Բելառուս

Ուշակովը հաստատել է․ Փաշինյանը տեսակապով կմասնակցի Մինսկում ԵՏՄ նիստին |factor.am|

factor.am: Ռուսաստանի նախագահներ Վլադիմիր Պուտինը, Բելառուսի նախագահ Ալեքսանդր Լուկաշենկոն, Ղազախստանի նախագահ Կասիմ Ժոմարտ Տոկաևը, Ղրղզստանի նախագահ Սադիր Ժապարովը անձամբ կմասնակցեն Եվրասիական տնտեսական միության (ԵՏՄ) գագաթնաժողովին Մինսկում հունիսի 27-ին: ՀՀ վարչապետ Նիկոլ Փաշինյանը կմիանա տեսակապի միջոցով։ Այս մասին ճեպազրույցի ժամանակ հայտարարել է ՌԴ նախագահի օգնական Յուրի Ուշակովը, գրում է ՏԱՍՍ-ը։ «Հունիսի 27-ին Բելառուսի նախագահությամբ կկայանա Եվրասիական տնտեսական բարձրագույն խորհրդի նիստը։ Դրան կմասնակցեն Ռուսաստանի, Բելառուսի, Ղազախստանի և Ղրղզստանի նախագահները։ ՀՀ վարչապետ Փաշինյանը կմասնակցի տեսակոնֆերանսի միջոցով», -նշել է Ուշակովը՝ հավելելով․ «Բայց նա իրականում այդ մասին հայտարարել էր նախորդ հանդիպման ժամանակ»։ Ուշակովը նաև հայտնել է, որ Իրանի նախագահ Մասուդ Փեզեշքիանը չի կարողանա մասնակցել Մինսկում կայանալիք Եվրասիական տնտեսական միության գագաթնաժողովին՝ Մերձավոր Արևելքում լարվածության աճի ֆոնին։ Սակայն նա կուղարկի տեսաուղերձ։ «Հասկանալի պատճառներով, Իրանի նախագահ Փեզեշքիանը անձամբ չի մասնակցի։ Նա չի գա Մինսկ, բայց նա կուղարկի տեսաուղերձ»,-նշել է ՌԴ նախագահի օգնականը։ 2024 թվականից Իրանը ԵՏՄ-ում ունի դիտորդ պետության կարգավիճակ և մասնակցում է միության միջոցառումներին։ Շարունակությունը՝ սկզբնաղբյուր կայքում:

21:04 - 25 հունիսի, 2025

Բելառուսում ազատ են արձակվել Սերգեյ Տիխանովսկին և ևս 13 քաղբանտարկյալներ

2020 թվականի Բելառուսի նախագահական ընտրությունների թեկնածու, քաղբանտարկյալ Սերգեյ Տիխանովսկին ազատ է արձակվել բանտից և լքել է Բելառուսի տարածքը։ Այս մասին հաղորդում է DW-ի ռուսական ծառայությունը։Քաղաքական գործչի վերադարձի տեսանյութը Telegram-ում հրապարակել է Սվետլանա Տիխանովսկայան՝ նրա կինը։ Տիխանովսկու հետ միասին բելառուսական բանտերից ազատ են արձակվել ևս 13 քաղբանտարկյալներ։ Ինչպես հայտնում է լրատվամիջոցը՝ ազատ արձակումը տեղի է ունեցել ԱՄՆ միջնորդությամբ։ Հիշեցնենք, որ ավելի վաղ Բելառուսի նախագահ Ալեքսանդր Լուկաշենկոն Մինսկում հանդիպել է ԱՄՆ նախագահի հատուկ բանագնաց Քիթ Քելլոգի հետ։ «Նախագահ Թրամփի վճռական առաջնորդության շնորհիվ այսօր Բելառուսում ազատ են արձակվել 14 կալանավոր։ Շնորհակալություն Լիտվայի կառավարությանը՝ համագործակցության և աջակցության համար», - գրել է Քելլոգի տեղակալ Ջոն Քոուլը X սոցիալական ցանցի իր էջում։

19:26 - 21 հունիսի, 2025

Թրամփի բանագնացը Մինսկում հանդիպել է Բելառուսի նախագահին |azatutyun.am|

azatutyun.am: ԱՄՆ նախագահի հատուկ բանագնաց Քիթ Քելլոգը Մինսկում հանդիպել է Բելառուսի նախագահ Ալեքսանդր Լուկաշենկոյի հետ: Belta պետական լրատվական գործակալության փոխանցմամբ՝ կողմերը քննարկել են աշխարհում տիրող քաղաքական իրավիճակը և Բելառուսի ու ԱՄՆ-ի միջև երկկողմ հարաբերությունները։ Բելառուսական կիսապաշտոնական "Пул Первого" տելեգրամյան ալիքը, վկայակոչելով նախագահական աշխատակազմի իր աղբյուրին, գրում է, որ հանդիպումը տեղի է ունեցել նախագահի նստավայրում՝ Անկախության պալատում։ Այլ մանրամասներ առայժմ չեն հաղորդվում: Մինսկի և Վաշինգտոնի հարաբերությունները կտրուկ սրվել են 2020 թվականին՝ Բելառուսի նախագահական ընտրություններին հաջորդած հետընտրական բախումների ֆոնին, երբ Լուկաշենկոյի վարչակազմը աննախադեպ բռնաճնշումներ գործադրեց ցույցերը ցրելու և ընտրությունների արդյունքները վիճարկող ընդդիմության դեմ: Ի պատասխան՝ ԱՄՆ կառավարությունը պատժամիջոցներ սահմանեց Բելառուսի իշխանությունների նկատմամբ՝ խզելով այդ երկրի հետ տնտեսական, դիվանագիտական կապերը: Վաշինգտոնը մի շարք պատժամիջոցներ է սահմանել նաև՝ Ուկրաինայի դեմ Ռուսաստանի պատերազմին աջակցելու համար:

16:29 - 21 հունիսի, 2025

Փաշինյանը չի մեկնի Մինսկ. ԵՏՄ նիստին մասնակցելու է առցանց ձևաչափով |factor.am|

factor.am: Բարձրագույն Եվրասիական տնտեսական խորհրդի և Եվրասիական տնտեսական ֆորումի նիստի նախապատրաստական աշխատանքների վերաբերյալ Ալեքսանդր Լուկաշենկոյի հետ հանդիպումից հետո Բելառուսի արտգործնախարար Մաքսիմ Ռիժենկովը լրագրողներին հայտնել է, որ երկրների առաջնորդներին սպասում են Մինսկում, գրում է ԲԵԼՏԱ-ն։ Նա նշել է, որ ԵՏՄ անդամ բոլոր պետությունների (Ռուսաստան, Ղազախստան, Ղրղզստան) ղեկավարները, բացառությամբ Հայաստանի վարչապետի, հաստատել են իրենց անձնական ներկայությունը միջոցառմանը։ Նիկոլ Փաշինյանը ֆորումին կմասնակցի հեռակա՝ տեսակապի միջոցով։ Ինչ վերաբերում է դիտորդ երկրներին, ֆորումի ընթացքում սպասվում է Կուբայի նախագահ Միգել Մարիո Դիաս-Կանել Բերմուդեսի պաշտոնական այցը Բելառուս: Ուզբեկստանի նախագահ Շավքաթ Միրզիյոևը նույնպես հաստատել է իր մասնակցությունը: Ավելի վաղ հաղորդվել էր, որ Իրանի նախագահն է պլանավորում այց: «Մենք դեռևս հույս ունենք, որ Իրանի նախագահի պաշտոնական այց կլինի: Չնայած մենք հասկանում ենք տարածաշրջանում տիրող իրավիճակը՝ մենք ցանկանում ենք արագ կարգավորում, խաղաղության հաստատում այս հողի վրա: Բայց առայժմ այս պատվիրակության այցը դեռ պլանների մեջ է», – ասել է Մաքսիմ Ռիժենկովը: Ֆորումին մասնակցելու են նաև Մոնղոլիայի, ԱՄԷ-ի, Նիկարագուայի և Մյանմաի պատվիրակությունները։ Ֆորումի հաջորդ օրը՝ հունիսի 27-ին, նախատեսված է Եվրասիական տնտեսական բարձրագույն խորհրդի նիստը։ «Պետությունների ղեկավարները նեղ և ընդլայնված պատվիրակություններով կքննարկեն ընթացիկ օրակարգը, կարևոր որոշումներ կկայացնեն միության զարգացման հեռանկարների վերաբերյալ, և կստորագրվեն առևտրատնտեսական համագործակցության վերաբերյալ երկու համաձայնագիր՝ ԵՏՄ-ի և Մոնղոլիայի, ԵՏՄ-ի և ԱՄԷ-ի միջև», – ասել է Բելառուսի ԱԳ նախարարը։ Եվրասիական տնտեսական ֆորումը տեղի կունենա հունիսի 26-ին։

16:42 - 19 հունիսի, 2025

Ադրբեջանի ՊՆ ղեկավարը Բելառուս այցի ընթացքում այցելել է պաշտպանական ձեռնարկություն |factor.am|

factor.am: Ադրբեջանի ՊՆ ղեկավար Զաքիր Հասանովը Բելառուս կատարած պաշտոնական այցի շրջանակներում այցելել է Ռազմաօդային ուժերի և ՀՕՊ զորքերի կենտրոնական հրամանատարական կետ։ Այս մասին հայտնում է Ադրբեջանի ՊՆ-ն։ Իր հերթին, Բելառուսի պաշտպանության նախարարության մամուլի ծառայությունը հայտնում է, որ Հասանովին ցուցադրվել են բելառուսական ՀՕՊ համակարգերի հնարավորությունները։ «Ադրբեջանի պաշտպանության նախարարության ղեկավարը նաև եղել է Բելառուսի տնտեսության պաշտպանական ոլորտի ձեռնարկությունում», – ասվում է հայտարարարության մեջ: Շարունակությունը՝ սկզբնաղբյուր կայքում:

22:28 - 18 հունիսի, 2025

Պուտինը շնորհավորել է Փաշինյանին ու ԵՏՄ անդամ երկրների մյուս ղեկավարներին |factor.am|

factor.am: ՌԴ նախագահ Վլադիմիր Պուտինը շնորհավորել է Հայաստանի վարչապետ Նիկոլ Փաշինյանին, ինչպես նաև Բելառուսի, Ղազախստանի և Ղրղզստանի նախագահներ՝ Ալեքսանդր Լուկաշենկոյին, Կասիմ-Ժոմարտ Տոկաևին ու Սադիր Ժապարովին Եվրասիական տնտեսական միության օրվա կապակցությամբ, փոխանցում է Կրեմլի մամուլի ծառայությունը։ «Եվրասիական տնտեսական միության շրջանակում ինտեգրացիոն գործընթացները զարգանում են շատ դինամիկ և արդյունավետ։ Ստեղծվել է ընդհանուր շուկա, որն ապահովում է ապրանքների, ծառայությունների, կապիտալի և աշխատուժի ազատ տեղաշարժ»,- մասնավորապես, ասվում է հայտարարության մեջ։ Պուտինը վստահություն է հայտնել, որ «ԵՏՄ երկրները կշարունակեն ընդլայնել կառուցողական բազմակողմ համագործակցություն բոլոր հնարավոր ձևերով՝ ի շահ ժողովուրդների բարօրության, Եվրասիական տարածքում բարգավաճման և կայունության ապահովման»։ Նշենք, որ Եվրասիական տնտեսական միությունը (ԵՏՄ) միջազգային ինտեգրացիոն տնտեսական միավորում է, որի մասնակիցներն են Հայաստանը, Ռուսաստանը, Բելառուսը, Ղազախստանը և Ղրղզստանը: ԵՏՄ-ի մասին պայմանագիրը ստորագրվել է 2014 թվականի մայիսի 29-ին Աստանայում՝ պետությունների ղեկավարների կողմից:

14:48 - 29 մայիսի, 2025

Լուկաշենկոն 7-րդ անգամ պաշտոնապես ստանձնեց Բելառուսի նախագահի պաշտոնը |azatutyun.am|

azatutyun.am: Ալեքսանդր Լուկաշենկոն 7-րդ անգամ երդմնակալության հանդիսավոր արարողությամբ շարունակել է պաշտոնավարումը Բելառուսի նախագահի աթոռին։ Նա նախագահի պաշտոնում վերընտրվել էր հունվարյան ընտրություններում։ Լուկաշենկոն Մինսկի Անկախության պալատ է հասել հատուկ շարասյան ուղեկցությամբ։ Երդմնակալության արարողության նախօրեին 10 իրավապաշտպան կազմակերպություններ հայտարարել էին, որ Լուկաշենկոյի՝ երկրի նախագահի պաշտոնն զբաղեցնելը հակասահմանադրական է, հունվարի 26-ին անցկացված ընտրությունները չեն համապատասխանել միջազգային չափանիշին՝ «դրանք անցել են համատարած վախի մթնոլորտում»: «Ազատության» բելառուսական ծառայության տեղեկացմամբ՝ մինչև այսօրվա արարողությունը, Լուկաշենկոն հասցրել է հաստատել նոր կառավարության կազմն ու պաշտոնական այցով Մոսկվա մեկնել։ Լուկաշենկոն Բելառուսի նախագահի աթոռին է 1994 թվականից։ Այն բանից հետո, երբ դաժանորեն ճնշվեցին 2020 թվականի հետընտրական անհնազանդության ակցիաները, միջազգային հանրությունը հրաժարվում է ճանաչել նրան որպես Բելառուսի օրինական նախագահ։

17:09 - 25 մարտի, 2025

Ռուսաստանի, Բելառուսի և Տաջիկստանի նախագահները հեռախոսազրույց են ունեցել Ալիևի հետ |1lurer.am|

1lurer.am: Կրեմլից հայտնում են, որ Ռուսաստանի, Բելառուսի և Տաջիկստանի նախագահները, որոնք համատեղ ոչ ֆորմալ հանդիպում են անցկացրել, հեռախոսով կապ են հաստատել Ադրբեջանի նախագահի հետ։ Ըստ հաղորդագրության՝ տեղի է ունեցել ջերմ, բարեկամական զրույց, որի ընթացքում կողմերը քննարկել են միջպետական հարաբերությունների հետագա զարգացմանն առնչվող հրատապ հարցեր։ Նախագահները պայմանավորվել են հանդիպել մայիսի 9-ին՝ Մոսկվայում:

21:31 - 15 մարտի, 2025

Լուկաշենկոն և Պուտինը Կրեմլում բանակցություններ են վարում |armenpress.am|

armenpress.am: Ռուսաստանի նախագահ Վլադիմիր Պուտինը և Բելառուսի նրա գործընկեր Ալեքսանդր Լուկաշենկոն Կրեմլում սկսել են բանակցությունները։ Այդ մասին տեղեկանում ենք ՏԱՍՍ գործակալությունից: Հանդիպման բացմանը Պուտինը հայտնել է, որ Ռուսաստանի և Բելառուսի միջև հարաբերությունները կարելի է անվանել եղբայրական «այդ բառի ուղիղ իմաստով»։ «Ես շատ ուրախ եմ, որ Բելառուսի նախագահի պաշտոնում վերընտրվելուց հետո որոշեցիք ձեր առաջին այցը կատարել հենց Ռուսաստան։ Սա, ըստ էության, հասկանալի է, քանի որ Ռուսաստանն ու Բելառուսը հատուկ հարաբերություններ ունեն՝ դաշնակցային և եղբայրական՝ բառիս ուղիղ իմաստով», - ասել է ՌԴ նախագահը։ Հունվարին Բելառուսում կայացած նախագահական ընտրություններում վերընտրվելուց հետո սա Լուկաշենկոյի առաջին արտասահմանյան այցն է։ Ակնկալվում է, որ Պուտինն ու Լուկաշենկոն կքննարկեն, մասնավորապես, ինտեգրման խորացման և Միութենական պետության ընդհանուր պաշտպանական տարածքի ամրապնդման շուրջ պայմանավորվածությունների իրագործումը։ Նախագահները նաև կարծիքներ կփոխանակեն միջազգային օրակարգի առանցքային թեմաների շուրջ։ Բանակցությունների արդյունքների ամփոփումից հետո պլանավորված է երկու նախագահների կողմից մի շարք կարևոր միջպետական փաստաթղթերի ստորագրում. տեղի կունենա նաև միջկառավարական և միջգերատեսչական փաստաթղթերի ստորագրում։

17:00 - 13 մարտի, 2025

Լուկաշենկոն հայտարարել է, որ սպասում է Թրամփին, Պուտինին և Զելենսկիին Բելառուսում |news.am|

news.am: Բելառուսի նախագահ Ալեքսանդր Լուկաշենկոն հայտարարել է Ռուսաստանի, ԱՄՆ-ի և Ուկրաինայի նախագահների միջև բանակցություններ կազմակերպելու Մինսկի պատրաստակամության մասին։ «Հիմա Զելենսկիին խոնարհեցնել պետք չէ, անկախ նրանից, թե նա ինչպիսին է։ Պետք է համոզել և համաձայնության գալ Զելենսկու հետ, քանի որ Զելենսկու թիկունքում կանգնած է ուկրաինական հասարակության զգալի մասը։ Ուստի պետք է համաձայնության գալ։ Եթե ուզում եք, եկեք։ Այստեղ մոտակայքում՝ Բելառուսի սահմանից Կիև 200 կմ հեռավորության վրա։ Կես ժամ ինքնաթիռով։ Եկե՛ք։ Եկեք այստեղ նստենք։ Եկեք համաձայնության գանք հանգիստ, առանց աղմուկի, առանց բղավելու։ Ուստի ասեք Թրամփին. ես նրան սպասում եմ այստեղ Պուտինի և Զելենսկու հետ միասին։ Եկեք նստենք ու հանգիստ համաձայնության գանք։ Եթե ցանկանում եք համաձայնության գալ»,- Լուկաշենկոյի խոսքերն է մեջբերում ԲԵԼՏԱ գործակալությունը՝ ամերիկացի բլոգեր Մարիո Նաուֆալին տված հարցազրույցում։ Բելառուսի նախագահը կարծում է, որ Թրամփը ավելի անկախ նախագահ է, քան իր նախորդ Ջո Բայդենը։ «Նույնիսկ եթե սխալ է, նա որոշում կկայացնի: Բայդենն ինքնուրույն որոշումներ չէր կայացնում։ Նրան ասում էին՝ պետք չի զանգել եւ նա չէր զանգում: Նրան ասում էին՝ Պուտինին դիկտատոր անվանիր, նա այդպես էլ անում էր»,- ասել է Լուկաշենկոն։ Նա նաև ենթադրել է, որ Բայդենի օրոք ռազմական արդյունաբերության ներկայացուցիչները ակտիվորեն լոբբինգ էին անում իրենց շահերի համար։ «Եվ Բայդենը, իր բնավորության և ֆիզիկական վիճակի պատճառով, չկարողացավ դիմադրել այնպես, ինչպես դա անում է Թրամփը: Ամբողջ խնդիրը դա է», - եզրափակել է Լուկաշենկոն։

10:22 - 05 մարտի, 2025

Եվրահանձնաժողովի նոր մարմինը կզբաղվի նաև Հայաստանին, Ադրբեջանին և Բելառուսին աջակցության հարցերով |azatutyun.am|

azatutyun.am: Փետրվարի 1-ից Եվրահանձնաժողովում գործում է ընդլայնման և Արևելյան հարևանության հարցերով գլխավոր տնօրինություն, որը պատասխանատու է թեկնածու երկրների և Եվրամիությանն անդամակցելու հավակնորդ երկրների հետ ընդլայնման և անդամակցության բանակցությունների համար: Եվրահանձնաժողովից հայտնում են, որ սա ներառում է նաև հաղորդակցություն ԵՄ անդամ երկրներում, ինչպես նաև ընդլայնման առավելությունների մասին գործընկերներին տեղեկացում: Գլխավոր տնօրինությունը կզբաղվի ԵՄ ֆինանսական և տեխնիկական աջակցության մեծ մասի ընդլայնմամբ գործընկերներին, ինչպես նաև ԵՄ Արևելյան հարևանության երկրներին, ինչպիսին են Հայաստանը, Ադրբեջանը և Բելառուսը: Բացի դրանից, այս կառույցը մշտական և կայուն աջակցություն կտրամադրի Ուկրաինային:

11:54 - 04 փետրվարի, 2025

Ալիևը շնորհավորել է Լուկաշենկոյին վերընտրվելու կապակցությամբ |azatutyun.am|

azatutyun.am: Ադրբեջանի նախագահ Իլհամ Ալիևն այսօր զանգահարել է Բելառուսի առաջնորդ Ալեքսանդր Լուկաշենկոյին, շնորհավորել նախագահի պաշտոնում վերընտրվելու կապակցությամբ և հաջողություններ մաղթել աշխատանքում, հայտնում է ադրբեջանական APA գործակալությունը։ Հեռախոսազրույցի ընթացքում Ալիևն ու Լուկաշենկոն վստահություն են հայտնել, որ երկու երկրների միջև բարեկամական և գործընկերային հարաբերությունները կշարունակեն զարգանալ աճի միտումով, մտքեր են փոխանակել համագործակցության հեռանկարների շուրջ, նշում է լրատվամիջոցը։ Բելառուսի առաջնորդ Ալյաքսանդր Լուկաշենկոն յոթերորդ անգամ է վերընտրվել նախագահի պաշտոնում՝ ստանալով ձայների 86.8 տոկոսը: Նրա ամենամոտ մրցակիցը՝ Սերգեյ Սիրանկովը, ստացել է ձայների 3.2 տոկոսը:

13:01 - 27 հունվարի, 2025

Հունգարիան արգելափակել է ԵՄ համատեղ հայտարարությունը Բելառուսի ընտրությունների վերաբերյալ |azatutyun.am|

azatutyun.am: Հունգարիայի ներկայացուցիչներն արգելափակել են Եվրամիության երկրների համատեղ հայտարարությունը Բելառուսի նախագահական ընտրությունները մերժելու վերաբերյալ, հայտնում են «Ազատություն» ռադիոկայանի Բրյուսելի աղբյուրները։ Չունենալով ԵՄ բոլոր 27 երկրների ներկայացուցիչների ստորագրությունները՝ Եվրամիության արտաքին քաղաքականության պատասխանատու Կայա Կալասը հանդես է եկել հայտարարությամբ՝ ասելով, որ հունվարի 26-ի քվեարկությունն ազատ ու արդար չէր և Բելառուսի իշխանություններին կոչ արել ազատ արձակել բոլոր քաղբանտարկյալներին։ Նա ասել է, որ ԵԱՀԿ ընտրությունների անկախ դիտորդներին թույլ չտվեցին մուտք գործել ընտրական գործընթացի առանցքային փուլեր՝ հավելելով՝ «սա հերթական վկայությունն է այս ընտրությունների նկատմամբ վստահության իսպառ բացակայության մասին»։ Կալասը հավելել է, որ այս պատճառներով և Ուկրաինայի դեմ Ռուսաստանի պատերազմին Բելառուսի վարչակարգի ներգրավվածության լույսի ներքո «ԵՄ-ն կշարունակի սահմանափակումներ և պատժամիջոցներ սահմանել ռեժիմի դեմ և ապահովել ֆինանսական աջակցություն քաղաքացիական հասարակությանը, վտարանդի բելառուսական ժողովրդավարական ուժերին և բելառուսական մշակույթին»։ Անցյալ շաբաթ Հունգարիան հրաժարվեց ստորագրել ԵՄ 27 երկրների անունից Բելառուսում անցկացված «ոչ ժողովրդավարական նախագահական ընտրությունների մասին» հայտարարության նախագիծը։ Բայց նա միայնակ չէր, որ դեմ էր նախագծին: Սլովակիան նույնպես հրաժարվել է այն ստորագրել։ Ավելի ուշ Սլովակիայի ներկայացուցիչները համաձայնեցին ստորագրել հայտարարությունը, սակայն Հունգարիայի իշխանությունները շարունակեցին մերժել։

09:40 - 27 հունվարի, 2025

Բելառուսի նախագահական ընտրություններում Լուկաշենկոյին կողմ է քվեարկել ընտրողների 86,82%–ը |arm.sputniknews.ru|

arm.sputniknews.ru: Կենտրոնական ընտրական հանձնաժողովի նախնական տվյալներով՝ Բելառուսի նախագահական ընտրություններում Ալեքսանդր Լուկաշենկոյին կողմ է քվեարկել ընտրողների 86,82 տոկոսը: Այս մասին հայտարարել է Բելառուսի կենտրոնական ընտրական հանձնաժողովի նախագահ Իգոր Կարպենկոն։ «Ըստ մարզային և Մինսկի քաղաքային հանձնաժողովների նախնական տվյալների` Ալեքսանդր Լուկաշենկոն հավաքել է քվեների 86,82%–ը», - ասել է Կարպենկոն ճեպազրույցի ժամանակ: Կոմկուսի թեկնածու Սերգեյ Սիրանկովին կողմ է քվեարկել ընտրողների 3,21 տոկոսը, Օլեգ Գայդուկևիչին (Լիբերալ-դեմոկրատական կուսակցություն)՝ 2,02 տոկոսը, ինքնառաջադրված Աննա Կանոպացկայային՝ 1,86 տոկոսը, Ալեքսանդր Խիժնյակին (Աշխատանքի և արդարության հանրապետական կուսակցություն)՝ 1,74 տոկոսը: Հիշեցնենք` հունվարի 26-ին Բելառուսում նախագահական ընտրություններ են անցկացվել: ԿԸՀ-ն նախագահի պաշտոնի համար հինգ թեկնածու է գրանցել՝ գործող նախագահ Ալեքսանդր Լուկաշենկոյին, Լիբերալ-դեմոկրատական կուսակցության առաջնորդ Օլեգ Գայդուկևիչին, Աշխատանքի և արդարության հանրապետական կուսակցության ներկայացուցիչ Ալեքսանդր Խիժնյակին, Կոմկուսի կենտկոմի առաջին քարտուղար Սերգեյ Սիրանկովին և գործարար Աննա Կանոպացկայային:

09:37 - 27 հունվարի, 2025

Բելառուսում նախագահական ընտրություններ են |azatutyun.am|

azatutyun.am: Բելառուսում այսօր նախագահական ընտրություններ են: Թեկնածուները հինգն են՝ ավելի քան 30 տարի այս երկիրը ղեկավարող Ալեքսանդր Լուկաշենկոն, Լիբերալ-դեմոկրատական կուսակցության նախագահ Օլեգ Գայդուկևիչը, գործարար Աննա Կանոպացկայան, Կոմկուսի կենտկոմի առաջին քարտուղար Սերգեյ Սիրանկովը և աշխատանքի և արդարության Հանրապետական կուսակցության նախագահ Ալեքսանդր Խիժնյակը: «Ես դա անում եմ հանուն ժողովրդի և Բելառուսի ապագայի», - ամիսներ առաջ հայտարարելով հերթական առաջադրման մասին` պնդել էր 70-ամյա Լուկաշենկոն: Լուկաշենկոյի ընդդիմախոսներն այս ընտրություններին չեն մասնակցում և պնդում են, թե իրական մրցակցություն չկա․ առաջադրված թեկնածուները դրածոներ են՝ զուտ ընտրության պատրանք ստեղծելու համար։Շարունակությունը՝ սկզբնաղբյուր կայքում։

10:17 - 26 հունվարի, 2025

Պուտինն ու Լուկաշենկոն հեռախոսազրույց են ունեցել |azatutyun.am|

azatutyun.am: Բելառուսի և Ռուսաստանի նախագահներն այսօր հեռախոսազրույց են ունեցել: Ալեքսանդր Լուկաշենկոն և Վլադիմիր Պուտինը քննարկել են երկկողմ փոխգործակցությանն առնչվող արդիական աշխատանքային հարցեր: Բոլոր ոլորտներում բելառուսա-ռուսական համագործակցության ինտենսիվությունը, ինչպես ընդգծել են առաջնորդները, անհրաժեշտ է պահպանել։ Այլ մանրամասներ զրույցից չեն հաղորդվում:

15:47 - 19 հունվարի, 2025