Թուրքիա

Իրանի արտգործնախարարը Ասադի հետ հանդիպումից հետո մեկնել է Անկարա |civilnet.am|

civilnet.am: Իրանի արտգործնախարար Աբբաս Արաղչին Դամասկոսից ժամանել է Անկարա, որտեղ իր թուրք պաշտոնակից Հաքան Ֆիդանի հետ քննարկել է Սիրիայում ստեղծված իրավիճակը, հայտնում են իրանական և թուրքական լրատվամիջոցները։ Իրանի ԱԳՆ ղեկավարը Անկարա է մեկնել Դամասկոսում Սիրիայի նախագահ Բաշար ալ-Ասադի հետ հանդիպումից հետո։ Իրանցի պաշտոնյան նշել է, որ Սիրիան կամ տարածաշրջանը երկրորդ անգամ չպետք է ահաբեկիչների կենտրոնի վերածվեն։ «Իրանի և Թուրքիայի խորհրդակցությունները մշտապես վերաբերել են տարբեր թեմաների․ մի շարք հարցերում մենք ունենք նույնական մոտեցումներ, որոշ հարցերում՝ ոչ։ Հույս ունեմ, որ երկխոսության միջոցով կկարողանանք տարածաշրջանային խնդիրների շուրջ փոխըմբռնման հասնել։ Սիրիան և կամ տարածաշրջանը չպետք է ահաբեկիչների կենտրոն դառնան»,- հայտարարել է Արաղչին։ Իրանի արտհործնախարարը նախօրեին Սիրիայի նախագահի հետ հանդիպմանն ընդգծել է Թեհրանի անվերապահ աջակցությունը Սիրիայի կառավարությանը ահաբեկչական խմբավորումների դեմ պայքարում։ Նոյեմբերի 27-ին Հայաթ Թահրիր աշ-Շամ զինված խմբավորումը Հալեպի շրջանում հարձակում է գործել սիրիական բանակի և դաշնակից ուժերի դիրքերի վրա։ Իսլամիստական խմբավորումներն այժմ վերահսկում են Հալեպ քաղաքի մեծ մասը։

Այսօր 16:00

Էնթոնի Բլինքենն ու Հաքան Ֆիդանը քննարկել են Սիրիայում արագ զարգացող իրավիճակը

Հեռախոսազրույց են ունեցել ԱՄՆ պետքարտուղար Էնթոնի Բլինքենը և Թուրքիայի ԱԳ նախարար Հաքան Ֆիդանը: Այս մասին հայտնում են ԱՄՆ պետքարտուղարությունից: Նշվում է, որ կողմերը քննարկել են Սիրիայում արագ զարգացող իրավիճակը: «Պետքարտուղար Բլինքենը և ԱԳ նախարար Ֆիդանը քննարկել են դեէսկալացիայի անհրաժեշտությունը և Հալեպում ու այլ վայրերում քաղաքացիական բնակչության և ենթակառուցվածքների պաշտպանությունը»,- ասվում է ամերիկյան կողմի հաղորդագրությունում; ԱՄՆ պետքարտուղարությունից հայտնում են նաև, որ Բլինքենն ու Ֆիդանը քննարկել են նաև Գազայում շարունակական հումանիտար ջանքերը, պատերազմին վերջ տալու և բոլոր գերիների ազատ արձակումն ապահովելու անհրաժեշտությունը:

Այսօր 10:36

Ռուսաստանի և Իրանի ԱԳ նախարարները մտահոգություն են հայտնել Սիրիայում իրավիճակի սրման կապակցությամբ

Հեռախոսազրույց են ունեցել Ռուսաստանի և Իրանի արտգործնախարարներ Սերգեյ Լավրովը և Աբբաս Արաղչին: Ինչպես հայտնում են ՌԴ ԱԳՆ-ից, օրակարգում եղել է իրավիճակը Սիրիայում: Նախարարները մտահոգություն են հայտնել Սիրիայում իրավիճակի սրման կապակցությամբ, վերահաստատվել է Սիրիայի Արաբական Հանրապետության ինքնիշխանությանն ու տարածքային ամբողջականությանը ամուր աջակցությունը։ Նախարարները շեշտել են համատեղ ջանքերն ակտիվացնելու անհրաժեշտությունը՝ հանուն տարածաշրջանում կայունացման: Լավրովը հեռախոսազրույց է ունեցել նաև Թուրքիայի ԱԳ նախարար Հաքան Ֆիդանի հետ, քննարկել իրավիճակը Սիրիայում։ ՌԴ ԱԳՆ-ից նշում են, որ հեռախոսազրույցի ընթացքում հաստատվել է «Սիրիայի Արաբական Հանրապետությունում իրավիճակի կայունացման նպատակով համատեղ գործողությունների համակարգման անհրաժեշտությունը՝ առաջին հերթին օգտագործելով Աստանայի ձևաչափի ներուժը»։

20:01 - 30 նոյեմբերի, 2024

Ֆիդանն ու Լավրովը քննարկել են Սիրիայում տիրող իրավիճակը |tert.am|

tert.am: Թուրքիայի արտգործնախարար Հաքան Ֆիդանը և ՌԴ արտգործնախարար Սերգեյ Լավրովը հեռախոսազրույցի ընթացքում քննարկել են Սիրիայում տիրող իրավիճակը, հայտնել է ՌԴ ԱԳՆ-ն։ Լավրովն ու Ֆիդանը լուրջ մտահոգություն են հայտնել Սիրիայում տիրող իրավիճակի կապակցությամբ։ Նրանք հաստատել են իրավիճակի կայունացման համար համատեղ գործողությունների համակարգման անհրաժեշտությունը։ Հիշեցնենք, որ այսօր սիրիական բանակը հայտարարել է Հալեպից «զորքերի ժամանակավոր դուրսբերման» մասին՝ «ահաբեկիչների դեմ հակահարձակում նախապատրաստելու համար»: Ռազմական կառույցը նշել է, որ դուրսբերումը վերախմբավորման մաս է կազմում նախքան համալրման ժամանակումը՝ հակահարձակումն սկսելու համար: Զինված ուժերը հավելել են, որ Հալեպում և Իդլիբում ապստամբների հետ ծանր մարտերի ընթացքում տասնյակ զինվորներ են զոհվել կամ վիրավորվել։

19:00 - 30 նոյեմբերի, 2024

Սիրիայում թուրքամետ ուժերը շարունակում են մոտենալ Հալեպին․ ՌԴ-ն հայտարարում է 400 գրոհայինի ոչնչացնելու մասին |factor.am|

factor.am: Սիրիական բանակը Ռուսաստանի օդատիեզերական ուժերի աջակցությամբ ոչնչացրել է առնվազն 400 գրոհայինի, որոնք հարձակվել են Հալեպ և Իդլիբ նահանգների վրա։ Այս մասին ճեպազրույցում հայտարարել է Սիրիայում պատերազմող կողմերի հաշտեցման ռուսական կենտրոնի ղեկավարի տեղակալ, կապիտան Օլեգ Իգնասյուկը, գրում է ՌԻԱ Նովոստին։ «Նոյեմբերի 27-ին ժամը 7:50-ից սկսած «Ջաբհաթ ան-Նուսրա» ահաբեկչական կազմակերպության հետ կապված անօրինական զինված խմբավորումները հարձակվել են Սիրիայի կառավարության կողմից վերահսկվող տարածքների վրա Հալեպ և Իդլիբ նահանգներում: Սիրիական բանակը կռվում է ռուսական օդատիեզերական ուժերի աջակցությամբ»,- ասել է նա։ Իգնասյուկը նշել է, որ «վերջին 24 ժամվա ընթացքում ահաբեկիչները տեխնիկայի և անձնակազմի զգալի կորուստներ են կրել, զոհվել է առնվազն 400 մարդ»։ Իդլիբի ապաէսկալացիայի գոտում գրանցվել է 13 հարձակում սիրիական կառավարական զորքերի դիրքերի վրա «Ջաբհաթ ան-Նուսրայի» գրոհայինների կողմից, որոնցից 12-ը՝ Իդլիբ նահանգում, ևս մեկը՝ Հալեպում։ Թուրքիայի կողմից աջակցություն ստացող սիրիական ընդդիմադիր Հայեթ Թահրիր ալ-Շամ (HTS) զինված խմբավորումը և դաշնակից ուժերը շարունակում են գրոհել Հալեպի ուղղությամբ։ Թուրքական լրատվամիջոցները հայտնում են, որ նրանք մոտեցել են Հալեպի ծայրամասերին։ Զինված խմբավորումները վերահսկողության տակ են վերցրել 400 քառակուսի կիլոմետր տարածք։ Ընդհանուր առմամբ՝ զինյալները վերահսկում են Հալեպ և Իդլիբ նահանգների 56 բնակավայրեր։ Տեղեկություններ են տարածվում, որ կառավարական ուժերը հեռացել են Հալեպից։

13:29 - 29 նոյեմբերի, 2024

Թուրքիան կրճատել է ԱՄՆ-ի հետ F-16 ինքնաթիռների 23 միլիարդ դոլար արժողությամբ գործարքը. Յաշար Գյուլեր |1lurer.am|

1lurer.am: Թուրքիան 23 միլիարդ դոլարով կրճատել է ԱՄՆ-ից F-16 կործանիչների գնման գործարքը՝ չեղյալ հայտարարելով իր գործող ավիապարկի արդիականացման համար 79 հավաքածուի գնումը, երեքշաբթի ուշ երեկոյան հայտարարել է պաշտպանության նախարար Յաշար Գյուլերը։ ՆԱՏՕ-ի անդամ Թուրքիան այս տարվա սկզբին երկար ձգձգված գործընթացից հետո ԱՄՆ-ից ձեռք բերեց 40 F-16 կործանիչ և 79 հավաքածու իր գոյություն ունեցող F-16-ներն արդիականացնելու համար: «F-16 Block-70-ի ձեռքբերման համար նախապես վճարվել է 1,4 միլիարդ դոլար, սրանով մենք գնելու ենք 40 F-16 Block-70 Viper և պատրաստվում էինք գնել արդիականացման 79 հավաքածու»,- ասել է Գյուլերը խորհրդարանական լսումների ժամանակ։ «Սակայն մենք հրաժարվեցինք այդ 79-ից, որովհետև մեր թուրքական օդատիեզերական արդյունաբերության ձեռնարկությունները (TUSAS) ի վիճակի են ինքնուրույն իրականացնել արդիականացումը, և մենք վստահեցինք նրանց»,- ասել է նախարարը: Գյուլերը հավելել է, որ 40 նոր Lockheed Martin F-16 ինքնաթիռի և դրանց զինամթերքի վաճառքը Թուրքիային կարժենա մոտ 7 միլիարդ դոլար։ Անկարան այս պատվերը տվել է 2021 թվականի հոկտեմբերին՝ երկու տարի այն բանից հետո, երբ Միացյալ Նահանգները երկիրը հանեց հինգերորդ սերնդի F-35 կործանիչների ծրագրից՝ ռուսական հակահրթիռային պաշտպանության համակարգեր գնելու պատճառով: Թուրքիան ցանկանում է կրկին միանալ F-35 ծրագրին և գնել 40 նոր F-35 ինքնաթիռ, ասել է Գյուլերը։ Անկարան շահագրգռված է նաև Eurofighter Typhoon կործանիչներ գնելու հարցում, որոնք արտադրվում են Գերմանիայի, Մեծ Բրիտանիայի, Իտալիայի և Իսպանիայի կոնսորցիումի կողմից։ Այն նաև մշակում է սեփական KAAN մարտական ինքնաթիռը:

13:07 - 27 նոյեմբերի, 2024

Հայաստան-Ադրբեջան խաղաղության պայմանագիրը հանգստություն և կայունություն կապահովի տարածաշրջանում. Թուրքիայի ՊՆ ղեկավար |tert.am|

tert.am: Ուզում եմ ևս մեկ անգամ ընդգծել, որ Կովկասում տարածաշրջանային խաղաղություն և կայունություն ձեռք կբերվի Ադրբեջանի և Հայաստանի միջև ստորագրվելիք համապարփակ խաղաղության պայմանագրով։ Այս մասին, hurriyet.com.tr կայքի փոխանցմամբ, հայտարարել է Թուրքիայի ազգային պաշտպանության նախարար Յաշար Գյուլերն ԱԺ-ում ՊՆ 2025 թվականի բյուջեի քննարկման ժամանակ:Նշենք, որ պաշտոնական Երևանն ու Բաքուն հայտարարել են, որ խաղաղության պայմանագրի մոտ 80%-ը համաձայնեցված է։ ՀՀ-ն առաջարկում է ստորագրել համաձայնեցված կետերի հիման վրա, այսպիսով ունենալ հիմնարար փաստաթուղթ և շարունակել քննարկել չլուծված հարցերը։ Սակայն Ադրբեջանն այս մոտեցումը համարում է կիսատ-պռատ: Ադրբեջանը պահանջում է Հայաստանից փոխել Սահմանադրությունը, քանի որ խնդրահարույց է համարում Անկախության հռչակագիրը, որում հղում կա Հայաստանի ու Լեռնային Ղարաբաղի միավորմանը։

13:46 - 26 նոյեմբերի, 2024

Թուրքիայում 4․6 մագնիտուդով երկրաշարժ է գրանցվել |1lurer.am|

1lurer.am: Թուրքիայի Մալաթիայի շրջանում 4․6 մագնիտուդով երկրաշարժ է տեղի ունեցել, հաղորդում է Թուրքիայի կառավարությանը կից՝ արտակարգ իրավիճակների կառավարման գործակալությունը։ Ստորգետնյա ցնցումներ են գրանցվել տեղական ժամանակով 20։20-ին։ Երկրաշարժի էպիկենտրոնը եղել է Դողանշեհիր շրջանում, երկրաշարժի օջախը եղել է 9,75 կմ խորությամբ։ Տուժածների և ավերածությունների մասին տեղեկություններ չեն հաղորդվում։

22:33 - 25 նոյեմբերի, 2024

ՆԱՏՕ-ի նորանշանակ գլխավոր քարտուղարն առաջին անգամ Թուրքիայում է․ նրան ընդունել է Էրդողանը |factor.am|

factor.am: ՆԱՏՕ-ի գլխավոր քարտուղար Մարկ Ռյուտեն պաշտոնը ստանձնելուց հետո առաջին անգամ Թուրքիա է այցելել։ Անկարայում նրան ընդունել է նախագահ Ռեջեփ Թայիփ Էրդողանը, հաորդում է TRT Haber-ը։ Հաղորդվում է, որ Էրդողանի և Ռյուտեի հանդիպման ժամանակ ակնկալվում է քննարկել ռուս-ուկրաինական պատերազմի ներկա իրավիճակը։ Հանդիպման շրջանակում օրակարգում կլինի նաև Թուրքիայի միջնորդական դերը ռուս-ուկրաինական պատերազմում, ինչպես նաև ՆԱՏՕ-ի դաշնակիցների միջև պաշտպանական գնումների խոչընդոտների վերացումը: Բացի այդ, առաջնային թեմաներից են լինելու ահաբեկչության դեմ պայքարի քայլերը և Թուրքիայի ակնկալիքները։ Ավելի մանրամասն՝ սկզբնաղբյուրում։

19:05 - 25 նոյեմբերի, 2024

Անկարան շարունակում է ջանքեր գործադրել՝ տարածաշրջանում լարվածությունը դադարեցնելու ուղղությամբ․ Էրդողանը՝ Պուտինին |azatutyun.am|

azatutyun.am: Անկարան շարունակում է ջանքեր գործադրել՝ տարածաշրջանում լարվածությանը վերջ դնելու համար, Ռուսաստանի նախագահ Վլադիմիր Պուտինի հետ հեռախոսազրույցի ժամանակ հայտարարել է Թուրքիայի նախագահ Ռեջեփ Էդողանը։ Ըստ Թուրքիայի նախագահի գրասենյակի՝ Էրդողանը նաև շեշտել է, որ Անկար կշարունակի ջանքերը՝ նպաստելու խաղաղ գործընթացներին։ Թուրքիան մի քանի անգամ հայտարարել է, որ հայ-թուրքական և հայ-ադրբեջանական հարաբերությունների կարգավորման գործընթացները փոխկապակցված են և հայ-ադրբեջանական բանակցությունների դրական ելքի դեպքում հայ-թուրքական սահմանը կբացվի։ Պուտինն ու Էրդողանը քննարկել են նաև երկկողմ հարաբերությունները, ինչպես նաև տարածաշրջանային և գլոբալ հարցեր։ Կրեմլը երեկ հաղորդել է, որ Ռուսաստանի և Թուրքիայի ղեկավարները քննարկել են երկկողմ օրակարգի ընթացիկ հարցեր՝ շեշտը դնելով առևտրատնտեսական համագործակցության արդյունավետության բարձրացման վրա, անդրադարձել նաև մի շարք միջազգային թեմաների։

10:25 - 25 նոյեմբերի, 2024

Սոչիից Անթալիա ուղևորվող ինքնաթիռում հրդեհ է բռնկվել. զոհեր չկան |1lurer.am|

1lurer.am: Ռուսական «Ազիմուտ» ավիաընկերության ինքնաթիռում, Անթալիայի օդանավակայանում վայրէջքի ժամանակ, հրդեհ է բռնկվել, սակայն այն հաջողվել է մարել, հայտնում է HavaSosyalMedya ավիացիոն պորտալը։ «Հրդեհը բռնկվել է Սոչի-Անթալիա չվերթ իրականացնող Sukhoi Superjet 100-95LR ինքնաթիռի վայրէջքի ժամանակ։ Ենթադրաբար, կրակը բռնկվել է շարժիչում»,- ասվում է հաղորդագրության մեջ: «Ռոսավիացիայի» ներկայացուցիչ Արտյոմ Կորենյակոն իր տելեգրամ ալիքում հայտնել է, որ արտակարգ պատահարի հետևանքով զոհեր չկան: Ինքնաթիռի բոլոր՝ 79 ուղևորները հաջողությամբ տարհանվել են: «Ռոսավիացիան» հետաքննություն է իրականացնում դեպքի հանգամանքները պարզելու նպատակով: Թուրքական DHA գործակալությունը տեղեկացնում է, որ օդանավակայանը պատահարից որոշ ժամանակ անց վերսկսել է աշխատանքը սովորական ռեժիմով:

09:29 - 25 նոյեմբերի, 2024

Պուտին-Էրդողան հեռախոսազրույցում քննարկվել են առևտրատնտեսական համագործակցության հարցեր |tert.am|

tert.am: Ռուսաստանի նախագահ Վլադիմիր Պուտինը հեռախոսազրույց է ունեցել Թուրքիայի նախագահ Ռեջեփ Թայիփ Էրդողանի հետ: Նրանք քննարկել են երկկողմ օրակարգի հարցեր՝ շեշտը դնելով առևտրատնտեսական համագործակցության արդյունավետության բարձրացման վրա: Այս մասին տեղեկացնում է Կրեմլի կայքը: «Որպես հոկտեմբերի 23-ին Կազանում կայացած զրույցի շարունակություն՝ առարկայորեն քննարկվել են երկկողմ օրակարգի արդիական հարցեր՝ շեշտը դնելով առևտրատնտեսական համագործակցության արդյունավետության բարձրացման վրա: Հաշվի առնելով դա ՝ շփումներ կանցկացվեն պրոֆիլային գերատեսչությունների գծով»,- ասված է հաղորդագրության մեջ: Հաղորդվում է նաև, որ պետությունների ղեկավարներն անդրադարձել են մի շարք միջազգային թեմաների:

17:50 - 24 նոյեմբերի, 2024

Լավրովն ու Ֆիդանը քննարկել են երկկողմ ու տարածաշրջանային հարցեր |tert.am|

tert.am: Թուրքիայի արտգործնախարար Հաքան Ֆիդանը ռուս գործընկեր Սերգեյ Լավրովի հետ հեռախոսով քննարկել է երկկողմ և տարածաշրջանային հարցեր։ Այս մասին հայտնում է ՏԱՍՍ-ը։ «Նախարար Ֆիդանն այսօր հեռախոսազրույց է ունեցել ՌԴ ԱԳ նախարար Սերգեյ Լավրովի հետ, քննարկվել են երկկողմ և տարածաշրջանային հարցեր»,- ասել են Թուրքիայի ԱԳՆ-ից։

18:35 - 23 նոյեմբերի, 2024

Ֆիդանը Հայաստանին ու Ադրեջանին կոչ է արել «բաց չթողել խաղաղության այս պատմական հնարավորությունը» |factor.am|

factor.am: «Հարավային Կովկասում տևական խաղաղությունն ավելի մոտ է քան երբեևէ»,- այս մասին հայտարարել է Թուրքիայի ԱԳ նախարար Հաքան Ֆիդանը խորհրդարանում իր ղեկավարած գերատեսչության բյուջեի քննարկմանը։ «Այս կետին հասնելու հիմքը, անկասկած, այն է, որ եղբայրական Ադրբեջանը վերջ է տվել Ղարաբաղում իր հողերի օկուպացիային, մենք օրինակելի մակարդակով շարունակում ենք մեր երկկողմ հարաբերությունները Ադրբեջանի հետ։ Մենք համատեղ ձգտում ենք լուծումներ գտնել միջազգային բազմաթիվ խնդիրների համար։ Ուրախալի է, որ Հայաստանը պատերազմից հետո շարունակում է ընտրել խաղաղությունն ու կայունությունը։ Եվ՛ Ադրբեջանին, և՛ Հայաստանին կոչ ենք անում բաց չթողնել այս պատմական հնարավորությունը»,-ասել է Ֆիդանը։ Ֆիդանը նշել է, որ կողմերը երկար ժամանակ անց առաջին անգամ առանձնազրույց են ունեցել Ստամբուլում՝ առանց երրորդ երկրի մասնակցության, և ընդգծել, որ Հարավային Կովկասի համատեքստում կարևոր է նաև հարաբերությունների կարգավորման գործընթացը, որը Անկարան իրականացնում է Հայաստանի հետ։ Ընդգծելով, որ «Թուրքիայի կառուցողական կամքն է՝ աստիճանաբար կարգավորել երկկողմ հարաբերությունները»՝ համաձայնեցնելով դա Ադրբեջանի հետ, Ֆիդանը նշել է, որ հոկտեմբերին Ստամբուլում կայացած «3+3» Տարածաշրջանային համագործակցության հարթակի հանդիպմանը «կառուցողական կերպով քննարկել են տարածաշրջանին վերաբերող բոլոր հարցերը»։

18:31 - 21 նոյեմբերի, 2024

Էրդողանը հայտարարել է, թե Սիրիայի հյուսիսն օկուպացվել է ԱՄՆ-ի կողմից աջակվող քրդերի կողմից |factor.am|

factor.am: Թուրքիայի նախագահ Ռեջեփ Թայիփ Էրդողանը հայտարարել է, թե Անկարան պատրաստ է ԱՄՆ զորքերի հնարավոր դուրսբերմանը Սիրիայից, հաղորդում է TRT Haber-ը։ «Մենք բացարձակապես ոչ մի հանդուրժողականություն չունենք մեր սահմաններից դուրս գտնվող կառույցների նկատմամբ, որոնք մշտապես վտանգ են ներկայացնում մեր երկրի ազգային անվտանգությանը։ Մենք մեր բոլոր զրուցակիցներին փոխանցել ենք, թե որքան հստակ ու վճռական ենք տրամադրված այս հարցում։ Հյուսիսային Սիրիան օկուպացվել է Քուրդիստանի աշխատավորական կուսակցության՝ PKK/PYD/YPG-ի կողմից, որոնց աջակցում է Ամերիկան։ Այս տարածաշրջանը չափազանց կարևոր է ոչ միայն մեզ, այլև Սիրիայի համար։ Տարածաշրջանը PKK/PYD/YPG-ից մաքրելը շատ կարևոր է նաև սիրիական վարչակազմի համար: Սիրիայում քաղաքացիական պատերազմը խորը անկայունություն է առաջացրել մեր հարևանի տարածքում»,- ասել է Էրդողանը լրագրողներին ինքնաթիռում Բրազիլիայից վերադառնալիս։ Ըստ նրա՝ «անկայունությունը գրավել է ահաբեկչական կազմակերպություններին Թուրքիայի սահմաններից այն կողմ, ինչպես ճահիճը՝ ճանճերին»։ «Թուրքիան պատրաստ է ինչպես նոր իրավիճակին, այնպես էլ ներկայիս իրողությանը, որը կստեղծի Ամերիկայի դուրս գալը Սիրիայից։ Մեր ազգային անվտանգությունն առաջին տեղում է և վեր է ամեն ինչից։ Մենք փորձում ենք Սիրիայում տիրող այս մթնոլորտը շրջել հօգուտ տարածաշրջանի՝ այդ հարցի շուրջ անհրաժեշտ բանակցություններ վարելով Ռուսաստանի հետ»,- ասել է Էրդողանը։

21:45 - 20 նոյեմբերի, 2024

«Զանգեզուրի միջանցքն» Ադրբեջանի և Թուրքիայի միջև տրանսպորտային ոլորտի ամենամեծ նախագիծն է․ Թուրքիայի տրանսպորտի նախարար |factor.am|

factor.am: Ադրբեջանի և Թուրքիայի միջև տրանսպորտային ոլորտում ամենամեծ նախագիծը, այսպես կոչված, «Զանգեզուրի միջանցքն» է: Բաքվում COP29-ի շրջանակում լրագրողների հետ զրույցում այս մասին հայտարարել է Թուրքիայի տրանսպորտի և ենթակառուցվածքների նախարար Աբդուլքադիր Ուրալօղլուն։ «Այս ուղղությամբ մենք օպերատիվ կերպով շարունակում ենք գործընթացներն ադրբեջանական կողմի հետ։ Որտեղով է անցնելու միջանցքը՝ Հայաստանի՞, թե՞ Իրանի տարածքով, կորոշեն մեր ադրբեջանցի եղբայրները։ Հաջորդիվ այդ միջանցքը Նախիջևանով կանցնի Թուրքիա։ Թուրքիայում ավարտել ենք մեր նախագիծը, անցկացրել ենք մրցույթ, մոտ օրերս կսկսենք շինարարական աշխատանքները և ուղիղ տրանսպորտային կապ կապահովենք Թուրքիայի և Ադրբեջանի միջև»,- ասել է թուրք նախարարը։ Նա նշել է, թե «Թուրքիան սերտորեն համագործակցում է Ադրբեջանի հետ՝ «Զանգեզուրի ճանապարհով» առանձին երթուղի ստեղծելու ուղղությամբ՝ Միջին միջանցքով բեռնափոխադրումների համար»։ Ուրալօղլուն նաև հայտարարել է, որ Թուրքիան գտնվում է տրանսպորտային միջանցքների կենտրոնում և առանցքային դեր է խաղում միջմայրցամաքային միջանցքների օգտագործման գործում։

17:34 - 20 նոյեմբերի, 2024