրդողանը կհայտարարի այս գործընթացի հաջորդ քայլերի մասին:

Այսօր 16:24

Թուրքիայի ՊՆ ղեկավարն այսօր Ադրբեջան կայցելի |factor.am|

factor.am: Թուրքիայի պաշտպանության նախարար Յաշար Գյուլերն այսօր Ադրբեջան կմեկնի։ Նախատեսվում են մի շարք հանդիպումներ, հայտնում է TRT Haber-ը։ Նշվում է, որ Գյուլերը կմեկնի Ադրբեջան՝ Թուրքիայի նախագահ Ռեջեփ Թայիփ Էրդողանի նախագահությամբ կայանալիք կառավարության նիստին մասնակցելուց հետո։ Գյուլերի այցի օրակարգից այլ մանրամասներ չեն հաղորդվում։

Այսօր 12:51

Քուրդիստանի աշխատավորական կուսակցությունը հայտնել է ինքնալուծարման մասին |armenpress.am|

armenpress.am: Թուրքիայում արգելված և ահաբեկչական ճանաչված Քուրդիստանի աշխատավորական կուսակցությունը (ՔԱԿ, PKK) հայտարարել է ինքնալուծարման և պայքարի դեմոկրատական մեթոդների անցման մասին։ Այս մասին տեղեկանում է ՏԱՍՍ գործակալությունից։ «ՔԱԿ-ի արտահերթ համագումարը եզրակացրեց, որ ՔԱԿ-ի պայքարը տապալել է մեր ժողովրդին մերժելու և ոչնչացնելու քաղաքականությունը և քրդական հարցը բերել է ժողովրդավարական և քաղաքական մեթոդներով կարգավորման փուլ: Այս առումով ՔԱԿ-ը կատարել է իր պատմական առաքելությունը: Համագումարը որոշեց լուծարել ՔԱԿ-ի կազմակերպչական կառուցվածքը և վերջ դնել պայքարի զինված մեթոդներին։ Մեր համագումարի ընդունած որոշումը ամուր հիմք է տալիս մշտական խաղաղության և ժողովրդավարական լուծման համար», - համագումարի ամփոփիչ հաղորդագրությունն է ներկայացրել Rudaw հեռուստաալիքը։ Տեքստում նշվում է, որ «պրակտիկ գործընթացը կիրականացնի և կկառավարի կուսակցության առաջնորդը (խմբ.՝ Աբդուլլահ Օջալանը)»: «Այս փուլում կարևոր է, որ Թուրքիայի խորհրդարանը կատարի իր պատմական դերը», - հավելել է ՔԱԿ-ը: Համագումարի մասնակիցները «միջազգային տերություններին կոչ են արել ճանաչել իրենց պատասխանատվությունը (քուրդ) ժողովրդի դեմ իրականացված դարավոր ցեղասպանության քաղաքականության համար, չխոչընդոտել ժողովրդավարական լուծմանը և կառուցողական ներդրում ունենալ այս գործընթացում»։ Քուրդիստանի աշխատավորական կուսակցությունն ինքնալուծարվում է Թուրքիայի հետ 47 տարվա զինված պայքարից հետո, որի հետևանքով երկու կողմից տասնյակ հազարավոր մարդիկ են զոհվել։

Այսօր 12:14

Թուրքիայի ԱԳ նախարարը պատմել է, որ իրեն թունավորել են մկնդեղով և սնդիկով |tert.am|

tert.am: Թուրքիայի արտգործնախարար Հաքան Ֆիդանը հայտնել է, որ չորս-հինգ տարի առաջ իրեն մկնդեղով ու սնդիկով թունավորելու փորձ է արվել։ «Դա ծանր թունավորում էր մկնդեղով և սնդիկով: Թունավորումը տեղի է ունեցել ինչ-որ տեղ, իսկ հետո բացահայտվել է թեստերի արդյունքում: Դա տեղի է ունեցել չորս-հինգ տարի առաջ»,- ասել է Ֆիդանը 24TV հեռուստաալիքի եթերում: Թուրք նախարարը չի մանրամասնել, թե ով կարող էր կատարած լինել թունավորման փորձը։ Բայց նա նշել է, որ «թշնամիները գոյություն ունեն ոչ միայն երկրի ներսում, այլ նաև դրսում»: Ֆիդանը արտգործնախարարի պաշտոնը ստանձնել է 2023 թվականին, մինչ այդ նա գլխավորել է Թուրքիայի Ազգային հետախուզական կազմակերպությունը։

Այսօր 10:47

Ռուբիոն հաջորդ շաբաթ կայցելի Թուրքիա |azatutyun.am|

azatutyun.am: ԱՄՆ պետքարտուղար Մարկո Ռուբիոն կմասնակցի Թուրքիայում մայիսի 14-16-ը կայանալիք ՆԱՏՕ-ի արտգործնախարարների ոչ պաշտոնական հանդիպմանը՝ քննարկելու ռուս-ուկրաինական պատերազմի ավարտը։ «Հունիսին Հաագայում կայանալիք ՆԱՏՕ-ի գագաթնաժողովին ընդառաջ՝ պետքարտուղարը առաջ կմղի նախագահ Թրամփի օրակարգը՝ ապահովելով, որ մեր դաշնակիցները իրենց արդարացի ներդրումը կատարեն ՆԱՏՕ-ն ավելի ուժեղ և արդյունավետ դարձնելու գործում», - հայտարարել է Պետդեպարտամենտը այցի նախօրեին։ Սա պետքարտուղարի պաշտոնում Ռուբիոյի առաջին այցն է Թուրքիա։ Մինչ այդ՝ մայիսի 11-14-ը, պետքարտուղարը ԱՄՆ նախագահի հետ կմեկնի Մերձավոր Արևելք՝ Կատար, Սաուդիան Արաբիա՝ «Նահանգների և Պարսից ծոցի դաշնակիցների միջև հարաբերությունները ամրապնդելու օրակարգով»,- ասված է պաշտոնական հայտարարության մեջ։

Այսօր 09:10

Հինգշաբթի օրը անձամբ կսպասեմ Պուտինին Թուրքիայում. Զելենսկին՝ Թրամփին |tert.am|

tert.am: Ուկրաինայի նախագահ Վլադիմիր Զելենսկին Ռուսաստանի հետ «անհապաղ» բանակցություններ սկսելու Դոնալդ Թրամփի կոչից հետո հայտարարել է, որ հինգշաբթի օրը Պուտինին անձամբ կսպասի Ստամբուլում։ «Վաղվանից մենք ակնկալում ենք զինադադար՝ ամբողջական և տևական, որը դիվանագիտության համար անհրաժեշտ հիմքերը կապահովի: Իմաստ չկա շարունակել սպանությունները: Եվ ես կսպասեմ Պուտինին հինգշաբթի օրը Թուրքիայում: Անձամբ: Հուսով եմ, որ այս անգամ ռուսները պատճառներ չեն փնտրի, թե ինչու չեն կարող»,- Տելեգրամի իր ալիքում գրել է Ուկրաինայի նախագահը:

Այսօր 09:00

Այսօր կամ վաղը PKK-ն կզինաթափվի և կլուծարվի․ Էրդողան |factor.am|

factor.am: Թուրքիայի նախագահ Ռեջեփ Թայիփ Էրդողանը հայտարարել է, որ օրենքից դուրս հայտարարված Քուրդիստանի աշխատավորական կուսակցությունը (PKK) զենքերը վայր դնելու և լուծարվելու եզրին է, ինչը, ըստ նրա, ազդարարում է Թուրքիայի երկարատև քրդական հակամարտության «նոր դարաշրջանի» սկիզբը: Այս մասին հաղորդում է Habertürk -ը, որին վկայակոչում է Turkish Minute-ը: Հինգշաբթի Անկարայում իշխող «Արդարություն և զարգացում» կուսակցության (ԱԶԿ) գլխավոր գրասենյակում նախարարների և օրենսդիրների հետ հանդիպման ժամանակ Էրդողանը հայտարարել է, որ Քուրդիստանի աշխատավորական կուսակցության և Թուրքիայի միջև տարիներ շարունակվող հակամարտության կարգավորման «բոլոր խոչընդոտները» հաղթահարվել են։ «Այսօր կամ վաղը Քուրդիստանի աշխատավորական կուսակցությունը կզինաթափվի և կլուծարվի։ Դրանից հետո կսկսվի նոր գործընթաց, նոր ժամանակաշրջան բոլորիս համար։ Քաղաքականությունը մեծ դեր կունենա»,- ասել է Էրդողանը։ PKK-ի կողմից զենքերը վայր դնելու սպասվող քայլը կառույցի բանտարկված առաջնորդ Աբդուլլահ Օջալանի հետ ընթացող խաղաղության բանակցությունների արդյունք է, որը փետրվարին պատմական հայտարարությամբ կոչ էր արել իր զինյալ խմբին դադարեցնել զինված պայքարը, վայր դնել զենքերը և լուծարվել։ Եթե հայտարարությունն իրականություն դառնա, կնշանակի չորս տասնամյակ տևած հակամարտության ավարտի ուղղությամբ ամենակարևոր քայլը, որը խլել է ավելի քան 40,000 մարդու կյանք այն բանից հետո, երբ զինյալ խմբավորումը 1984 թվականին զենք է բարձրացրել թուրքական պետության դեմ՝ ձգտելով երկրի քրդական բնակչության համար ինքնավարության։Շարունակությունը՝ սկզբնաղբյուր կայքում։

22:34 - 08 մայիսի, 2025

Եվրախորհրդարանը սառեցրել է Թուրքիայի՝ ԵՄ-ին անդամակցելու գործընթացը |shantnews.am|

shantnews.am: Թուրքիայի՝ ԵՄ անդամակցության գործընթացը չի կարող վերսկսվել ներկայիս պայմաններում՝ չնայած թուրքական հասարակության զգալի մասի ժողովրդավարական և եվրոպամետ ձգտումներին, ասվում է Եվրախորհրդարանի (ԵԽ) կողմից ընդունված զեկույցում։ Զեկույցի հաստատմանը կողմ է քվեարկել Եվրախորհրդարանի 367 պատգամավոր, դեմ՝ 74, իսկ ձեռնպահ՝ 188: «Եվրախորհրդարանի պատգամավորները խորապես մտահոգված են Թուրքիայում ժողովրդավարական չափանիշների շարունակական վատթարացմամբ և քննադատական ձայների անդադար ճնշմամբ։ Նրանք դատապարտում են վերջին խաղաղ զանգվածային բողոքի ցույցերի ճնշումը և հարյուրավոր ցուցարարների քրեական հետապնդումը շտապ զանգվածային դատավարությունների միջոցով՝ առանց քրեական հանցագործության որևէ ապացույցի», – ասվում է ԵԽ-ի հաղորդագրության մեջ՝ Ստրասբուրգում լիագումար նիստում քննարկումից հետո։

11:05 - 08 մայիսի, 2025

Թուրքիան դատապարտել է Հնդկաստանի ռազմական գործողությունը Պակիստանի դեմ |factor.am|

factor.am: Թուրքիայի արտաքին գործերի նախարարությունը հայտարարություն է տարածել, որում դատապարտել է Հնդկաստանի կողմից երեքշաբթի երեկոյան Պակիստանի վրա իրականացված հրթիռային հարձակումը՝ ընդգծելով լայնածավալ պատերազմի հնարավոր ռիսկը։ «Մենք մտահոգությամբ հետևում ենք Պակիստանի և Հնդկաստանի միջև զարգացումներին։ Հնդկաստանի կողմից երեկ երեկոյան իրականացված հարձակումը մեծացնում է լայնածավալ պատերազմի վտանգը։ Մենք դատապարտում ենք նման սադրիչ քայլերը, ինչպես նաև քաղաքացիական անձանց և քաղաքացիական ենթակառուցվածքների դեմ ուղղված հարձակումները։ Մենք կոչ ենք անում կողմերին ցուցաբերել ողջախոհություն և զերծ մնալ միակողմանի գործողություններից»,- ասվում է հայտարարության մեջ։ Անկարան ակնկալում է, որ միջոցներ կձեռնարկվեն` տարածաշրջանում լարվածությունը հնարավորինս շուտ նվազեցնելու համար, և որ անհրաժեշտ մեխանիզմները, այդ թվում՝ հակաահաբեկչական ոլորտում, կներդրվեն նմանատիպ միջադեպերի կրկնությունը կանխելու համար։ «Մենք նաև աջակցում ենք Պակիստանի կոչին՝ ապրիլի 22-ի ահաբեկչական հարձակման հետաքննություն անցկացնելու վերաբերյալ»,- ասվում է թուրքական գերատեսչության հայտարարության մեջ։Շարունակությունը՝ սկզբնաղբյուր կայքում։

23:04 - 07 մայիսի, 2025

Թուրքիան իր համերաշխությունն է հայտնել Պակիստանի

Թուրքիան իր համերաշխությունն է հայտնել Պակիստանին Հնդկաստանի կողմից Պակիստանի եւ նրա վերահսկողության տակ գտնվող Քաշմիրի ուղղությամբ հարվածների ֆոնին։ Այս մասին տեղեկանում ենք Պակիստանի ԱԳ նախարարության X-ի հրապարակումից։ Թուրքիայի դեսպանը Իսլամաբադում հանդիպել է փոխվարչապետ և արտաքին գործերի նախարար Իշաք Դարի հետ՝ փոխանցելու Թուրքիայի համերաշխությունը Պակիստանի հետ՝« Հնդկաստանի կողմից Պակիստանի ինքնիշխանության չհրահրված խախտման և անմեղ մարդկանց ողբերգական կորստի ֆոնին»։ Հաղորդվում է, որ կողմերը խորը քննարկել են տարածաշրջանային անվտանգության հարցերը և վերահաստատել սերտ համակարգման և համագործակցության պահպանման իրենց հանձնառությունը։

10:30 - 07 մայիսի, 2025

Ռուսաստանի փոխարտգործնախարարը Թուրքիայի դեսպանի հետ քննարկել է իրավիճակը Ուկրաինայում և Հարավային Կովկասում |armenpress.am|

armenpress.am: Ռուսաստանի փոխարտգործնախարար Միխայիլ Գալուզինը Մոսկվայում Թուրքիայի դեսպան Թանջու Բիլգիչի հետ քննարկել է իրավիճակը Ուկրաինայում և Հարավային Կովկասում։ Ինչպես տեղեկացնում է «ՌԻԱ Նովոստի»-ն, այդ մասին հաղորդել է ՌԴ ԱԳՆ-ն։ «Զրույցի ընթացքում կողմերը մտքեր են փոխանակել ուկրաինական ճգնաժամի շուրջ ստեղծված իրավիճակի, Հարավային Կովկասում և Կենտրոնական Ասիայի տարածաշրջանում իրադրության շուրջ»,- ասված է հաղորդագրության մեջ։ Նշվում է, որ հանդիպումը եղել է կառուցողական։

22:07 - 06 մայիսի, 2025

Էրդողանը հրավիրել է ինձ Թուրքիա, և նա էլ կգա Վաշինգտոն. Թրամփ |azatutyun.am|

azatutyun.am: Հեռախոսազրույց են ունեցել ԱՄՆ-ի և Թուրքիայի նախագահները: «Էրդողանը հրավիրել է ինձ Թուրքիա, և նա էլ կգա Վաշինգտոն», - գրել է ԱՄՆ նախագահ Դոնալդ Թրամփը սոցիալական ցանցում զրույցից հետո: Ըստ Դոնալդ Թրամփի՝ Ռեջեփ Էրդողանի հետ զրույցը «շատ լավ և արդյունավետ էր»: Հաղորդվում է, որ զրույցի ընթացքում քննարկվել են Ուկրաինայի պատերազմի, Սիրիայի և Գազայի հետ կապված հարցեր։ Թուրքական կողմը հայտնում է, որ Էրդողանը Թրամփի հետ հեռախոսազրույցի ընթացքում աջակցություն է հայտնել ԱՄՆ-ի կողմից Իրանի հետ բանակցություններին և ռուս-ուկրաինական պատերազմին վերջ դնելու ջանքերին: «Ես անհամբեր սպասում եմ նախագահ Էրդողանի հետ աշխատելու հնարավորությանը անհեթեթ, բայց մահացու պատերազմը Ռուսաստանի և Ուկրաինայի միջև հենց հիմա վերջ դնելու ուղղությամբ»,- Truth Social սոցիալական ցանցի իր էջում գրել է Սպիտակ տան ղեկավարը։ Լուսանկարի աղբյուրը՝ AFP

10:07 - 06 մայիսի, 2025

Թուրքիան փակել է իր երկինքը իսրայելական ինքնաթիռների համար և Նեթանյահուի՝ Ադրբեջան այցի համար օդային տարածքը բացելու մասին խոսք չկա․ Թուրքիայի ԱԳՆ |tert.am|

tert.am: Թուրքիան փակել է իր երկինքը իսրայելական ինքնաթիռների համար, և Բենիամին Նեթանյահուի՝ Ադրբեջան այցի համար օդային տարածքը բացելու մասին խոսք չկա։ Այս մասին նշել է Թուրքիայի արտաքին գործերի նախարարության խոսնակ Օնջու Քեչելին՝ հերքելով այն պնդումները, որ Իսրայելի վարչապետ Բենիամին Նեթանյահուի ինքնաթիռին թույլատրվել է թռիչք կատարել իր տարածքով։ «Այն պնդումները, որ Իսրայելի վարչապետի ինքնաթիռին թռիչքի թույլտվություն է տրվել, բացարձակապես չեն համապատասխանում իրականությանը։ «Մենք այս ուղղությամբ որևէ հարցում չենք ստացել», - նշել է նա։

18:21 - 03 մայիսի, 2025

Թուրքիան հինգ տարի անց թուրքմենական գազ կներմուծի Կասպից ծովի հատակով անցնող խողովակներով. Էրդողան |1lurer.am|

1lurer.am: Թուրքիան հինգ տարի անց Թուրքմենստանից բնական գազ կներմուծի Կասպից ծովի հատակով անցնող խողովակներով՝ հայտարարել է Թուրքիայի նախագահ Ռեջեփ Էրդողանը՝ Ստամբուլում բնական ռեսուրսների գագաթնաժողովում իր ելույթի ժամանակ: «Այս տարվա մարտից մենք թուրքմենական գազը Թուրքիա ենք տեղափոխում Իրանի տարածքով։ Մեր նպատակն է հինգ տարի հետո Թուրքմենստանից բնական գազ ներկրել Կասպից ծովի հատակով անցկացված խողովակներով»,- ընդգծել է նա։ Էրդողանի խոսքով՝ մինչ այժմ նշված երթուղով փոխադրվել է 250 մլն խմ բնական գազ, իսկ տարեվերջին այդ ցուցանիշը, ըստ կանխատեսումների, կհասնի 1,3 մլրդ խմ-ի:

18:16 - 03 մայիսի, 2025

Էրդողան․ «Սիրիայի ապակենտրոնացումը բացառվում է» |azatutyun.am|

azatutyun.am: «Սիրիայի ապակենտրոնացումը բացառվում է», - լրագրողների հետ զրույցում հայտարարել է Թուրքիայի նախագահ Ռեջեփ Թայիփ Էրդողանը՝ մեկնաբանելով սիրիացի քրդերի վերջին հայտարարությունները։ Սիրիայի հյուսիսային շրջանները քրդական ուժերի հրամանատարները օրերս կրկնել էին ավելի վաղ հնչեցրած իրենց պահանջը, որի համաձայն Սիրիան պետք է դաշնային պետություն հռչակվի։ «Դաշնային համակարգի ստեղծումն ընդամենը անիրիատեսական երազանք է։ Խորհուրդ եմ տալիս սիրիացի քրդերին ոչ թե դաշնային կառավարման մասին երազել, այլ որոշումներ կայացնել, որոնք կնպաստեն տարածաշրջանային կայունության հաստատմանը», - հայտարարել է Էրդողանը։Լուսանկարը՝ Քրիս ՄաքԳրաթ/Getty Images։

18:27 - 30 ապրիլի, 2025

Թուրքիայի դատարանը կալանավորել է Ստամբուլի քաղաքապետարանի 18 աշխատակցի |azatutyun.am|

azatutyun.am: Թուրքական դատարանը կալանավորել է Ստամբուլի քաղաքապետարանի 18 աշխատակցի՝ կոռուպցիայի մեղադրանքով մինչ նրանց դատավարությունը, հաղորդում են պետական «Անադոլու» գործակալությունը և այլ լրատվամիջոցներ։ Այս գործողություններն իրականացվում են ընդդիմության և Ստամբուլի կալանավորված քաղաքապետ Էքրեմ Իմամօղլուի շուրջ զարգացումների ֆոնին։ Նրանց թվում են քաղաքապետարանի գլխավոր քարտուղարը, Իմամօղլուի աշխատակազմի ղեկավարը, քաղաքապետարանի վարչությունների պատասխանատուներ: Նախագահ Թայիփ Էրդողանի գլխավոր քաղաքական մրցակից Իմամօղլուն մարտին բանտարկվել է կոռուպցիայի մեղադրանքով: Քաղաքապետը հերքում է բոլոր մեղադրանքները: Նրա կալանավորումը վերջին տասը տարիների ամենամեծ բողոքներն է հարուցել Թուրքիայի ողջ տարածքում: Կառավարությունն էլ իր հերթին հերքում է այս գործընթացի քաղաքականացված լինելը:

11:24 - 30 ապրիլի, 2025